- ఫోర్బ్స్ జాబితాలో 35 మందికి చోటు
- గణిత శాస్త్రంపై పట్టుతోనే పురోగతి
- బిలియనీర్ల ప్రపంచంలో యువత హవా
- ఏఐతో విప్లవం… జెన్ జెడ్ కిరీటం
- సృజనాత్మకతకు పట్టం కట్టిన తరం
సహనం వందే, హైదరాబాద్:
ప్రపంచ ఆర్థిక వేదికపై ఇప్పుడు అనూహ్యమైన మార్పు చోటు చేసుకుంది. 30 ఏళ్ల వయసు నిండకముందే వేల కోట్ల సామ్రాజ్యాలను శాసిస్తున్న యువ బిలియనీర్ల సంఖ్య రికార్డు స్థాయికి చేరింది. కృత్రిమ మేధస్సు, వంశపారంపర్యంగా అందిన ఆస్తుల కలయికతో ఈ కొత్త తరం కుబేరులు పాతతరం రికార్డులను తిరగరాస్తున్నారు. సాంకేతికత, సంప్రదాయ వ్యాపారాల మధ్య సమతుల్యత పాటిస్తూ వీరు ప్రపంచ మార్కెట్లను కొత్త దిశగా నడిపిస్తున్నారు.
ఏఐ సృష్టించిన కొత్త సంపద
ప్రస్తుతం ముప్పై ఏళ్ల లోపు బిలియనీర్ల సంఖ్య 35 గా ఉంది. ప్రపంచ బిలియనీర్లలో వీరు ఒక శాతం వాటాను కలిగి ఉన్నారు. వీరిలో 12 మంది సొంతంగా ఎదిగిన వారు కాగా… మెజారిటీ వారసత్వ సంపన్నులే. ఈ 35 మంది యువకుల మొత్తం ఆస్తి విలువ 7.72 లక్షల కోట్ల రూపాయలు. విద్యా నేపథ్యం, గణిత శాస్త్రంపై పట్టు ఈ యువతను ప్రపంచ మార్కెట్లలో కీలక శక్తిగా మార్చింది. ఏఐ, కోడింగ్ రంగాలు వీరిని అతి తక్కువ కాలంలోనే అపర కుబేరులుగా నిలబెట్టాయి.
మేధస్సుతో రికార్డులు
22 ఏళ్ల సూర్య మిధా, బ్రెండన్ ఫుడీ, ఆదర్శ్ హిరేమత్ స్వయంకృషితో ఎదిగిన యువ మేధావులు. ఏఐ రిక్రూటింగ్ స్టార్టప్ మెర్కార్ ద్వారా ఒక్కొక్కరూ 18,370 కోట్ల రూపాయల సంపదను కూడగట్టారు. మార్క్ జుకర్బర్గ్ పేరిట ఉన్న రికార్డును వీరు అధిగమించడం విశేషం. భారతీయ మూలాలున్న ఆదర్శ్ హిరేమత్ వంటి వారు ప్రపంచ స్థాయి యూనివర్సిటీల్లో చదువును ఆపేసి మరీ వ్యాపారాల్లోకి దూకడం ఇప్పుడు చర్చనీయాంశంగా మారింది.
ప్రెడిక్షన్ మార్కెట్లలో జోరు
కాల్షీ వ్యవస్థాపకులు తారక్ మన్సూర్, లూనా లోపెస్ లారా 29 ఏళ్ల వయసులోనే 10,848 కోట్ల రూపాయల ఆస్తులను సంపాదించారు. వీరి సంస్థ విలువ 91,850 కోట్ల రూపాయలను దాటింది. లూనా లోపెస్ లారా ప్రపంచంలోనే అత్యంత పిన్న వయస్కురాలైన స్వయంకృషి మహిళా బిలియనీర్. ఎంఐటి నుంచి పట్టా పొందిన వీరు గణితం, ఖగోళ శాస్త్రంపై పట్టుతో ప్రెడిక్షన్ మార్కెట్లలో సంచలనం సృష్టిస్తున్నారు.
వారసత్వ సంపద ప్రభావం
యూరప్, బ్రెజిల్ దేశాల్లో వారసత్వ సంపద ప్రభావం బలంగా కనిపిస్తోంది. బ్రెజిల్కు చెందిన 20 ఏళ్ల అమెలీ వోయిట్ త్రెజెస్, తాత స్థాపించిన డబ్ల్యూఈజీ కంపెనీ ద్వారా 9,185 కోట్ల రూపాయల ఆస్తితో అతి పిన్న వయస్కురాలైన బిలియనీర్గా నిలిచారు. యోహన్నెస్ వోన్ బౌంబాక్ 55,110 కోట్ల రూపాయల ఆస్తులతో ఆ తర్వాతి స్థానంలో ఉన్నారు. ఫార్మా, ఇండస్ట్రియల్ రంగాల వారసులుగా వీరు ప్రపంచ కుబేరుల జాబితాలో స్థానం దక్కించుకున్నారు.
సాంకేతికతలో సరికొత్త పోకడలు
పాకిస్థాన్కు చెందిన సులే అసిఫ్ కర్సర్ ఏఐ సాఫ్ట్వేర్ ద్వారా గుర్తింపు పొందారు. ఫాబియన్ హెదిన్, మైఖేల్ ట్రూయల్, అమన్ సాంగర్, అర్విద్ లున్నెమార్క్ వంటి వారు ఏఐ సాంకేతికతతో వేగంగా వృద్ధి చెందారు. వీరి కర్సర్ సంస్థ విలువ 2.44 లక్షల కోట్ల రూపాయలకు చేరుకుంది. విద్యా నేపథ్యం, గణిత శాస్త్రంపై పట్టు ఈ యువతను ప్రపంచ మార్కెట్లలో కీలక శక్తిగా మార్చింది.
వ్యాపార రంగంలో నూతన సమీకరణాలు
కెటిరీనా, మాక్సిమిలియన్, ఫ్రాంజ్ వోన్ బౌంబాక్ ఫార్మా రంగం ద్వారా 55,110 కోట్ల రూపాయల విలువైన ఆస్తులను కలిగి ఉన్నారు. లూకా, క్లెమెంటే డెల్ వెక్కియో కళ్లద్దాల సామ్రాజ్యం ఎస్సిలర్ లక్సోటికా ద్వారా 56,776 కోట్ల రూపాయల సంపదను సొంతం చేసుకున్నారు. కిమ్ జంగ్ మిన్, లీవియా వోయిట్ వంటి వారు కూడా ఇదే జాబితాలో ఉన్నారు.
బొల్లోజు రవి, సీనియర్ జర్నలిస్ట్
