- శస్త్రచికిత్స విద్య తోడ్పాటుకు విన్నపం
- కోఠీ ఈఎన్టీ ఆసుపత్రి ప్రాంగణంలో చోటు
- యువ డాక్టర్లకు అంతర్జాతీయ నైపుణ్యం
సహనం వందే, హైదరాబాద్:
తెలంగాణలో వైద్య విద్యను మరింత ఉన్నత శిఖరాలకు చేర్చే దిశగా అసోసియేషన్ ఆఫ్ సర్జన్స్ ఆఫ్ ఇండియా (ఏఎస్ఐ) అడుగులు వేస్తోంది. రాష్ట్రంలోని సర్జన్ల నైపుణ్యాలను మెరుగుపరచడానికి, యువ వైద్యులకు ప్రపంచస్థాయి శిక్షణ అందించడానికి ఒక ప్రత్యేక కేంద్రాన్ని ఏర్పాటు చేయాలని సంకల్పించింది. ఈ మహత్తర ఆశయానికి ప్రభుత్వం నుంచి భూమి సహకారం కోరుతూ ముఖ్యమంత్రి రేవంత్ రెడ్డిని కలిసి విన్నవించింది.
ముఖ్యమంత్రితో భేటీ…
అసెంబ్లీ ప్రాంగణంలో మంగళవారం ముఖ్యమంత్రి రేవంత్ రెడ్డిని ఏఎస్ఐ తెలంగాణ చాప్టర్ గౌరవ కార్యదర్శి డాక్టర్ బొంగు రమేష్ ప్రత్యేకంగా కలిశారు. రాష్ట్రంలో సర్జికల్ విద్యను బలోపేతం చేసేందుకు తమ సంఘం చేస్తున్న కృషిని ఈ సందర్భంగా వివరించారు. ముఖ్యంగా ఎంఎస్, డీఎన్బీ చదువుతున్న విద్యార్థులకు క్లినికల్ శిక్షణ ఇచ్చేందుకు ఒక శాశ్వత భవనం అవసరమని విన్నవించారు. ముఖ్యమంత్రి సానుకూలంగా స్పందిస్తూ ప్రతిపాదనలను పరిశీలిస్తామని హామీ ఇచ్చినట్లు డాక్టర్ బొంగు రమేష్ తెలిపారు.
అద్దె భవనాల్లో అవస్థలు…
ప్రస్తుతం తెలంగాణ ఏఎస్ఐ చాప్టర్ కు సొంత భవనం లేకపోవడంతో తీవ్ర ఇబ్బందులు ఎదురవుతున్నాయి. కీలకమైన వర్క్ షాపులు, వైద్య సమావేశాలు నిర్వహించడానికి అద్దె గదులపై లేదా తాత్కాలిక వేదికలపై ఆధారపడాల్సి వస్తోంది. దీనివల్ల శిక్షణా కార్యక్రమాలను విస్తరించడం సాధ్యం కావడం లేదని డాక్టర్ రమేష్ పేర్కొన్నారు. సుమారు 2000 మంది నిపుణులైన సర్జన్లు సభ్యులుగా ఉన్న ఈ సంస్థకు గౌరవప్రదమైన వేదిక లేకపోవడం లోటుగా మారింది.
కోఠి ఈఎన్టీ క్యాంపస్ లో స్థలం
హైదరాబాద్ కోఠీలోని ఈఎన్టీ ఆసుపత్రి ప్రాంగణంలో ఏపీజీడీఏ, టీఎస్ జీడీఏ కార్యాలయాల వెనుక ఉన్న ప్రభుత్వ భూమిని కేటాయించాలని వైద్యులు కోరుతున్నారు. ఈ ప్రాంతం నగర నడిబొడ్డున ఉండటంతోపాటు వైద్య విద్యార్థులకు, నిపుణులకు అందుబాటులో ఉంటుందని వారు భావిస్తున్నారు. స్థలం ఇస్తే చాలు భవన నిర్మాణానికి అయ్యే ఖర్చును తామే విరాళాల ద్వారా సేకరించుకుంటామని సంఘం స్పష్టం చేసింది.
అత్యాధునిక శిక్షణ కేంద్రం
ప్రతిపాదిత భవనంలో కేవలం కార్యాలయం మాత్రమే కాకుండా అత్యాధునిక సిమ్యులేషన్ ల్యాబ్స్, స్కిల్స్ ల్యాబ్స్ ఏర్పాటు చేయాలని ఏఎస్ఐ ప్రణాళికలు సిద్ధం చేసింది. వీటితో పాటు డిజిటల్ లైబ్రరీ, భారీ ఆడిటోరియం, లెక్చర్ హాల్స్ నిర్మించనున్నారు. ఇక్కడ ట్రామా మేనేజ్మెంట్, అడ్వాన్స్డ్ సర్జికల్ టెక్నిక్స్, కీ హోల్ సర్జరీ వంటి అంశాలపై నిరంతరం శిక్షణ ఇవ్వడం ద్వారా రాష్ట్ర వైద్య రంగం దశ మారుతుందని వారు ఆశిస్తున్నారు.
గ్రామీణ వైద్యానికి మేలు
ఈ శిక్షణా కేంద్రం వల్ల కేవలం నగర వైద్యులకే కాకుండా గ్రామీణ ప్రాంతాల్లో సేవలందించే వారికి కూడా ఎంతో ప్రయోజనం చేకూరుతుంది. యువ సర్జన్లు నైపుణ్యాలను మెరుగుపరుచుకోవడం వల్ల ప్రభుత్వ ఆసుపత్రులలో చికిత్స నాణ్యత పెరుగుతుందని ఏఎస్ఐ తెలిపింది. దీనివల్ల పేద ప్రజలకు మెరుగైన శస్త్రచికిత్స సేవలు అందుబాటులోకి వస్తాయని, రాష్ట్రం మెడికల్ హబ్ గా మారుతుందని వివరించారు.
నిబంధనల పాటింపు
స్థలం కేటాయింపు విషయంలో ప్రభుత్వం విధించే అన్ని నిబంధనలకు కట్టుబడి ఉంటామని వైద్య సంఘం ప్రతినిధులు భరోసా ఇచ్చారు. దీనికి సంబంధించిన పూర్తి ప్రాజెక్ట్ నివేదికలు, ఆర్కిటెక్చరల్ ప్లాన్లు, నిధుల వివరాలు తమ వద్ద సిద్ధంగా ఉన్నాయని తెలిపారు. ముఖ్యమంత్రి రేవంత్ రెడ్డి విజనరీ నాయకత్వంలో తెలంగాణ వైద్య రంగం అభివృద్ధి చెందుతుందని, అందులో తమను భాగస్వాములను చేయాలని వారు విజ్ఞప్తి చేశారు.
