- కళ్ళద్దాలతో రహస్యంగా వీడియోల చిత్రీకరణ
- డేటింగ్ టిప్స్ పేరుతో సోషల్ మీడియాలో షేర్
- లక్షల వ్యూస్ రావడంతో మహిళల విలవిల
- వ్యక్తిగత సమాచారం లీకై వేధింపుల పర్వం
- టెక్నాలజీ మాటున పెరుగుతున్న సరికొత్త క్రైం
సహనం వందే, లండన్:
కళ్ళకు పెట్టుకునే అద్దాలే కీచక పర్వానికి తెరలేపుతున్నాయి. ఎదురుగా ఉన్న వ్యక్తికి తెలియకుండానే వారి ప్రతి కదలికను చిత్రీకరిస్తూ కొందరు వ్యక్తులు రాక్షసానందం పొందుతున్నారు. టిక్ టాక్, ఇన్స్టాగ్రామ్ వంటి వేదికలపై లైకుల కోసం మహిళల మర్యాదను బజారున పడేస్తున్నారు. టెక్నాలజీని ఆసరాగా చేసుకుని జరుగుతున్న ఈ అనాగరిక కృత్యాలు ఇప్పుడు ప్రపంచవ్యాప్తంగా చర్చనీయాంశంగా మారాయి.
అద్దాల్లో కెమెరాలు
లండన్ కు చెందిన దిలారా అనే యువతి తన భోజన సమయంలో అద్దాల వెనుక దాగున్న ముప్పును పసిగట్టలేకపోయింది. ఒక వ్యక్తి వచ్చి ఆమెతో మాటలు కలిపి రికార్డింగ్ చేశాడు. స్మార్ట్ గ్లాసుల సాయంతో ఆమెకు తెలియకుండానే వీడియో తీసి టిక్ టాక్ లో పెట్టాడు. ఆ వీడియోను ఏకంగా 13 లక్షల మంది చూశారు. అది చూసి ఆమె షాక్ కు గురైంది. తన వ్యక్తిగత ఫోన్ నంబర్ కూడా అందులో కనిపించడంతో వేధింపులు మొదలయ్యాయి.
డేటింగ్ సలహాల ముసుగులో
ఇది కేవలం ఒకరితో ఆగలేదు. కిమ్ అనే 56 ఏళ్ల మహిళపై కూడా ఇలాంటి అఘాయిత్యమే జరిగింది. సముద్ర తీరంలో ఆమెతో మాట్లాడిన ఒక వ్యక్తి గుట్టుచప్పుడు కాకుండా వీడియో తీశాడు. తాను ఇచ్చే డేటింగ్ సలహాల కోసం ఆమెను ఒక వస్తువులా వాడుకున్నాడు. ఆ వీడియోలకు టిక్ టాక్ లో 69 లక్షలు, ఇన్స్టాగ్రామ్ లో లక్షకు పైగా లైకులు వచ్చాయి. ఆమె ఉద్యోగం, కుటుంబ వివరాలు కూడా బయటకు రావడంతో తీవ్ర ఇబ్బందులు పడింది.
స్మార్ట్ గ్లాసుల దందా
ప్రముఖ టెక్ సంస్థ మెటా తయారు చేసిన రే బాన్ స్మార్ట్ గ్లాసుల ద్వారా ఈ కవ్వింపు చర్యలు జరుగుతున్నాయి. 2023 అక్టోబర్ నుంచి 2025 ఫిబ్రవరి మధ్య కాలంలోనే దాదాపు 20 లక్షల జతల అద్దాలు అమ్ముడయ్యాయి. రికార్డింగ్ సమయంలో చిన్న లైట్ వెలుగుతుందని సంస్థ చెబుతున్నా, ఆ లైట్ కనిపించకుండా స్టిక్కర్లు వేసి మరీ వీడియోలు తీస్తున్నారు. దీంతో అమాయక మహిళలు తమకు తెలియకుండానే సోషల్ మీడియాలో వైరల్ అవుతున్నారు.
వేధింపుల పర్వం
వీడియోలు వైరల్ కావడమే కాకుండా బాధితులకు వేల సంఖ్యలో ఫోన్ కాల్స్ వస్తున్నాయి. దిలారాకు రాత్రిపూట ఫోన్లు చేసి అసభ్యంగా మాట్లాడుతున్నారు. కొందరు వ్యక్తులు ఆమె పనిచేసే చోటికి వచ్చి వీడియోలో ఉన్న డైలాగులతో వేధిస్తున్నారు. కిమ్ కు కూడా లైంగిక వేధింపులతో కూడిన మెసేజ్ లు వస్తున్నాయి. కేవలం తన స్వార్థం కోసం ఎవరో తీసిన వీడియోలు తమ జీవితాలను అతలాకుతలం చేస్తున్నాయని బాధితులు ఆవేదన వ్యక్తం చేస్తున్నారు.
చట్టాల్లో లొసుగులు
ప్రస్తుతం బ్రిటన్ వంటి దేశాల్లో బహిరంగ ప్రదేశాల్లో వీడియోలు తీయడంపై కఠినమైన చట్టాలు లేవు. ఇదే సైబర్ నేరగాళ్లకు వరంగా మారింది. టెక్నాలజీ కంపెనీలు కేవలం లాభాల కోసమే చూస్తున్నాయి తప్ప మహిళల భద్రతను పట్టించుకోవడం లేదనే విమర్శలు వస్తున్నాయి. సోషల్ మీడియా సంస్థలు కూడా వెంటనే స్పందించడం లేదు. బాధితులు ఫిర్యాదు చేసినా మొదట పట్టించుకోకుండా మీడియా రంగంలోకి వచ్చాక మాత్రమే వీడియోలను తొలగిస్తున్నాయి.
పెరిగిన ముప్పు
ఈ తరహా సైబర్ నేరాలు రాబోయే రోజుల్లో మరింత పెరిగే ప్రమాదం ఉందని నిపుణులు హెచ్చరిస్తున్నారు. కేవలం వ్యూస్, లైకుల కోసం ఇతరుల ప్రైవసీని దెబ్బతీయడం నేరంగా పరిగణించాలని బాధితులు డిమాండ్ చేస్తున్నారు. ప్రభుత్వం స్పందించి కఠినమైన నిబంధనలు తీసుకురాకపోతే బయటకు వెళ్లడమే మహిళలకు శాపంగా మారుతుందని ఆందోళన వ్యక్తం చేస్తున్నారు. టెక్నాలజీ పెరిగే కొద్దీ ఇలాంటి ముప్పులు కూడా పొంచి ఉంటున్నాయని ఈ ఘటనలు నిరూపిస్తున్నాయి.
