- పాత భయాలు… కొత్త ప్రమాదాలు
- 25 ఏళ్లకు సరిగ్గా ఎర్రకోట వద్ద పేలుడు
సహనం వందే, హైదరాబాద్:
భారతదేశ భద్రతకు ఏళ్లుగా ఒకే రకమైన ముప్పు పొంచి ఉంది. అది ఉగ్రవాదం. 2000వ సంవత్సరంలో దేశ రాజధాని ఎర్రకోటపై లష్కరే తోయిబా కాల్పులు జరిపింది. ఢిల్లీ పోలీసులు పాకిస్తానీ ఉగ్రవాది అష్ఫాక్ అహ్మద్ను పట్టుకున్న నాటి నుంచి దేశంలో ఐఎస్ఐ విషపు కోరలు ఎంత లోతుగా పాతుకుపోయాయో ప్రపంచానికి తెలిసిందే. పాత ఢిల్లీలోని జామా మసీదు ప్రాంతం, హైదరాబాద్ పాతబస్తీ జిహాదీ కార్యకలాపాలకు, నకిలీ నోట్లు, పేలుడు పదార్థాలు దాచడానికి ప్రధాన కేంద్రాలుగా మారాయి. సరిగ్గా పాతికేళ్ల తర్వాత ఈనెల 10వ తేదీ అదే ఎర్రకోట వద్ద కారు పేలుడు దేశాన్ని మరోసారి ఉలికిపాటుకు గురిచేసింది.
ఢిల్లీ, హైదరాబాద్ మళ్లీ కేంద్రాలా?
నాటి దర్యాప్తుల్లో తేలిందేమిటంటే… కశ్మీర్ బయట ఢిల్లీ, హైదరాబాద్ నగరాలు ఉగ్రవాద స్థావరాలుగా మారాయి. అక్రమ ఆయుధాలు, నకిలీ కరెన్సీ, మాదకద్రవ్యాల స్మగ్లింగ్ వంటి నేర సామ్రాజ్యాన్ని నడపడానికి పాకిస్తాన్ గూఢచార సంస్థ ఇంటర్ సర్వీసెస్ ఇంటెలిజెన్స్ (ఐఎస్ఐ) ఈ నగరాలను వేదికగా వాడుకుంది. లష్కరే తోయిబా, హిజ్బుల్ ముజాహిదీన్ వంటి సంస్థల కార్యకర్తలు స్థానిక యువతను రిక్రూట్ చేసి, సురక్షిత నివాసాలను (సేఫ్ హౌస్ లు) ఏర్పాటు చేసుకున్న చారిత్రక వాస్తవాలు మన కళ్ల ముందు ఉన్నాయి. మరి ఇప్పుడు జరిగిన ఢిల్లీ కారు పేలుడు వెనుక పాత పద్ధతులే ఉన్నాయా? స్థానిక యువకులు, పాతబస్తీలోని మారుమూల సందులు… ఈ ఉగ్రవాద నెట్వర్క్కు కొత్త ముసుగులు వేసి సహకరిస్తున్నాయా? ఈ కోణంలోనే నేటి దర్యాప్తు సాగాల్సిన అవసరం ఉంది.
యువత ఉచ్చు: అంతులేని ఆపరేషన్లు
ఉగ్రవాదులకు సహకరించే సంస్థలు, స్థావరాలు పదే పదే పేర్లు మార్చుకోవడం, నిద్రాణంగా (స్లీపర్ సెల్స్) ఉన్న గ్రూపులను నిర్దిష్ట లక్ష్యాల కోసం మళ్లీ క్రియాశీలకం చేయడం నిన్నటి నుంచి నేటి వరకు భద్రతా సంస్థలకు పెను సవాలుగా ఉంది. హైదరాబాద్లో దర్సగా జిహాద్-ఓ-షహదత్ (డీజేఎస్) వంటి సంస్థలు మతపరమైన ఉద్రిక్తతలను పెంచడానికి ప్రయత్నించిన తీరు చరిత్రలో ఉంది. ఉగ్రవాదులు, వారి స్థావరాలు మారుతున్నప్పటికీ… వారికి ఆశ్రయం ఇస్తున్న అమాయక యువకులను ఆపడం పోలీసులకు సవాలుగా ఉంది. పాత ఢిల్లీ, హైదరాబాద్ పాతబస్తీలోలాగే… ఇప్పుడు దేశంలోని మరిన్ని నగరాలు ఈ క్రైమ్ యాంగిల్ లో ఉగ్రవాదులకు అడ్డాగా మారాయా? అనే భయం నేటి కారు పేలుడుతో మరోసారి బలపడుతోంది.
నిత్యం అప్రమత్తత ముఖ్యం!
ఉగ్రవాద కార్యకలాపాలను పర్యవేక్షించడానికి ప్రత్యేక టాస్క్ ఫోర్స్ ఉన్నప్పటికీ కొన్నిసార్లు సరైన ఆధారాలు లేకపోవడం చర్యలు తీసుకోలేకపోవడానికి కారణమని గతంలో అధికారులు ఒప్పుకున్నారు. మరి ఢిల్లీలో ఇంత భారీ పేలుడు జరగడానికి కారణం నిఘా వైఫల్యమేనా? నిరంతరం అప్రమత్తంగా ఉంటూ, ఉగ్రవాదుల కొత్త వ్యూహాలను, నిద్రాణంగా ఉన్న గ్రూపులను గుర్తించి వాటిని నిర్మూలించాల్సిన బాధ్యత భద్రతా సంస్థలపై ఉంది. ఢిల్లీ, హైదరాబాద్ లాంటి కీలక నగరాలు ఉగ్రవాదం, మాఫియా కార్యకలాపాలకు అడ్డాగా మారకుండా కఠిన చర్యలు తీసుకోవాల్సిన సమయం ఆసన్నమైంది.
