బీసీ కోటా… కోర్టుల్లో రగడ – 42 శాతం రిజర్వేషన్లపై సుప్రీంలో సవాల్

ఎంపీటీసీ, జడ్పీటీసీ, గ్రామ పంచాయతీ ఎన్నికలకు సంబంధించి అధికారులు ఐదు దశల్లో నిర్వహించేందుకు షెడ్యూల్‌ను ప్రకటించినప్పటికీ ఈ రిజర్వేషన్ల వివాదం ఎన్నికల భవితవ్యంపై తీవ్ర ప్రభావం చూపే అవకాశం ఉంది.

గవర్నర్‌ వద్ద పెండింగ్‌లో చట్టం…
బీసీ రిజర్వేషన్లను పెంచేందుకు రాష్ట్ర ప్రభుత్వం తీసుకువచ్చిన చట్టం గవర్నర్ వద్ద ఇంకా పెండింగ్‌లో ఉండటం ఈ వివాదానికి మరింత బలం చేకూర్చింది. అసెంబ్లీ తీర్మానంపై గవర్నర్ నుంచి ఎలాంటి నిర్ణయం రాకముందే ప్రభుత్వం జీవో విడుదల చేయడంపై కూడా న్యాయపరమైన చర్చ నడుస్తోంది. ఈ నేపథ్యంలోనే ప్రభుత్వం విడుదల చేసిన జీవో చెల్లదనే వాదన వినిపిస్తోంది. ఈ అంశంపై హైకోర్టు కూడా గతంలోనే ప్రభుత్వాన్ని ప్రశ్నించింది. ఎన్నికల నోటిఫికేషన్ విడుదలకు కొంత సమయం ఆగాలని ఆదేశించినప్పటికీ రాష్ట్ర ఎన్నికల కమిషన్ ముందుకు వెళ్లి షెడ్యూల్‌ను విడుదల చేసింది.

హైకోర్టులోనూ విచారణ…
ఒకవైపు సుప్రీంకోర్టులో పిటిషన్ దాఖలు కాగా… మరోవైపు బీసీ రిజర్వేషన్లపై మాధవరెడ్డి దాఖలు చేసిన పిటిషన్ పై తెలంగాణ హైకోర్టు సైతం ఈనెల 8వ తేదీన తిరిగి విచారణ జరపనుంది. జీవో నంబర్ 9 ద్వారా 42 శాతం బీసీ రిజర్వేషన్లు అమలు చేయాలన్న ప్రభుత్వ నిర్ణయంపై న్యాయస్థానాలు ఏం చెప్పబోతున్నాయనేది ఇప్పుడు మిలియన్ డాలర్ల ప్రశ్న. ఈ జీవో అమలుకు కోర్టులు పచ్చజెండా ఊపుతాయా లేక బ్రేకులు వేస్తాయా అనే ఉత్కంఠ ఆశావహుల్లో… రాజకీయ వర్గాల్లో నెలకొంది. సుప్రీంకోర్టులో విచారణకు రావడంతో స్థానిక సంస్థల ఎన్నికల నిర్వహణపై సస్పెన్స్ మరింత పెరిగింది. రిజర్వేషన్ల అంశం తేలేదాకా ఎన్నికలు జరుగుతాయా లేదా అనే ఆందోళన రాజకీయ ఉత్కంఠను పెంచుతోంది.