జైలు నుంచి సీఎం

• అదే ఊహల్లో బీఆర్ఎస్ నాయకురాలు కవిత
• జగన్, రేవంత్, కేసీఆర్, బాబులు జైలు పక్షులే
• తెలంగాణలో కొత్త పార్టీ యోచనలో కవిత

సహనం వందే, హైదరాబాద్:

భారత రాజకీయాల్లో జైలు జీవితం అనేక మంది నాయకులకు అనూహ్య అవకాశాలు కల్పించింది. ఇటీవల కాలంలో జైలుకు వెళ్లి వచ్చిన నాయకుల పట్ల ప్రజల్లో సానుభూతి పెరుగుతుండటం గమనార్హం. రాజకీయ పోరాటాలు, అవినీతి ఆరోపణలు… కారణం ఏదైనా వారికి బ్రహ్మరథం పడుతున్నారు. జైలుకు వెళ్లడం ఒక అర్హతగా భావించేవారు కూడా ఉన్నారు. ఈ నేపథ్యంలో బీఆర్ఎస్ నాయకురాలు కల్వకుంట్ల కవిత జైలు నుంచి విడుదలైన తర్వాత కొత్త పార్టీ పెట్టే ఆలోచనలో ఉన్నారని, తెలంగాణ ముఖ్యమంత్రి కావాలనే పట్టుదలతో ఉన్నారని ప్రచారం జరుగుతోంది.

జైలు నుంచి సీఎం వరకు…

• ఎం. భక్తవత్సలం: ఉప్పు సత్యాగ్రహం, క్విట్ ఇండియా ఉద్యమంలో జైలు శిక్ష. 1963-67లో మద్రాసు రాష్ట్ర ముఖ్యమంత్రి.
• జ్ఞానీ జైల్ సింగ్: స్వాతంత్ర్య ఉద్యమంలో జైలు. 1972-77లో పంజాబ్ ముఖ్యమంత్రి, తర్వాత రాష్ట్రపతి.
• కేసీఆర్: తెలంగాణ ఉద్యమం కోసం 2009లో ఆమరణ దీక్ష. ఖమ్మం జైలులో దీక్ష కొనసాగించి, 2014లో తెలంగాణ ముఖ్యమంత్రి అయ్యారు.
• రేవంత్ రెడ్డి: 2015లో ఓటుకు నోటు కేసులో అరెస్టై చర్లపల్లి జైలులో ఒక నెల గడిపారు. 2023లో తెలంగాణ ముఖ్యమంత్రి.
• వై.ఎస్. జగన్: అక్రమాస్తుల కేసులో 2012లో సీబీఐ అరెస్టు, చంచల్‌గూడ జైలులో 16 నెలలు. 2019లో ఆంధ్రప్రదేశ్ ముఖ్యమంత్రి.
• చంద్రబాబు నాయుడు: స్కిల్ స్కామ్ కేసులో
  2023లో సీఐడీ అరెస్టు. రాజమండ్రి జైలులో 52 రోజులు. 2024లో ఆంధ్రప్రదేశ్ ముఖ్యమంత్రి. నాలుగో సారి ముఖ్యమంత్రి కావడానికి ఈ జైలు జీవితం ఆయనకు సానుభూతి పెంచింది.
• హేమంత్ సోరెన్: భూకుంభకోణం 2024లో ఈడీ అరెస్టు, 149 రోజుల జైలు జీవితం. జూలై 2024లో జార్ఖండ్ ముఖ్యమంత్రిగా తిరిగి బాధ్యతలు.
• కల్వకుంట్ల కవిత: కొత్త ప్రయాణం.
  2024లో ఢిల్లీ మద్యం కుంభకోణంలో అరెస్టై, తీహార్ జైలులో 165 రోజులు. ఆగస్టులో బెయిల్‌పై విడుదల. తెలంగాణ సీఎం కావాలనే లక్ష్యంతో కొత్త పార్టీ ఏర్పాటు ప్రయత్నాలు.

సానుభూతి లేదా రాజకీయ ఆయుధం?
జైలు శిక్ష తర్వాత ప్రజల సానుభూతితో రాజకీయంగా ఎదిగిన నాయకులు భారత రాజకీయాల్లో సర్వ సాధారణం. ఉద్యమాలు, అవినీతి ఆరోపణలు జైలు జీవితానికి కారణమైనా ఈ ధోరణి కొనసాగుతోంది. కవిత వంటి నాయకులు కొత్త అవకాశాలను సృష్టించుకునే అవకాశం ఉంది.