సిటీ డ్రీమ్… రిచ్ గేమ్ – కోటి దాటిన ఇళ్లనే కొంటున్న ధనవంతులు

• హైదరాబాద్ నగర నివాసం లగ్జరీమయం
• 2025లో 38,403 ఇళ్ల అమ్మకాల రికార్డ్
• నైట్ ఫ్రాంక్ నివేదికలో ఆసక్తికర అంశాలు
• రంగారెడ్డి, మేడ్చల్ జిల్లాల్లో విక్రయాల జోరు
• సంగారెడ్డి జిల్లాలో భూముల ధరలకు రెక్కలు
• పెద్దలకు స్వర్గం… పేదల బతుకు దారుణం

సహనం వందే, హైదరాబాద్:

భాగ్యనగర రియల్ ఎస్టేట్ రంగం దేశంలోనే తన ఆధిపత్యాన్ని చాటుకుంటోంది. ఇతర ప్రధాన నగరాల్లో అమ్మకాలు తగ్గుతున్నా… హైదరాబాద్ లో మాత్రం ఇళ్ల కొనుగోళ్లు జోరుగా సాగుతున్నాయి. విలాసవంతమైన ఇళ్లకు గిరాకీ పెరగడంతో పాటు ధరలు కూడా సామాన్యులకు అందనంత ఎత్తుకు చేరుతున్నాయి. నైట్ ఫ్రాంక్ ఇండియా తాజా నివేదిక ప్రకారం నగర రియల్ రంగం కొత్త పుంతలు తొక్కుతోంది.

ఇళ్ల విక్రయాల జోరు…
హైదరాబాద్ నగరం 2025 సంవత్సరంలో అద్భుతమైన వృద్ధిని కనబరిచింది. ఏడాది మొత్తం మీద 38,403 ఇళ్లు అమ్ముడయ్యాయి. 2024 ఏడాదితో పోలిస్తే ఇది 4 శాతం పెరుగుదల కావడం విశేషం. ముఖ్యంగా జూలై నుంచి డిసెంబర్ మధ్య కాలంలో అమ్మకాలు గణనీయంగా పెరిగాయి. దేశంలోని 8 ప్రధాన నగరాల్లో కలిపి అమ్మకాలు ఒక శాతం తగ్గినా.. హైదరాబాదులో పెరగడం నగర ప్రాధాన్యతను తెలుపుతోంది.

కోటి దాటిన ఇళ్లకే క్రేజ్
నగరంలో ప్రస్తుతం ఇళ్లు కొనే వారి అభిరుచి పూర్తిగా మారిపోయింది. కోటి రూపాయల కంటే ఎక్కువ ధర కలిగిన విలాసవంతమైన ఇళ్లకే ఇప్పుడు గిరాకీ ఎక్కువగా ఉంది. మొదటిసారిగా ఈ తరహా ఇళ్లు మార్కెట్లో 50 శాతం వాటాను దక్కించుకున్నాయి. 2025 ద్వితీయార్ధంలో లగ్జరీ ఇళ్ల అమ్మకాలు ఏకంగా 71 శాతం మేర పెరగడం గమనార్హం. ధనవంతులు, ఐటీ ఉద్యోగులు విలాసవంతమైన జీవనానికి మొగ్గు చూపుతున్నారు.

చుక్కల్లో ధరలు.. సామాన్యుడికి భారం
ఇళ్ల అమ్మకాలు బాగున్నా… ధరలు మాత్రం సామాన్యుడికి గుదిబండగా మారాయి. నగరంలో ఇళ్ల సగటు ధర సుమారు 13 శాతం మేర పెరిగింది. ప్రస్తుతం చదరపు అడుగు ధర దాదాపు 6,721 రూపాయలుగా ఉంది. దీనివల్ల 50 లక్షల రూపాయల లోపు ఇళ్ల అమ్మకాలు భారీగా పడిపోయాయి. మధ్యతరగతి, పేద వర్గాలకు ఇల్లు అనేది ఒక కలగానే మిగిలిపోయేలా ఉంది. మార్కెట్ మొత్తం ధనవంతుల చుట్టూనే తిరుగుతోంది.

జిల్లాల వారీగా విక్రయాలు
హైదరాబాద్ రియల్ ఎస్టేట్లో రంగారెడ్డి, మేడ్చల్-మల్కాజిగిరి జిల్లాలు అగ్రస్థానంలో కొనసాగుతున్నాయి. ఐటీ కారిడార్, అనుసంధాన మార్గాల వల్ల ఇక్కడ అమ్మకాలు ఎక్కువగా ఉన్నాయి. మరోవైపు రీజనల్ రింగ్ రోడ్డు ప్రకటనతో సంగారెడ్డి జిల్లాలో భూముల ధరలకు రెక్కలు వచ్చాయి. అక్కడ ఏకంగా 21 శాతం మేర ధరలు పెరగడం విశేషం. భవిష్యత్తులో ఈ ప్రాంతం కూడా పెద్ద రియల్ హబ్ గా మారనుంది.

కార్యాలయాల అద్దెల్లో వృద్ధి
ఇళ్లే కాకుండా కార్యాలయ స్థలాలకు కూడా డిమాండ్ భారీగా పెరిగింది. నగరంలో మొత్తం 1.14 కోట్ల చదరపు అడుగుల కార్యాలయ స్థలం లీజుకు వెళ్లింది. వీటిలో సగానికి పైగా గ్లోబల్ కేపబిలిటీ సెంటర్ల వాటా ఉండటం విశేషం. కార్యాలయాల అద్దె ధరల్లో కూడా సగటున 10 శాతం వృద్ధి కనిపిస్తోంది. పెద్ద పెద్ద కంపెనీలు తమ కార్యాలయాలను హైదరాబాద్ కు తరలిస్తుండటమే దీనికి ప్రధాన కారణం.

పెట్టుబడిదారులకు స్వర్గధామం
హైదరాబాద్ రియల్ మార్కెట్ పెట్టుబడిదారులను ఆకర్షిస్తోంది. హఫీజ్ పేట వంటి ప్రాంతాల్లో కార్యాలయ స్థలాలపై పెట్టుబడి పెడితే నెలకు చదరపు అడుగుకు 45 రూపాయల వరకు అద్దె వస్తోంది. దీనికి బ్యాంకు రుణాలు కూడా లభిస్తుండటంతో సామాన్య పెట్టుబడిదారులు కూడా ఆసక్తి చూపుతున్నారు. రియల్ రంగం ఇలాగే ముందుకు సాగితే హైదరాబాద్ దేశంలోనే నంబర్ వన్ రియల్ ఎస్టేట్ గమ్యస్థానంగా మారుతుందనడంలో సందేహం లేదు.