- రేపటి నుంచి పిల్లలకు సోషల్ మీడియా బ్రేక్
- పిల్లలల్లో పెను మార్పులు తీసుకొచ్చే దిశగా…
- అమలు తీరుపై ప్రపంచ దేశాల ఆసక్తి
- 10 లక్షల మంది పిల్లలకు సోషల్ కట్
- ఫేస్బుక్, ఇన్స్టాగ్రామ్, యూట్యూబ్, ఎక్స్ నో
సహనం వందే, ఆస్ట్రేలియా:
పిల్లల జీవితాల్లో పెను మార్పులు తీసుకొచ్చే దిశగా ఆస్ట్రేలియా ప్రభుత్వం ఒక చారిత్రక నిర్ణయం తీసుకుంది. ఇకపై దేశంలో 16 ఏళ్లలోపు వయసున్న చిన్నారులు ఎవరూ సోషల్ మీడియా ఖాతాలను కలిగి ఉండకూడదు. ఈ కీలక నిబంధన బుధవారం నుంచే అమలులోకి రాబోతోంది. నిజానికి ఈ చట్టాన్ని ఏడాది క్రితమే ఆమోదించినప్పటికీ సోషల్ మీడియా వ్యసనం, దానితో ముడిపడిన రిస్కులనుంచి పిల్లలను రక్షించాలనే ప్రభుత్వ లక్ష్యం ఇప్పుడు వాస్తవరూపం దాల్చనుంది. ప్రస్తుతం 13 నుంచి 15 ఏళ్ల వయసు కలిగిన టీనేజర్లు స్నాప్చాట్, ఇన్స్టాగ్రామ్, టిక్టాక్లలో కలిపి సుమారు 10 లక్షల మందికి పైగా క్రియాశీలక వినియోగదారులుగా ఉన్నారు. ఈ కొత్త ఆంక్షల కారణంగా ఈ సంఖ్య భారీగా తగ్గడం ఖాయంగా కనిపిస్తోంది.
ఆస్ట్రేలియాపై ఎదురుచూస్తున్న ప్రపంచ దేశాలు
ఆస్ట్రేలియా తీసుకున్న ఈ సాహసోపేత నిర్ణయం పట్ల ప్రపంచవ్యాప్తంగా ప్రభుత్వాలు, పరిశోధకులు ఆసక్తిగా గమనిస్తున్నారు. భవిష్యత్తులో డెన్మార్క్, యూరోపియన్ యూనియన్, మలేషియా వంటి దేశాలకు కూడా ఈ విధానం ఒక మార్గదర్శకంగా మారే అవకాశం ఉంది. ఈ చట్టం కింద ఫేస్బుక్, ఇన్స్టాగ్రామ్, రెడిట్, స్నాప్చాట్, టిక్టాక్, యూట్యూబ్, ఎక్స్ వంటి ప్రధాన వేదికలన్నింటికీ నిషేధం వర్తిస్తుంది. అయితే డిస్కార్డ్, వాట్సాప్, యూట్యూబ్ కిడ్స్ వంటి వాటిని సందేశాలు, గేమింగ్ కోసం మాత్రమే వినియోగిస్తున్నారని భావించి ప్రస్తుతానికి మినహాయింపునిచ్చారు. ఈ చట్టం విజయవంతమైతే ప్రపంచవ్యాప్తంగా పిల్లల ఆన్లైన్ జీవితాలు పూర్తిగా మారిపోవడం తథ్యం.
టెక్ కంపెనీలదే పూర్తి బాధ్యత!
ఈ కొత్త నిబంధనల అమలులో కంపెనీలపైనే పెనుభారం పడింది. 16 ఏళ్ల లోపు వినియోగదారుల ఖాతాలను డీయాక్టివేట్ చేయాల్సిన పూర్తి బాధ్యత ఆయా సంస్థలదేనని చట్టం స్పష్టం చేస్తోంది. కేవలం యూజర్ స్వయంగా ప్రకటించిన వయసుపైనే కాకుండా వయసును అంచనా వేసే అధునాతన సాంకేతికతలను (ఏజ్ ఎస్టిమేషన్ టెక్నాలజీస్) కూడా ఉపయోగించాల్సి ఉంటుంది. ముఖ లేదా వాయిస్ విశ్లేషణ, పాఠశాల సమయాల్లో వారి కార్యకలాపాలు, ఇతరులతో సంభాషించే తీరు వంటి అనేక అంశాలను పరిగణనలోకి తీసుకుని వయసును నిర్ధారించాల్సి ఉంటుంది. ఈ కఠిన నిబంధన వెనుక పిల్లల మనస్తత్వంపై సామాజిక మాధ్యమాల ప్రతికూల ప్రభావమే ప్రధాన కారణం.
టీనేజర్ల లోకం… అడ్డదారులు!
మెల్బోర్న్ శివార్లలో నివసించే టీనేజర్ల అలవాట్లు నేటితరం పిల్లల పరిస్థితిని స్పష్టంగా తెలియజేస్తున్నాయి. 15 ఏళ్ల లూకా హాగాప్ కేవలం ఒకే వారంలో ఇన్స్టాగ్రామ్లో 34 గంటలకు పైగా గడిపేశాడు. ఇతరులతో మాట్లాడటానికి ఫోన్ నంబర్ బదులు స్నాప్చాట్నే వాడుతున్న 14 ఏళ్ల అమేలీ టామ్లిన్సన్ వంటి ఎందరో పిల్లలున్నారు. అయితే ప్రభుత్వం ఎన్ని కఠిన నిబంధనలు తీసుకొచ్చినా అది తమ జీవితాలను పెద్దగా మార్చదని టీనేజర్లలో చాలామంది ఏకమవుతున్నారు. 16 ఏళ్లలోపు పిల్లలు తమ వయసును దాచి లేదా తల్లిదండ్రుల వివరాలు ఉపయోగించి అడ్డదారిలో ఖాతాలను సృష్టించుకునే అవకాశం ఉందని చెబుతున్నారు. సాంకేతికత ముందు చట్టాలు ఎంతవరకు పని చేస్తాయో వేచి చూడాలి. ఈ నిర్ణయం తల్లిదండ్రులకు ఒక రకంగా ఊరటనిచ్చినట్టే.
