రాహుల్ జెన్ జెడ్ ప్రకంపనలు – నేపాల్ ఉద్యమాన్ని ప్రతిబింబించేలా ట్వీట్

బంగ్లా స్ఫూర్తి కూడా ఉందా?
బంగ్లాదేశ్‌లోనూ విద్యార్థి సంఘాలు, ఇస్లామిక్ సంస్థలు పెద్ద ఎత్తున నిరసనలు చేసి షేక్ హసీనాను గద్దె దించారు. ఈ రెండు దేశాల్లో జెన్ జెడ్ పాత్ర విశేషమైంది. రాహుల్ గాంధీ భారత్‌లోనూ అలాంటి వాతావరణం రావాలని కోరుకుంటున్నారా అనే ప్రశ్నను బీజేపీ మద్దతుదారులు లేవనెత్తుతున్నారు. ఇదిలా ఉండగా రాహుల్ గాంధీ ఎన్నికల వ్యవస్థపై ఆరోపణలు చేశారు. కర్ణాటకలోని అలంద్ నియోజకవర్గంలో 6 వేల ఓట్లు తొలగించారని ఆయన విమర్శించారు. ప్రత్యేక సాఫ్ట్‌వేర్ సాయంతో కాంగ్రెస్ బలంగా ఉన్న ప్రాంతాల్లో ఓటర్ల పేర్లు తొలగిస్తున్నారని, నకిలీ లాగిన్‌లు, బయట రాష్ట్రాల నుంచి వచ్చిన ఫోన్ నంబర్లను ఉపయోగిస్తున్నారని ఆరోపించారు. రాహుల్ చేసిన ఆరోపణలను ఎన్నికల సంఘం పూర్తిగా కొట్టిపారేసింది. ఆధారాలు లేని ఆరోపణలతో ప్రజలను తప్పుదోవ పట్టిస్తున్నారని స్పష్టం చేసింది. బీజేపీ నేతలు కూడా ఇదే స్వరం వినిపిస్తూ ఓటమి భయంతో రాహుల్ ఇలా మాట్లాడుతున్నారని అన్నారు.

రాహుల్ కొత్త వ్యూహమా?
ఈ వాదోపవాదాల మధ్య రాహుల్ ట్వీట్ ప్రత్యేక ఆకర్షణగా మారింది. యువత, విద్యార్థులు, జెన్ జెడ్ తరం రాజ్యాంగాన్ని కాపాడతారని ఆయన విశ్వాసం వ్యక్తం చేశారు. ఓటు దొంగతనాన్ని ఆపగల శక్తి వారికే ఉందని, తాను ఎల్లప్పుడూ వారి పక్కనే ఉంటానని ప్రకటించారు. రాహుల్ గాంధీ జెన్ జెడ్ పై ఇంత నమ్మకం ఉంచడం ఆయన రాజకీయ వ్యూహంలో భాగమా లేక యాదృచ్ఛికమా అనే సందేహం పెరుగుతోంది. ఇదంతా చూసి బీజేపీ నేతలు మండిపడుతున్నారు. దేశాన్ని నేపాల్, బంగ్లాదేశ్‌లా కల్లోలంలోకి నెట్టాలనే ఉద్దేశంతోనే రాహుల్ జెన్ జెడ్ ప్రస్తావించారని ఆరోపిస్తున్నారు. రాహుల్ వ్యాఖ్యలు మరింత దూకుడైన రాజకీయ యుద్ధానికి నాంది పలికే అవకాశం కనిపిస్తోంది. ఇప్పుడు ఈ యువత ప్రపంచంలోని ప్రభుత్వాల అవినీతి, అణచివేత ధోరణులకు వ్యతిరేకంగా పోరాడుతున్నారు. దీన్ని గమనించే రాహుల్ గాంధీ ట్వీట్ చేసినట్లు రాజకీయ వర్గాలు విశ్లేషిస్తున్నాయి.