- దేశవ్యాప్తంగా సంచలనం సృష్టించిన మహిళ
- తాజాగా రాజ్యసభ సభ్యురాలిగా ప్రమాణం
- తన స్నేహితురాలు అరుంధతితో ప్రేమ బంధం
- పార్లమెంటులో తన బంధాన్ని ప్రకటించిన స్త్రీ
- ఆక్స్ఫర్డ్, హార్వర్డ్ యూనివర్సిటీల్లో విద్య
- ఆ తర్వాత వారిద్దరూ సుప్రీంకోర్టు అడ్వకేట్లు
- పోరాడి కోర్టులో గెలిచిన లెస్బియన్ జంట వీరే
- ఇద్దరు మహిళల ప్రేమకు పార్లమెంటే సాక్ష్యం
- బెంగాల్ సీఎం మమత ఇచ్చిన భరోసా
సహనం వందే, న్యూఢిల్లీ:
ప్రేమకు భాష లేదు… కానీ ఆ ప్రేమను గుర్తించని చట్టాలకు మాత్రం కఠినమైన భాష ఉంటుంది. ఇద్దరు మహిళలు ఒకరినొకరు ఇష్టపడటం ఈ సమాజంలో ఎంతటి నేరమో, ఆ చీకటి గదుల్లో దాచుకున్న కన్నీళ్లకు ఎంతటి భారమో మేనక గురుస్వామికి, అరుంధతి కాట్జూకు బాగా తెలుసు. అందుకే వారు కేవలం ఒక జంటగా కాకుండా ఒక సైన్యంగా మారి సుప్రీంకోర్టు గడప తొక్కారు. తమలాంటి లక్షలాది మంది లెస్బియన్లు, గేల జీవితాల్లో వెలుగు నింపిన ఆమె ఇప్పుడు దేశపు తొలి ‘క్వీర్’ ఎంపీగా పార్లమెంటులో అడుగుపెట్టారు.
క్వీర్ అంటే?
వీరిద్దరూ మహిళలు. ఒక మహిళ మరొక మహిళను ఇష్టపడితే వారిని లెస్బియన్ (Lesbian) అని పిలుస్తారు. ‘క్వీర్’ అనేది ఇలాంటి భిన్నమైన లైంగిక గుర్తింపులు ఉన్నవారందరినీ కలిపి పిలిచే ఒక సాధారణ పదం. ఇక్కడ మేనక గురుస్వామి ఒక మహిళగా ఉంటూ మరొక మహిళ (అరుంధతి)తో ప్రేమలో ఉన్నానని బహిరంగంగా ప్రకటించినందున ఆమెను ‘తొలి క్వీర్ ఎంపీ’ అని పిలుస్తున్నారు.
అర్ధరాత్రి వెలుగులు
జీవితంలో మనం ఎవరిని ప్రేమిస్తున్నాం అన్నది మన వ్యక్తిగత స్వేచ్ఛ. కానీ మేనక గురుస్వామి, అరుంధతి కాట్జూల విషయంలో అది ఒక దేశవ్యాప్త విప్లవంగా మారింది. తాము లెస్బియన్లమని, ఒకరినొకరు ప్రేమిస్తున్నామని లోకానికి ధైర్యంగా చాటిన ఈ జంట… 2018లో సెక్షన్ 377 అనే సంకెళ్లను తెంచేలా సుప్రీంకోర్టును ఒప్పించారు. మాజీ దౌత్యవేత్త వివేక్ కాట్జూ తన కుమార్తె అరుంధతిని, ఆమె భాగస్వామి మేనకను అంగీకరిస్తూ రాసిన మాటలు ప్రతి తండ్రిని ఆలోచింపజేశాయి. ఈ మహిళా జంట గెలుపు కోట్లాది మంది ఆత్మగౌరవానికి నిదర్శనం.
రాజ్యసభలో రాజ్యాంగ గళం
పశ్చిమ బెంగాల్ నుంచి మమతా బెనర్జీ మేనకను రాజ్యసభకు పంపడం ఒక సామాజిక అస్త్రం వంటిది. రాజ్యసభ చైర్మన్ సీపీ రాధాకృష్ణన్ సమక్షంలో ఈనెల 7వ తేదీన మేనక ప్రమాణ స్వీకారం చేస్తుంటే అది ఒక విలక్షణమైన గుర్తింపునకు దక్కిన గౌరవంలా అనిపించింది. 19 మంది సభ్యులలో ఆమె ప్రస్థానం ప్రత్యేకం. ఒక మహిళగా, ఒక లెస్బియన్గా తన అస్తిత్వాన్ని రాజ్యాంగబద్ధంగా చాటుకున్న మేనక ఇప్పుడు శాసనకర్తగా కొత్త బాధ్యతలు చేపట్టారు. 2019లో ప్రపంచంలోని 100 మంది అత్యంత ప్రభావవంతమైన మేధావుల్లో ఒకరిగా నిలిచిన ఆమె మేధస్సు ఇప్పుడు సభకు బలం.
ఆక్స్ఫర్డ్, హార్వర్డ్ యూనివర్సిటీల్లో విద్య
మేనక కేవలం పోరాటాలకే పరిమితం కాలేదు. ఆమె పబ్లిక్ పాలసీ అనలిస్ట్ మోహన్ గురుస్వామి కుమార్తె. ఆక్స్ఫర్డ్, హార్వర్డ్ వంటి ప్రపంచ స్థాయి సంస్థల్లో ఆమె విద్యనభ్యసించారు. రోడ్స్ స్కాలర్గా, గామన్ ఫెలోగా తన ప్రతిభను చాటుకున్నారు. కొలంబియా లా స్కూల్లో అంబేద్కర్ రీసెర్చ్ స్కాలర్గా పాఠాలు బోధించారు. 1997లో అశోక్ దేశాయ్ వద్ద ప్రారంభమైన ఆమె న్యాయ ప్రస్థానం నేడు పార్లమెంటుకు చేరింది. ఆక్స్ఫర్డ్లోని రోడ్స్ హౌస్లో ఆమె చిత్రపటం ఉండటం ఆమె అంతర్జాతీయ ఖ్యాతికి నిదర్శనం.
జై బంగ్లా.. జై సంవిధాన్
కోల్కతా ధర్నా వేదికపై మేనక వినిపించిన మాటలు పాలకులను హెచ్చరించేలా ఉన్నాయి. ‘జై బంగ్లా’, ‘జై సంవిధాన్’ అంటూ ఆమె తన రాజకీయ గొంతును వినిపించారు. బ్రిటీష్ పాలన పోయినా వారు తెచ్చిన వివక్షా చట్టాలు ఇంకా ఉన్నాయని ఆమె గుర్తుచేశారు. కుల, మత, లింగ వివక్ష లేకుండా ప్రతి పౌరుడికి సమానత్వం ఉండాలని, అదే రాజ్యాంగం మనకిచ్చిన వరమని ఆమె ఉద్ఘాటించారు. కేవలం న్యాయవాదిగా కాకుండా ప్రజాప్రతినిధిగా ఇప్పుడు ఆమె ప్రజల ఓటు హక్కుల కోసం యుద్ధం ప్రకటించారు.
ఓటు హక్కుపై సమరం
బెంగాల్లో సుమారు 60 లక్షల మంది ప్రజల ఓటు హక్కు ప్రమాదంలో పడనుందని మేనక ఆవేదన వ్యక్తం చేశారు. ప్రజల ప్రాథమిక హక్కులను కాలరాస్తే సహించేది లేదని స్పష్టం చేశారు. సుప్రీంకోర్టు నుండి వీధుల వరకు ఈ పోరాటం కొనసాగుతుందని హెచ్చరించారు. తన హృదయంలో కేవలం భారత రాజ్యాంగం మాత్రమే ఉందని ఆమె గంభీరంగా చెప్పారు. సమాజం ఛీత్కరించిన ఒక వర్గానికి ప్రాతినిధ్యం వహిస్తూ కోట్లాది మంది సామాన్యుల హక్కుల కోసం ఆమె చేస్తున్న ఈ ప్రయాణం భారత ప్రజాస్వామ్యానికి కొత్త దిశను చూపిస్తోంది.
