యుద్ధభూమిలో భారత్ ప్రచండ శక్తి – ప్రపంచంలో నాలుగో స్థానం

• సైనిక రంగంలో ఇండియా సత్తా
• అమెరికా, రష్యా, చైనా తర్వాత మనమే

సహనం వందే, హైదరాబాద్:
ప్రపంచంలో రోజురోజుకు పెరుగుతున్న ఉద్రిక్తతలు, భద్రతా సవాళ్లతో దేశాలు తమ సైనిక శక్తిని పెంచుకునేందుకు తీవ్రంగా ప్రయత్నిస్తున్నాయి. ఈ నేపథ్యంలో గ్లోబల్ ఫైర్‌పవర్ 2025 నివేదిక ప్రపంచంలోని అగ్రశ్రేణి సైనిక శక్తి కలిగిన దేశాల వివరాలను వెల్లడించింది. ముఖ్యంగా ఈ జాబితాలో భారత్ నాలుగో స్థానంలో నిలిచి అంతర్జాతీయంగా తన ప్రాధాన్యతను చాటుకుంది. ఈ నివేదిక ప్రకారం అగ్రగామి దేశాల సైనిక బలం, రక్షణ బడ్జెట్‌లు, ఆధునిక ఆయుధాల వివరాలు చాలా ఆసక్తికరంగా ఉన్నాయి.

అగ్రస్థానంలో అమెరికా తిరుగులేని బలం…
ప్రపంచంలో అత్యంత శక్తివంతమైన సైనిక శక్తిగా అమెరికా మొదటి స్థానంలో ఉంది. రక్షణ రంగంపై అమెరికా ఏకంగా 895 బిలియన్ డాలర్ల బడ్జెట్‌ను కేటాయిస్తుంది. సుమారు 21 లక్షల మందికి పైగా సైనికులతో పాటు, 13,209 విమానాలు, 4,640 ట్యాంకులు కలిగి ఉంది. ఇందులో 983 అత్యాధునిక యుద్ధ హెలికాప్టర్లు కూడా ఉన్నాయి. అమెరికా అధునాతన సాంకేతిక పరిజ్ఞానం, భారీ ఆర్థిక వనరులు దాని సైనిక సామర్థ్యాన్ని అజేయంగా నిలిపాయి.

రష్యా వారసత్వం… చైనా పెట్టుబడుల హోరు
రెండో స్థానంలో రష్యా తన సైనిక వారసత్వాన్ని కొనసాగిస్తోంది. ఈ దేశం రక్షణ కోసం 126 బిలియన్ డాలర్లు ఖర్చు చేస్తోంది. 35 లక్షలకు పైగా సైనికులు, 4,292 విమానాలు, 5,750 ట్యాంకులతో రష్యా ప్రపంచానికి సవాలు విసురుతోంది. ఇక భారీగా పెట్టుబడులు పెడుతున్న చైనా మూడో స్థానంలో నిలిచింది. రక్షణ కోసం ఏటా 266.8 బిలియన్ డాలర్లు వెచ్చిస్తోంది. 31 లక్షలకు పైగా సైనికులతో పాటు, 3,304 విమానాలు, 5,000 ట్యాంకులు చైనా సైనిక బలానికి నిదర్శనం.

భారత్ సత్తా, ఆధునీకరణ మార్గం
డిజిటలైజేషన్, స్వదేశీ రక్షణ పరిశ్రమను బలోపేతం చేస్తున్న భారత్ నాలుగో అతిపెద్ద సైనిక శక్తిగా నిలిచింది. 2025-26 ఆర్థిక సంవత్సరంలో రక్షణకు 86.1 బిలియన్ డాలర్లు కేటాయించింది. భారత్ వద్ద 51 లక్షల మందికి పైగా సైనికులు, 2,216 విమానాలు, 4,614 ట్యాంకులు, 295 నౌకా ఆస్తులు ఉన్నాయి. భారతదేశం తన సైనిక శక్తిని నిరంతరం పెంచుకుంటూ, ప్రపంచ యుద్ధభూమిలో తమ స్థానాన్ని పటిష్టం చేసుకుంటోంది.

తర్వాత దక్షిణ కొరియా, యూకే, ఫ్రాన్స్…
అత్యాధునిక యుద్ధ సాంకేతికతలో ఆరితేరిన దక్షిణ కొరియా ఐదో స్థానంలో ఉంది. ఈ దేశం వద్ద 38 లక్షలకు పైగా సైనికులు, 1,592 విమానాలు, 2,236 ట్యాంకులు ఉన్నాయి. రక్షణ బడ్జెట్ 46.3 బిలియన్ డాలర్లు. ఇక ఆరో స్థానంలో ఉన్న యునైటెడ్ కింగ్‌డమ్ రక్షణకు 71.5 బిలియన్ డాలర్లు ఖర్చు చేస్తూ, సమర్థవంతమైన వాయుసేనతో తన స్థానాన్ని నిలబెట్టుకుంది. ఏడో స్థానంలో ఉన్న ఫ్రాన్స్, యూరప్ ఖండంలో అగ్రగామిగా ఉంది. ఈ దేశం 55 బిలియన్ డాలర్ల రక్షణ బడ్జెట్‌తో 3.76 లక్షల మంది సైనికులు, 976 విమానాలు, 215 ట్యాంకులను కలిగి ఉంది. ఈ దేశాలన్నీ రక్షణ రంగంలో తమ బలాన్ని పెంచుకుంటూ, ప్రపంచ భద్రతా దృశ్యాన్ని మార్చేస్తున్నాయి.