- బాడీని హ్యాక్ చేస్తున్న నేటి తరం
- సూపర్ ఫుడ్స్ గోల… నిపుణులు లేని లీల
- తిండిపై యుద్ధం… రోగాలు సిద్ధం
సహనం వందే, హైదరాబాద్:
శరీరాన్ని ఒక సాఫ్ట్వేర్లా భావిస్తూ దానిని మన ఇష్టానుసారం మార్చేయడమే బయోహ్యాకింగ్ అసలు కథ. ముసలితనం రాకుండా ఉండాలని, వందేళ్లు బతకాలని అమెరికాలో టెక్ బాబులు మొదలుపెట్టిన ఈ పిచ్చి ఇప్పుడు అందరికీ పాకింది. వంటింట్లో దొరికే వాటిని మందులుగా నమ్ముతూ, ఒంటికి రకరకాల పరికరాలు తగిలించుకుని ప్రజలు వింత ప్రయోగాలు చేస్తున్నారు. శాస్త్రీయత లేని ఈ అలవాట్లు ప్రాణాల మీదకు తెచ్చేలా ఉన్నాయి.
బయోహ్యాకింగ్ అంటే ఏమిటి
మనం ఒక మొబైల్ ఫోన్ను మనకు నచ్చినట్టు ఎలాగైతే సెట్టింగ్స్ మార్చుకుంటామో మన శరీరాన్ని కూడా అలాగే మార్చవచ్చని కొందరు నమ్ముతారు. దీనినే బయోహ్యాకింగ్ అంటారు. అంటే తిండి, నిద్ర, వ్యాయామం ద్వారా మన శరీరంలోని కణాలను నియంత్రించి ఎక్కువ కాలం బతకాలని చూడటం. ఇందుకోసం 20 ఏళ్ల క్రితం ఐటీ రంగంలోని యువకులు లక్షలాది రూపాయలు ఖర్చు చేసేవారు. ఇప్పుడు అది సామాన్యుల ఇళ్లలోకి చొరబడింది. డాక్టర్లతో పనిలేకుండానే తమను తాము మేధావులుగా భావిస్తున్నారు.
వింత యంత్రాలు… ఛాంబర్లు
దీర్ఘాయువు కోసం వీరు వాడే పరికరాలు సామాన్యులకు వింతగా అనిపిస్తాయి. క్రయోజెనిక్ ఛాంబర్లు అంటే గడ్డకట్టే మంచు కంటే తక్కువ ఉష్ణోగ్రత ఉండే గదులు. అందులో నిలబడితే శరీరం రీసెట్ అవుతుందని వీరి నమ్మకం. దీనికోసం 8 లక్షల రూపాయల నుంచి 15 లక్షల రూపాయల వరకు ఖర్చు చేస్తారు. అలాగే ఇన్ఫ్రారెడ్ సానాలు అంటే కాంతి కిరణాలతో చెమట పట్టించే స్నానపు గదులు. ఈ వింత యంత్రాల కోసం కోట్లాది రూపాయలు ధారపోస్తున్నారు. ఏమీ లేని వారు కనీసం కాఫీలో వెన్న కలుపుకుని తాగుతున్నారు.
సూపర్ ఫుడ్స్ మాయాజాలం
సాధారణ ఆహారం కంటే ఎక్కువ పోషకాలు ఉంటాయని నమ్మే వాటిని సూపర్ ఫుడ్స్ అంటారు. చియా విత్తనాలు, గ్రీన్ పౌడర్లు, విదేశీ వేర్లు ఇందులో భాగం. హైదరాబాదులో ఉంటున్న ఒక టెక్ ఉద్యోగి ఇప్పుడు హిమాలయాల నుంచి వచ్చే శిలాజిత్ అనే జిగురు లాంటి పదార్థాన్ని తింటున్నారు. దీనివల్ల వయసు పెరగడం వల్ల వచ్చే సమస్యలు తగ్గుతాయని ఆమె నమ్మకం. ఇదంతా ఒక పెద్ద వ్యాపారంగా మారిపోయింది.
అదుపులేని గణాంకాల పిచ్చి
ప్రియా కృష్ణ విశ్లేషణ ప్రకారం ఇప్పుడు ప్రతి ఒక్కరూ తమ శరీరాన్ని డేటాగా చూస్తున్నారు. షుగర్ వ్యాధి లేకపోయినా చేతికి గ్లూకోజ్ మీటర్లు తగిలించుకుంటున్నారు. ప్రతి గంటకు రక్తంలో చక్కెర ఎంత ఉందో చూస్తూ భయపడుతున్నారు. వివిధ వర్గాల ప్రజలు ఇప్పుడు ఇలాంటి పరికరాలను వాడుతున్నారు. ఇదొక వ్యసనంగా మారింది. ఈ ధోరణి ఆరోగ్యానికి హానికరంగా మారుతోంది.
ప్రమాదకర బాట
వైద్యుల సలహా లేకుండానే రక్త పరీక్షలు చేయించుకోవడం, ఆన్లైన్లో దొరికే సప్లిమెంట్లు వాడటం ఇప్పుడు ఫ్యాషన్ అయిపోయింది. ఇండియాలో అనేకమంది ఇప్పుడు ఒక సైంటిస్ట్లా ఫీలవుతున్నారు. కానీ సరైన అవగాహన లేకపోతే ఈ బయోహ్యాకింగ్ ప్రాణాంతకంగా మారుతుంది. కేవలం గ్యాడ్జెట్లు చూపించే రీడింగ్స్ చూసి శరీరంతో చెలగాటం ఆడటం తగదు. అశాస్త్రీయమైన పద్ధతులతో ఆయుష్షు పెంచుకోవాలనుకోవడం కేవలం ఒక భ్రమ మాత్రమే అని నిపుణులు హెచ్చరిస్తున్నారు.
