- మదురోకు మద్దతుగా ఉద్యోగుల ర్యాలీలు
- అధ్యక్షుడిని విడుదల చేయాలని డిమాండ్
- కొత్త ప్రభుత్వాన్ని పట్టించుకోని నిరసనకారులు
- మదురో అరెస్టుపై సంబరాలు చేస్తే దాడులే
- ‘కలెక్టివోస్’ సాయుధ పౌర బృందాల హల్ చల్
- సైన్యంలో అంతర్గత తిరుగుబాటు
- అమెరికా పత్రిక ‘న్యూయార్క్ టైమ్స్’ వెల్లడి
సహనం వందే, వెనిజులా:
వెనిజులాలో ఇప్పుడు వింత పరిస్థితి నెలకొంది. పాత అధ్యక్షుడు మదురో అమెరికా చెరలో ఉన్నా… కొత్త ప్రభుత్వం కొలువుదీరినా.. అసలు అధికారం ఎవరి చేతిలో ఉందో అర్థం కావడం లేదు. కాగితాల మీద కొత్త ప్రభుత్వం ఉన్నా… వీధుల్లో మాత్రం మదురో మనుషులదే రాజ్యం నడుస్తోంది. దీనివల్ల దేశం ఒకేసారి రెండు ప్రభుత్వాల మధ్య నలిగిపోతోంది. ఈ అధికార పోరు ఇప్పుడు రక్తపాతానికి దారితీస్తోంది.
వ్యవస్థల్లో పాతుకుపోయిన మదురో వర్గం
నికోలస్ మదురో సుదీర్ఘ కాలం అధికారంలో ఉండటంతో అన్ని వ్యవస్థల్లో తన మనుషులనే నియమించుకున్నారు. ప్రస్తుతం అమెరికా అనుకూల ప్రభుత్వం అధికారంలో ఉన్నప్పటికీ… కీలకమైన ప్రభుత్వ కార్యాలయాల్లోని ఉద్యోగులు, ఉన్నతాధికారులు ఇప్పటికీ మదురోకే విధేయులుగా ఉన్నారు. అందుకే మదురోకు అనుకూలంగా జరిగే దేశవ్యాప్త ప్రదర్శనలలో ప్రభుత్వ అధికారులే నేరుగా పాల్గొంటున్నారు. తమకు జీతాలు ఇచ్చి, ఇన్ని ఏళ్లు అండగా ఉన్న నేత కోసం వారు వీధుల్లోకి వస్తున్నారు. ఇది కొత్త ప్రభుత్వానికి పెద్ద సవాలుగా మారింది.
సాయుధ గ్యాంగ్ల వీరవిహారం
మదురో పాలనలో ‘కలెక్టివోస్’ అని పిలిచే సాయుధ పౌర బృందాలు తయారయ్యాయి. వీరికి ప్రభుత్వం ఆయుధాలు ఇచ్చి పెంచి పోషించింది. ఇప్పుడు మదురో అరెస్టు కావడంతో ఈ సాయుధ ముఠాలు రోడ్లపైకి వచ్చాయి. వీరికి కొత్త ప్రభుత్వ ఆదేశాలతో సంబంధం లేదు. మదురో అరెస్టును ఎవరైనా సమర్థిస్తే వారిపై భౌతిక దాడులకు దిగుతున్నారు. పోలీసు వ్యవస్థలో కూడా ఒక వర్గం వీరికి సహకరిస్తుండటంతో కొత్త ప్రభుత్వం వీరిని అదుపు చేయలేకపోతోంది.
రాజధానిలో గెరిల్లా వాతావరణం
కారకాస్ నగరంలో ఇప్పుడు గెరిల్లా యుద్ధం తరహా వాతావరణం ఉంది. పగలు కొత్త ప్రభుత్వ పహారా ఉంటే… రాత్రి పూట మదురో అనుచరుల ఆధిపత్యం నడుస్తోంది. మదురో అరెస్టును సంబరంగా జరుపుకున్న సామాన్యులను గుర్తించి వారి ఇళ్లపై దాడులు చేస్తున్నారు. ప్రభుత్వ ఉద్యోగులు సైతం తమ కార్యాలయాల్లో మదురో ఫోటోలు తొలగించడానికి భయపడుతున్నారు. తొలగిస్తే తమ ప్రాణాలకే ముప్పు వస్తుందని ఆందోళన చెందుతున్నారు. దీనివల్ల పాలన పూర్తిగా స్తంభించిపోయింది.
సైన్యంలో చీలిక… తీరని ముప్పు
వెనిజులా సైన్యం ఇప్పుడు రెండుగా విడిపోయింది. ఉన్నత స్థాయి జనరల్స్ మదురో వల్ల లబ్ధి పొందిన వారు కావడంతో ఆయన పక్షాన నిలుస్తున్నారు. కింది స్థాయి సైనికులు మాత్రం కొత్త ప్రభుత్వం వైపు చూస్తున్నారు. ఈ చీలిక వల్ల దేశంలో అంతర్గత యుద్ధం వచ్చే ప్రమాదం కనిపిస్తోంది. ప్రభుత్వ విభాగాల్లో పని చేసే వేలాది మంది ఉద్యోగులు వీధుల్లోకి వచ్చి మదురో విడుదల కోసం నిరసన తెలపడం వెనుక సైన్యంలోని ఒక వర్గం అండదండలు ఉన్నాయని నిఘా వర్గాలు చెబుతున్నాయి.
అమెరికా వ్యూహంపై ప్రతిఘటన
అమెరికా అనుకూల ప్రభుత్వం అధికారంలోకి రావడం వెనుక విదేశీ కుట్ర ఉందనే ప్రచారాన్ని మదురో అనుచరులు బలంగా ప్రజల్లోకి తీసుకెళ్తున్నారు. తమ దేశాన్ని అమెరికా కాలనీగా మార్చాలని చూస్తున్నారని వారు వాదిస్తున్నారు. ఈ సెంటిమెంటును రగిల్చి ప్రభుత్వ ఉద్యోగులను, సామాన్యులను తమ వైపు తిప్పుకుంటున్నారు. ఫలితంగా ప్రభుత్వం మారినా, పాత పాలన తాలూకు నీడలు దేశాన్ని వీడటం లేదు. అధికారుల నిరసన ప్రదర్శనలు అంతర్జాతీయంగా కొత్త ప్రభుత్వానికి ఇబ్బందికరంగా మారాయి.
అగమ్యగోచరంగా దేశ భవిష్యత్తు
రెండు శక్తుల మధ్య పోరాటం వెనిజులాను నాశనం చేస్తోంది. కొత్త ప్రభుత్వం పట్టు సాధించాలంటే పాత వ్యవస్థలను పూర్తిగా ప్రక్షాళన చేయాలి. కానీ అది అంత సులభం కాదు. లక్షల సంఖ్యలో ఉన్న మదురో అనుచరులు, సాయుధ గ్యాంగ్లను ఎదుర్కోవడం పెద్ద సమస్యగా మారింది. అటు అమెరికా ఒత్తిడి, ఇటు స్థానిక నిరసనల మధ్య దేశం కొట్టుమిట్టాడుతోంది. ఈ గందరగోళం తొలగి సాధారణ స్థితి ఎప్పుడు వస్తుందో ఎవరికీ తెలియని పరిస్థితి నెలకొంది.
