- దేశంలోనే అత్యధిక జీతం పొందే బ్యాంకర్
- బోనస్ సహా మొదటి ఏడాది చేతికి 43 కోట్లు
సహనం వందే, న్యూఢిల్లీ:
రోజుకి ఎంత సంపాదిస్తే నెలకు లక్ష రూపాయలు వస్తాయి అని మనం లెక్కలు వేసుకుంటూ ఉంటాం. కానీ ఒక బ్యాంక్ సీఈఓ జీతం నెలకు దాదాపు మూడు కోట్ల రూపాయలు అంటే మీరు నమ్ముతారా? అసలు బ్యాంక్ ఉద్యోగులకు ఇంత భారీ స్థాయిలో జీతాలు ఇవ్వడం వెనుక ఉన్న అసలు సీక్రెట్ ఏంటి? భారతదేశంలోనే అత్యంత ప్రతిష్టాత్మకమైన హెచ్‌డీఎఫ్‌సీ బ్యాంక్ తమ కొత్త సారథికి ఎలాంటి ప్యాకేజీ ఆఫర్ చేసిందో తెలిస్తే మీ మైండ్ బ్లాంక్ అవ్వాల్సిందే. ఆ విస్తుపోయే విశేషాలు ఏంటో ఇప్పుడు చూద్దాం.
ప్రతిపాదనకు ఆర్‌బీఐ ఆమోదం
భారతదేశంలోనే అతిపెద్ద ప్రైవేట్ రంగ బ్యాంక్ అయిన హెచ్‌డీఎఫ్‌సీ త్వరలోనే ఒక కొత్త అధ్యాయానికి శ్రీకారం చుట్టబోతోంది. ఈ బ్యాంక్ కొత్త మేనేజింగ్ డైరెక్టర్, సీఈఓగా బాధ్యతలు స్వీకరించడానికి అనూప్ బాగ్చీ సిద్ధమయ్యారు. ఆయనకు సంవత్సరానికి ఏకంగా రూ. 36 కోట్ల వార్షిక వేతనాన్ని అందించాలని ప్రతిపాదించారు. ఈ ప్రతిపాదనకు ఆమోదం లభిస్తే భారత బ్యాంకింగ్ చరిత్రలోనే అత్యధిక జీతం పొందే సీఈఓగా ఆయన సరికొత్త రికార్డును నెలకొల్పుతారు. ఈ ప్రతిపాదిత ప్యాకేజీకి సంబంధించి ఇప్పటికే ఆర్‌బీఐ నుండి అవసరమైన అనుమతులు లభించినట్లు సమాచారం.
కళ్ళు చెదిరే జాయినింగ్ బోనస్
అనూప్ బాగ్చీ బ్యాంక్‌లో చేరే సందర్భంలో ఒకేసారి పొందే వన్ టైమ్ జాయినింగ్ బోనస్ కూడా చాలా భారీగా ఉంది. ఆయనకు రూ. 7.35 కోట్ల విలువైన స్టాక్ ఆధారిత జాయినింగ్ బోనస్‌ను ఇవ్వాలని బ్యాంక్ నిర్ణయించింది. అంటే తన మొదటి సంవత్సరంలో అన్ని రకాల ప్రయోజనాలతో కలిపి ఆయన ఏకంగా రూ. 43.24 కోట్ల వరకు అందుకునే అవకాశం ఉంది.
ఐసీఐసీఐ బ్యాంక్‌లో అపార అనుభవం
ఐసీఐసీఐ బ్యాంక్‌లో సుదీర్ఘ కాలం పాటు పనిచేసి ఆ రంగంలో అపారమైన అనుభవం సంపాదించిన వెటరన్ బ్యాంకర్ అనూప్ బాగ్చీ. బ్యాంకింగ్ విభాగంలో డిజిటల్ విప్లవం తీసుకురావడంలో, నెట్‌వర్క్ విస్తరణలో ఆయన చూపిన చాకచక్యం బ్యాంకింగ్ వర్గాల్లో మంచి పేరు తెచ్చిపెట్టింది. అందుకే హెచ్‌డీఎఫ్‌సీ బ్యాంక్ ఆయన అనుభవాన్ని, నైపుణ్యాన్ని గుర్తించి ఈ స్థాయిలో ఆఫర్ ఇచ్చినట్లు తెలుస్తోంది.
నాయకత్వాన్ని ఆకర్షించేందుకే భారీ ప్యాకేజీలు
ప్రస్తుతం భారతదేశంలోని ప్రధాన ప్రైవేట్ బ్యాంకులైన ఐసీఐసీఐ, యాక్సిస్, కొటక్ మహీంద్రా వంటి సంస్థల సారథుల కంటే హెచ్‌డీఎఫ్‌సీ బ్యాంక్ తమ కొత్త అధిపతికి అత్యధిక ప్రాధాన్యతతో పాటు భారీ ప్యాకేజీని కేటాయించింది. బ్యాంకింగ్ రంగంలో మారుతున్న సాంకేతిక మార్పులు, పెరుగుతున్న పోటీ వాతావరణంలో పెద్ద బ్యాంక్‌ను లాభాల బాటలో సమర్థవంతంగా నడిపించడం చాలా సవాలుతో కూడుకున్న పని. అత్యున్నత నాయకత్వ ప్రతిభ కలిగిన వ్యక్తులను ఆకర్షించడానికి, నిలబెట్టుకోవడానికి బ్యాంకింగ్ రంగాలు ఈ తరహా భారీ వేతనాలను కేటాయిస్తుంటాయి. ఈ నెల 27న ఆయన అధికారికంగా హెచ్‌డీఎఫ్‌సీ బ్యాంక్ మేనేజింగ్ డైరెక్టర్, సీఈఓగా బాధ్యతలు స్వీకరించనున్నారు.
