- మహావతార్ నరసింహతో బాక్సాఫీస్ షేక్
- కాంతారతో దక్షిణాదిలో కొత్త దైవత్వ ఫిక్షన్
- హనుమాన్ విజయం కొత్త ప్రయోగం
సహనం వందే, ముంబై:
భారతీయ చలనచిత్ర పరిశ్రమలో ఇప్పుడు ఆధ్యాత్మిక తరంగం ఉవ్వెత్తున ఎగసిపడుతోంది. హిందూ పురాణాలు, దైవత్వ అంశాలను ఆధునిక సాంకేతికతతో భారీ యాక్షన్ కోణంలో తెరకెక్కించే ట్రెండ్ ఊపందుకుంది. సమాజంలో ఆధ్యాత్మిక భావనలు, సాంస్కృతిక అవగాహన పెరుగుతున్న నేపథ్యంలో ఈ చిత్రాలు ప్రేక్షకులను ఉర్రూతలూగిస్తున్నాయి. దేవతలు, రాక్షసులు, భక్తుల కథలను హాలీవుడ్ స్థాయి సూపర్హీరో యాక్షన్తో కలిపి చూపడం బాలీవుడ్కు కొత్త ఉత్తేజాన్ని ఇస్తోంది. సమకాలీన సమస్యల్లో ఒక మార్గదర్శిని కోరుకునే ప్రేక్షకులకు ఈ సినిమాల రూపంలో దైవిక శక్తిపై ఆశ చిగురిస్తోంది. ఈ కొత్త ధోరణి భారతీయ సినీ చరిత్రలో ఓ కొత్త అధ్యాయానికి తెరతీసింది.
నరసింహుడి గర్జన… బాక్సాఫీస్ భక్తి
ఇటీవల విడుదలైన యానిమేటెడ్ చిత్రం ‘మహావతార్ నరసింహ’ ఈ ట్రెండ్కు బలమైన ఉదాహరణ. విష్ణుమూర్తి సింహరూపంలో అవతరించి భక్తులను కాపాడి, రాక్షసుడిని సంహరించే కథాంశం ఈ చిత్రంలో ఉత్తేజకరంగా చూపబడింది. మొదట్లో సాధారణ ఆదరణే ఉన్నా అనతికాలంలోనే ఈ చిత్రం బాక్సాఫీస్లో అగ్రస్థానానికి చేరుకుంది. హిందీ అనువాదం దేశవ్యాప్తంగా దాదాపు 170 రూపాయలు వసూలు చేసి రికార్డు సృష్టించింది. సినిమా హాళ్లలో యాక్షన్ సన్నివేశాలను చూస్తున్న ప్రేక్షకులు ఉద్వేగంతో చేతులు చప్పట్లు కొట్టి పులకించిపోయారు. ఈ చిత్రం భక్తి భావాన్ని, భారీ ఎంటర్టైన్మెంట్ను సమపాళ్లలో కలిపి ప్రేక్షకులను ఆకట్టుకుంది.
కాంతారతో దక్షిణాదిలో కొత్త ఊపిరి
దక్షిణాది నుంచి వచ్చి దేశవ్యాప్తంగా సంచలనం సృష్టించిన కాంతార చిత్రం దైవత్వ తరంగానికి మరింత బలాన్నిచ్చింది. దైవత్వాన్ని, సాంప్రదాయాలను, భక్తిని యాక్షన్తో అద్భుతంగా సమతుల్యం చేసి చూపిన ఈ చిత్రం ప్రేక్షకుల మనసులను మంత్రముగ్ధులను చేసింది. దర్శకుడు, నటుడు రిషబ్ శెట్టి ప్రతిభ ఈ చిత్రాన్ని దేశీయ సరిహద్దులు దాటించింది. ఈ దక్షిణ భారత సినిమా శైలి, కథనం బాలీవుడ్కు కొత్త ఉత్సాహాన్ని అందించాయి. పురాణ కథనాలను ఆధునిక పరిస్థితులకు అన్వయించి, సాంస్కృతిక అవగాహనను పెంచడంలో కాంతార ముందుంది.
హనుమాన్ విజయం కొత్త ప్రయోగం…
ప్రశాంత్ వర్మ దర్శకత్వంలో వచ్చిన హనుమాన్ చిత్రం పురాణ పాత్రను సమకాలీన సూపర్హీరోగా మలిచి యువతను విశేషంగా ఆకట్టుకుంది. తక్కువ బడ్జెట్లో నిర్మించినా ఈ చిత్రం భారీ విజయాన్ని సాధించి 200 కోట్ల రూపాయల మైలురాయిని దాటింది. హనుమంతుడి శక్తిని, భక్తిని ఉద్వేగభరితమైన యాక్షన్ సన్నివేశాలతో కలపడం ఈ సినిమాకు ప్రధాన బలం. ఈ అనూహ్య విజయం భారతీయ పురాణ కథలను భవిష్యత్ సినిమా యూనివర్స్లకు పటిష్టమైన పునాదిగా మార్చే అవకాశాన్ని సృష్టించింది. అక్షయ్ కుమార్ నటించిన రామ సేతు కూడా రామాయణ కథను ఆధునిక సాహసంతో కలిపి, ప్రేక్షకుల్లో ఆధ్యాత్మిక ఉత్తేజాన్ని రేకెత్తించింది.
భవిష్యత్తులో రామాయణం…
ప్రస్తుతం నీతేష్ తివారీ దర్శకత్వంలో రామాయణం లైవ్ యాక్షన్ చిత్రం పెద్ద ఎత్తున నిర్మాణంలో ఉంది. ఈ చిత్రం భారతీయ పురాణ ప్రపంచాన్ని మునుపెన్నడూ చూడని స్థాయిలో దృశ్యమానం చేయనుంది. ఈ వరుస విజయాలు చూస్తుంటే రాబోయే కాలంలో భారతీయ చలనచిత్ర పరిశ్రమ పురాణాలను భారీ ఎంటర్టైన్మెంట్గా మలిచి ప్రపంచవ్యాప్తంగా సాంస్కృతిక అవగాహనను పెంపొందించడం ఖాయమని స్పష్టమవుతోంది. తెరపై దేవుళ్లను చూసేందుకు ప్రేక్షకులు చూపిస్తున్న ఆసక్తిని చూస్తే సినిమా రంగానికి కనక వర్షమే కురిపిస్తుంది.
