జెన్ జెడ్ గుండెల్లో జ్వాల – అవినీతి, అక్రమాలపై ఈ చిహ్నం బ్రహ్మాస్త్రం

నేపాల్‌లో జెన్ జెడ్ తుఫాన్…
ఇండోనేషియా యువతను చూసి నేపాల్‌లోని యువత కూడా స్ఫూర్తి పొందింది. సెప్టెంబర్ 8న ప్రధాన మంత్రి కెపీ శర్మ ఒలి ప్రభుత్వం 26 సోషల్ మీడియా ప్లాట్‌ఫారమ్‌లను నిషేధించినప్పుడు అది యువత స్వేచ్ఛకు ఒక సవాలుగా భావించారు. దీంతో వేలాది మంది యువకులు, విద్యార్థులు ఖాఠ్మాండు వీధుల్లోకి వచ్చి నిరసన తెలిపారు. వారి చేతుల్లో అదే పైరేట్ టోపీ గుర్తు. 19 ఏళ్ల రోహన్ రాయ్ లాంటి యువత ఈ టోపీని అన్యాయానికి వ్యతిరేకంగా స్వేచ్ఛకు చిహ్నంగా భావించారు. ఈ నిరసనల కారణంగా 19 మంది మరణించగా 500 మంది గాయపడ్డారు. చివరకు పోలీసుల హింస కారణంగా హోం మంత్రి రమేష్ లెఖక్ రాజీనామా చేయగా, ప్రధానమంత్రి ఓలి కూడా తన పదవిని వదులుకోవాల్సి వచ్చింది. ఈ ఉద్యమం యువతకు విజయాన్ని సాధించిపెట్టింది.

ప్రపంచవ్యాప్త ప్రభావం…
ఈ ఉద్యమం కేవలం ఇండోనేషియా, నేపాల్‌కే పరిమితం కాలేదు. ఫిలిప్పీన్స్, ఫ్రాన్స్, ఇటలీ, పెరూ, మయన్మార్ దేశాల యువత కూడా ఈ పైరేట్ టోపీ గుర్తుతో తమ నిరసనలను వ్యక్తం చేస్తున్నారు. గాజా యుద్ధ సంబంధిత ప్రదర్శనల్లో కూడా ఈ చిహ్నం కనిపించింది. వన్ పీస్ కథలో హీరో లూఫీ ప్రపంచ ప్రభుత్వానికి వ్యతిరేకంగా పోరాడినట్టే, ఇప్పుడు ఈ యువత ప్రపంచంలోని ప్రభుత్వాల అవినీతి, అణచివేత ధోరణులకు వ్యతిరేకంగా పోరాడుతున్నారు. రెడ్డిట్, ఇన్‌స్టాగ్రామ్ లాంటి సోషల్ మీడియా ప్లాట్‌ఫారమ్‌లలో ఈ టోపీల చిత్రాలు వైరల్ అవుతున్నాయి. ఇది కేవలం ఒక కార్టూన్ పాత్రకు సంబంధించిన చిహ్నం కాదు. ప్రపంచవ్యాప్తంగా నిరంకుశత్వానికి వ్యతిరేకంగా యువతరం చేపట్టిన తిరుగుబాటుకు సంకేతంగా మారింది. ఈ ఉద్యమం ఇక్కడితో ఆగదని, భవిష్యత్తులో ప్రపంచ రాజకీయాలను మార్చగలదని నిపుణులు భావిస్తున్నారు.