గురువుల పాఠమే ‘విజయ’ పీఠం – మాస్టార్లకు ఎంపీ అప్పలనాయుడు సన్మానం

• స్వయంగా ఇంటికి వెళ్లి కాళ్లకు నమస్కారం
• ఎంత ఎత్తుకు ఎదిగినా ఒదిగిపోయిన ఎంపీ
• ఆయన సంస్కారానికి ఆశ్చర్యపోయిన జనం

సహనం వందే, రణస్థలం:
విజయనగరం ఎంపీగా ఉన్నత స్థాయికి ఎదిగినప్పటికీ అప్పలనాయుడు తన గురువులను ఏమాత్రం మర్చిపోలేదు. రోజువారీ బిజీగా ఉన్నప్పటికీ తనకు విద్యాబుద్ధులు నేర్పిన మాస్టార్లను గౌరవించడం మానలేదు.‌ గురువులు నేర్పిన పాఠమే తను ‘విజయ’నగరం ఎంపీ స్థాయికి ఎదగడానికి తోడ్పడిందని ఆయన సగర్వంగా ప్రకటించారు. ఎంపీ కలిశెట్టి అప్పలనాయుడు గురు పూజోత్సవం రోజున శుక్రవారం తనకు తొలి అక్షరాలు దిద్దిన గురువులను మర్చిపోని నిరాడంబరతను ప్రదర్శించారు. రణస్థలం మండలంలో ఉన్న తన ఆది గురువులు మేడూరి సత్యనారాయణ, ఎంఎస్ఎన్ మూర్తి, ఎస్.సత్యవతి దంపతులను వారి స్వగృహంలో కలిసి ఆశీస్సులు తీసుకున్నారు. ఈ సందర్భంగా వారి పాదాలకు నమస్కరించి వినయంతో కూడిన శిష్యుడిగా మారిపోయారు.

గురువుల ఆనందం
తమ ప్రియమైన శిష్యుడు తమను కలిసేందుకు రావడంతో గురువులు ఆనందంతో ఉప్పొంగిపోయారు. ఈ దృశ్యం చూసి చుట్టూ ఉన్నవారు కూడా భావోద్వేగానికి లోనయ్యారు. అప్పలనాయుడు తన గురువులను శాలువాతో సత్కరించి పట్టు వస్త్రాలు సమర్పించారు.

‘నా జీవితంలో ఈ రోజు చాలా ప్రాముఖ్యత కలిగిన రోజు. నాకు విద్యను బోధించి, నన్ను ఈ స్థాయికి తీర్చిదిద్దిన నా గురువులకు కృతజ్ఞతలు. గురువులు లేకుంటే నేను లేను’ అని భావోద్వేగంగా మాట్లాడారు. తమ శిష్యుడి విజయం పట్ల ఆనందం వ్యక్తం చేసిన గురువులు ఆయన మరింత ఉన్నత స్థాయికి ఎదగాలని ఆశీర్వదించారు.

ఆదర్శవంతమైన శిష్యుడు…
ఈ సంఘటన నేటి తరానికి ఒక స్ఫూర్తిదాయక సందేశాన్ని ఇచ్చింది. జీవితంలో ఎన్ని ఉన్నత శిఖరాలను అధిరోహించినా తమ తొలి గురువులను గౌరవించడం, వారి ఆశీస్సులు పొందడం ఎంత ముఖ్యమో ఇది తెలియజేస్తుంది. రాజకీయ నాయకులకు, యువతకు అప్పలనాయుడు చేసిన ఈ పని ఒక ఆదర్శంగా నిలిచింది. ఇది కేవలం ఉపాధ్యాయ దినోత్సవ శుభాకాంక్షలు మాత్రమే కాదు, గురు-శిష్య సంబంధానికి ఒక నిలువుటద్దంలా నిలిచింది. ఈ పలకరింపు గురు-శిష్యుల మధ్య ఉన్న పవిత్ర బంధాన్ని మరింత బలపరిచిందని చెప్పవచ్చు.