దిక్కులేని దీనులు… ‘మహా’ విద్యార్థులు – మహావీర్ మెడికల్ కాలేజీలో పరిస్థితి ఘోరం

• వార్డుల్లో రోగులు లేకుండానే వైద్య బోధన
• ఖాళీ మంచాలతో దర్శనమిస్తున్న వార్డులు
• చదువు చెప్తారా? సర్టిఫికెట్లిచ్చి పంపుతారా?
• విద్యార్థులకు ద్రోహం చేస్తున్న యాజమాన్యం
• ఇక్కడ చదువుకొని వైద్యం ఎలా చేయాలి?
• ఎన్ఎంసీ అక్రమాలకు పరాకాష్ట ఈ కాలేజ్
• డబ్బా కాలేజీకి అనుమతులెలా వచ్చాయి?
• ప్రతిరోజూ నకిలీ రోగులను తెస్తున్నారు
• ‘సహనం వందే’ మెడికల్ కాలేజీ సందర్శన

వికారాబాద్ నుంచి ‘సహనం వందే’ ప్రతినిధి:
వికారాబాద్ మహావీర్ మెడికల్ కాలేజీ అనుబంధ ఆసుపత్రిని పరిశీలిస్తే దీనికి ఇన్నాళ్లు ఎలా అనుమతులు వచ్చాయా అన్న అనుమానాలు తలెత్తుతాయి. జాతీయ మెడికల్ కమిషన్ (ఎన్ఎంసీ) కళ్ళు మూసుకుని ముడుపులు పుచ్చుకొని బాజాప్తా అనుమతులు ఇచ్చినట్లు అర్థం

అవుతుంది. ఈ స్టోరీని చదువుతున్న వాళ్ళు ఎవరైనా ఒక్కసారి అక్కడికి వెళ్లి చూడండి… లేదా ఈ ఆర్టికల్ తోపాటు పెడుతున్న వీడియోలను చూడండి. దానికి అనుమతులు ఇవ్వడం న్యాయమా లేదా మీరే నిర్ణయించండి. (ఈ ఆర్టికల్ తో పాటు నేను పెడుతున్న ఒపీనియన్ పోల్ లో ఆన్ లైన్ ఓటు వేయండి)

బూత్ బంగ్లాగా బోధనాసుపత్రి…
సోమవారం అంటే సహజంగా ఆసుపత్రులు రోగులతో కిటకిటలాడుతాయి. మరీ ప్రత్యేకంగా ప్రస్తుత వానాకాలం సీజన్లో రోగుల సంఖ్య ఎక్కువగా ఉంటుంది. అలాంటిది మహావీర్ మెడికల్ కాలేజీ బోధనాసుపత్రికి వెళితే అందుకు విరుద్ధమైన పరిస్థితి కనిపిస్తుంది. ఈ కాలేజీని ‘సహనం వందే’ డిజిటల్ పేపర్ బృందం సోమవారం ఉదయం 10 గంటల నుంచి మధ్యాహ్నం 2 గంటల వరకు అణువణువూ పరిశీలించింది.

ఇక అనేక స్పెషాలిటీల అధిపతుల గదులకు తాళాలు వేసి ఉన్నాయి. అంతేకాదు వార్డుల్లో ట్రీట్మెంట్ రూమ్ చెత్తాచెదారంతో ఎలాంటి పరికరాలు లేకుండా కనిపిస్తుంది. అసలు ఏ వార్డు తిరిగినా… ఎక్కడ పరిశీలించినా బీపీ మిషన్ వంటి పరికరాలు కూడా కనిపించలేదంటే ఆశ్చర్యమే మరి. అక్కడ ఒక డాక్టర్ తో మాట్లాడగా… బీపీ మిషన్ పక్కన పెట్టండి కనీసం కొన్ని వార్డుల్లో దూది కూడా లేదని వ్యాఖ్యానించడం పరిస్థితికి దర్పణం పడుతుంది.

మేం గమనించిన అంశాలు…
సోమవారం ఉదయం 11 గంటల సమయంలో…

• జనరల్ సర్జరీ మేల్ వార్డు ఒక దానికి తాళం వేసి ఉంటే… మరొక వార్డులో ఒకతను సెల్ ఫోన్ చూసుకుంటూ కనిపించారు. అతను పేషెంట్ కాదని అర్థం అయిపోతుంది. పక్కన ఎక్కడ కూడా సెలైన్ ఎక్కించినట్టుగానీ… ట్రీట్మెంట్ చేస్తున్నట్టుగానే కనిపించలేదు.
• పీడియాట్రిక్ వార్డులో ఒక్క పిల్లవాడు కూడా లేకపోగా… మంచాలన్నీ ఒకదాని మీద ఒకటి వేశారు. దాన్ని వాడక ఎన్నాళ్ళయిందో మరి.
• జనరల్ మెడిసిన్ ఫిమేల్ వార్డు అత్యంత దయనీయంగా ఉంది. పాడుబడిన బంగ్లాలా కనిపించింది. ఉదయం 11:30 సమయంలో వీడియో తీస్తే అది అత్యంత చీకటిలో ఉన్నట్లు కనిపించింది. దాన్ని వాడక ఎన్నాళ్ళయిందో మరి.
• ఆర్థోపెడిక్ మేల్ వార్డుకు తాళం వేసి ఉంది.
• జనరల్ మెడిసిన్ మేల్ వార్డులో ఒక్క రోగి కూడా లేరు.
• జనరల్ సర్జరీ ఫిమేల్ వార్డులో ఒక మహిళ కనిపించారు.
• రెస్పిరిటరీ ఫిమేల్ వార్డులో ఒక్కరూ లేరు.
• ఆప్తమాలజీ, డెర్మిటాలజీ ఫిమేల్, సైకియాట్రి మేల్ వార్డుల్లో ఒక్క రోగి కూడా లేరు.
• మెడికల్ కాలేజీలో లైబ్రరీలో పుస్తకాలు, మ్యాగజైన్స్ కనిపించలేదు. కొందరు విద్యార్థులు అక్కడ పిచ్చాపాటి మాట్లాడుకుంటున్నారు.

(రేపటి ఎడిషన్ లో: మహావీర్ మెడికల్ కాలేజీలో లక్షలు, కోట్లు ఖర్చుపెట్టి విద్యార్థులను చేర్పిస్తే అక్కడ నేర్పిస్తున్నది ఏంటి? దీనిపై సమగ్ర వివరాలతో కథనం)