- ఉత్తర్వులు జారీ చేసిన ఆంధ్రప్రదేశ్ సర్కార్
- సామాన్య ప్రేక్షకులకు చేదు అనుభవం…
సహనం వందే, విజయవాడ:
పవర్ స్టార్ పవన్ కల్యాణ్ నటించిన ఓజీ సినిమా బెనిఫిట్ షో , ఐదు రోజుల పాటు టికెట్ ధరల పెంపునకు ఆంధ్రప్రదేశ్ ప్రభుత్వం నుంచి అనూహ్యంగా అనుమతులు లభించాయి. సాధారణంగా సినిమా టికెట్ల ధరల పెంపుపై అడ్డుకట్ట వేసిన గత ప్రభుత్వం… ఇప్పుడు అధికారంలోకి వచ్చిన వెంటనే అదే నిబంధనలను సడలించడం రాజకీయ వర్గాల్లో చర్చనీయాంశమైంది. ఈ నిర్ణయం వెనుక సినిమా పరిశ్రమ లాభాపేక్ష కంటే అధికార కూటమిలోని ఒక కీలక వ్యక్తి ప్రయోజనాలే ప్రధాన కారణమని విమర్శకులు ఆరోపిస్తున్నారు. రాష్ట్ర రాజకీయాల్లో కీలక పాత్ర పోషిస్తున్న పవన్ కల్యాణ్ ఉప ముఖ్యమంత్రి హోదాలో ఉండగానే ఆయన సినిమాకు ఇలాంటి ప్రత్యేక రాయితీలు లభించడం సహజంగానే సందేహాలకు తావిస్తోంది. సినిమా టికెట్ల ధరల పెంపుపై గతంలో జరిగిన వాదోపవాదాలు, ఆ తరువాత వచ్చిన ప్రభుత్వ ఆదేశాలను ఈ ప్రభుత్వం ఎంత సులభంగా పక్కన పెట్టిందనేది ఇక్కడ గమనించాల్సిన విషయం.
సామాన్య ప్రేక్షకులకు చేదు అనుభవం…
పవన్ కల్యాణ్ సినిమా కోసం టికెట్ రేట్లు పెంచడం పట్ల సామాన్య ప్రేక్షకుల నుంచి తీవ్ర అసంతృప్తి వ్యక్తమవుతోంది. బెనిఫిట్ షోకు ఒక్కో టికెట్ ధర ఏకంగా వెయ్యి రూపాయలు నిర్ణయించడం సామాన్యుడి జేబుకు చిల్లు పెట్టడమే. అలాగే, ఐదు రోజుల పాటు సింగిల్ స్క్రీన్‌లో రూ. 125, మల్టీప్లెక్స్‌లో రూ. 150 వరకు పెంచుకోవచ్చని ప్రభుత్వం ఉత్తర్వులిచ్చింది. అంటే మొదటి పది రోజులు సినిమా చూసేందుకు ఒక సాధారణ కుటుంబానికి భారం తప్పదని స్పష్టమవుతోంది. గతంలో పవన్ కళ్యాణ్‌ని ప్రశ్నించిన వారే ఇప్పుడు ఆయన సినిమాకు అత్యధిక ధరలు నిర్ణయించేందుకు అనుమతులు ఇవ్వడం విచిత్రం. గత ప్రభుత్వ నిర్ణయాలను ఆనాటి ప్రతిపక్షాలు తీవ్రంగా వ్యతిరేకించాయి. కానీ ఇప్పుడు అదే ప్రతిపక్షాలు అధికారంలోకి వచ్చాక తమ స్వప్రయోజనాల కోసం నిర్ణయాలు మార్చుకోవడంపై విమర్శలు వెల్లువెత్తుతున్నాయి.
ప్రభుత్వ వైఖరిలో మార్పు…
సినిమాటోగ్రఫీ మంత్రిగా, ఉప ముఖ్యమంత్రిగా పవన్ కల్యాణ్ ఇప్పుడు అధికారం చెలాయిస్తున్నారు. ఈ కీలక సమయంలో ఆయన సినిమాకు ఇలాంటి రాయితీలు లభించడం సహజంగానే చర్చకు దారి తీసింది. సినిమా పరిశ్రమలో ఇతరుల చిత్రాలకు ఇలాంటి వెసులుబాట్లు కల్పిస్తారా అనే ప్రశ్న ఇప్పుడు బలంగా వినిపిస్తోంది. ప్రజాస్వామ్య ప్రభుత్వంలో ప్రజలందరికీ సమాన అవకాశాలు ఉండాలి. కానీ ప్రస్తుత నిర్ణయాలు సినిమా రంగంలో ఒక వర్గానికి మాత్రమే అనుకూలంగా ఉన్నాయనే భావన కలుగుతోంది. సామాన్యుడి వినోదాన్ని కూడా వ్యాపార లాభాపేక్షకు బలి చేయడమే ఈ ప్రభుత్వ లక్ష్యమా అని ప్రతిపక్షాలు ఇప్పటికే ప్రశ్నిస్తున్నాయి. సినిమా టికెట్ల విషయంలో ఒకే ప్రమాణాన్ని అనుసరించకుండా ప్రముఖుల చిత్రాలకు ఒకలా, సాధారణ చిత్రాలకు మరొకలా వ్యవహరించడం పారదర్శకతకు విఘాతమని పరిశీలకులు అభిప్రాయపడుతున్నారు.
