- తనకు ఆరుగురు ఉన్నారని ఓవైసీ వ్యాఖ్య
- పిల్లల్ని కట్టామంటే అడ్డు ఎవరని సెటైర్
- 20 మంది పిల్లల్ని కనాలన్న ఎంఐఎం నేత
- భగవత్, చంద్రబాబు గత వ్యాఖ్యల ప్రస్తావన
- పెరుగుతున్న జనాభాపై కాంగ్రెస్ ఆందోళన
- హిందూ, ముస్లిం సంతాన అంశంపై వివాదం
సహనం వందే, మహారాష్ట్ర:
దేశంలో హిందూ ముస్లిం రాజకీయం మరింత పెరుగుతుంది. ముస్లింలు ఎక్కువమంది కంటున్నారని… దీనివల్ల హిందుస్థాన్ పాకిస్తాన్ అయ్యే ప్రమాదం ఉందని బీజేపీ ఎంపీ నవనీత్ కౌర్ చేసిన కామెంట్లు రచ్చ అవుతున్నాయి. హిందువులు నలుగురు పిల్లలు కనాలంటూ ఆమె చేసిన వ్యాఖ్యలకు కౌంటర్గా ‘నాకు ఆరుగురు ఉన్నారంటూ, ఎంఐఎం అధినేత ఓవైసీ చేసిన వ్యాఖ్యలు రాజకీయ కాక రేపుతున్నాయి. అభివృద్ధిని వదిలేసి పిల్లల సంఖ్య చర్చకు రావడం వింతగా మారింది.
ఓవైసీ ఘాటు విమర్శలు
ఏఐఎంఐఎం అధినేత అసదుద్దీన్ ఓవైసీ బీజేపీ నాయకురాలు నవనీత్ రాణాపై విరుచుకుపడ్డారు. మహారాష్ట్రలోని అకోలాలో మంగళవారం జరిగిన ర్యాలీలో ఆయన దూకుడుగా మాట్లాడారు. నలుగురు పిల్లలు కనాలని సూచించిన రాణాకు తనదైన శైలిలో బదులిచ్చారు. తనకు ఇప్పటికే ఆరుగురు పిల్లలు ఉన్నారని ఆయన ప్రకటించారు. తనకు గడ్డం కూడా తెల్లబడుతోందని ఎద్దేవా చేశారు. ‘మీరు నలుగురే ఎందుకు కావాలి… 8 మందిని కనండి.. మిమ్మల్ని ఎవరు ఆపుతున్నారని’ ఆయన ప్రశ్నించారు. ఈ వ్యాఖ్యలు ఇప్పుడు సోషల్ మీడియాలో వైరల్ అవుతున్నాయి.
నవనీత్ రాణా వాదన ఇదే
అంతకుముందు బీజేపీ నేత నవనీత్ రాణా హిందువులకు ఒక విజ్ఞప్తి చేశారు. దేశంలో జనాభా సమతుల్యత దెబ్బతింటోందని ఆమె ఆందోళన వ్యక్తం చేశారు. కొందరు వ్యక్తులు నలుగురు భార్యలను కలిగి ఉండి 19 మంది పిల్లలను కంటున్నారని ఆరోపించారు. భారత్ పాకిస్థాన్గా మారకూడదంటే హిందువులు కూడా కనీసం మూడు లేదా నలుగురు పిల్లలను కనాలని ఆమె కోరారు. ఒక్క బిడ్డతో సంతృప్తి చెందడం సరికాదని ఆమె వాదించారు. ఈ వ్యాఖ్యలే ఓవైసీ ఆగ్రహానికి కారణమయ్యాయి.
చంద్రబాబు వ్యాఖ్యల ప్రస్తావన
పిల్లల సంఖ్య పెంచాలన్న వాదన కేవలం రాణాదే కాదని ఓవైసీ గుర్తు చేశారు. ఆర్ఎస్ఎస్ అధినేత మోహన్ భాగవత్ కూడా గతంలో ఇలాగే అన్నారని చెప్పారు. అలాగే ఆంధ్రప్రదేశ్ ముఖ్యమంత్రి నారా చంద్రబాబు నాయుడు కూడా ఎక్కువ మంది పిల్లలను కనాలని కోరిన విషయాన్ని ఆయన ప్రస్తావించారు. వీరంతా ఇప్పుడు జనాభా పెంచాలని ఎందుకు చెబుతున్నారని ఆయన నిలదీశారు. మీరందరూ కలిసి 20 మందిని కనండి అంటూ ఆయన సవాల్ విసిరారు. ఇదంతా ఒక పెద్ద జోక్ లాగా ఉందని ఆయన మండిపడ్డారు.
రాజకీయ వర్గాల స్పందన
ఈ వ్యవహారంపై కాంగ్రెస్ పార్టీ కూడా స్పందించింది. కాంగ్రెస్ ఎంపీ మాణిక్కం ఠాగూర్ బీజేపీ, ఆర్ఎస్ఎస్ వైఖరిని తప్పుబట్టారు. ఇది చాలా అశాస్త్రీయమైన ఆలోచన అని ఆయన కొట్టిపారేశారు. జనాభా పెరుగుదల దేశానికి పెద్ద సమస్యగా మారిందని ఆయన ఆందోళన వ్యక్తం చేశారు. జనాభాను నియంత్రించలేని రాష్ట్రాలు ఇప్పటికే ఇబ్బందులు పడుతున్నాయని గుర్తు చేశారు. ఇటువంటి వెర్రి ఆలోచనలను మానుకోవాలని ఆయన హితవు పలికారు. ప్రజలను తప్పుదోవ పట్టించేలా ఇలాంటి వ్యాఖ్యలు చేయడం సరికాదన్నారు.
జనాభా లెక్కల లెక్క
కొందరు సంఖ్యాపరంగా పైచేయి సాధించాలని చూస్తుంటే మరికొందరు అభివృద్ధి కోణంలో ఆలోచిస్తున్నారు. ఒకప్పుడు జనాభా నియంత్రణపై దృష్టి పెట్టిన నాయకులు ఇప్పుడు రాజకీయ ప్రయోజనాల కోసం పెంపుదలపై మాట్లాడుతున్నారు. ఓట్ల రాజకీయాల కోసం ఇలాంటి సున్నితమైన అంశాలను వాడుకోవడం వల్ల సమాజంలో చీలికలు వచ్చే ప్రమాదం ఉందని విశ్లేషకులు భావిస్తున్నారు. మూఢనమ్మకాలతో కాకుండా శాస్త్రీయంగా ఆలోచించాలని వారు కోరుతున్నారు.
ప్రజల్లో గందరగోళం
నాయకుల మధ్య జరుగుతున్న ఈ మాటల యుద్ధం సామాన్య ప్రజలను గందరగోళానికి గురిచేస్తోంది. నిత్యావసర ధరలు, నిరుద్యోగం వంటి సమస్యలపై చర్చించాల్సింది పోయి పిల్లల సంఖ్యపై వాదించుకోవడంపై విమర్శలు వస్తున్నాయి. హిందూ, ముస్లిం అనే కోణంలో జనాభాను చూడటం వల్ల విద్వేషాలు పెరుగుతాయని మేధావులు హెచ్చరిస్తున్నారు. దేశ భవిష్యత్తును దృష్టిలో ఉంచుకుని బాధ్యతాయుతమైన వ్యాఖ్యలు చేయాలని కోరుతున్నారు. ఓవైసీ, రాణా మధ్య మొదలైన ఈ వివాదం ఇంకా ఎన్ని మలుపులు తిరుగుతుందో చూడాలి.
