ఈ బిల్లు అప్పుడుంటే…’మహాత్ముడూ ప్రధానిగా అనర్హుడే’

• నెహ్రూ… పటేల్… వాజపేయి…అద్వానీ కూడా
• ‘నెల జైలు’ నిబంధనతో వీరంతా అనర్హులే
• స్వాతంత్ర సమరయోధులంతా నేరస్తులేనా?
• ఆరేళ్లు జైలులో ఉన్న మహాత్మా గాంధీ
• 9 ఏళ్ళు జైలు జీవితం గడిపిన నెహ్రూ
• పటేల్ నాలుగేళ్లు… సావర్కర్ 11 ఏళ్లు జైలు
• వాజ్ పాయ్, అద్వానీ ఇద్దరూ 19 నెలల జైలు
• ప్రజా పోరాటాలు పదవులకు ఆటంకాలు

సహనం వందే, హైదరాబాద్:
దేశం కోసం జైలుకు వెళ్లిన మహనీయులు… ప్రజాస్వామ్యం కోసం పోరాడిన యోధులు… చివరకు చిన్నపాటి కేసుల్లో అరెస్టయిన ముఖ్యమంత్రులు… ఇలా ఎందరో భారత రాజకీయ చరిత్రలో జైలు శిక్ష అనుభవించిన వారే. అలాంటి వారందరినీ ఒక బిల్లుతో పదవుల నుంచి అనర్హులుగా ప్రకటించవచ్చని కేంద్రంలోని ఎన్డీఏ ప్రభుత్వం తీసుకొచ్చిన కొత్త బిల్లు ఇప్పుడు తీవ్ర దుమారానికి కారణమవుతోంది. ఏదైనా కేసులో నెల రోజులు జైలులో ఉంటే ప్రధానమంత్రి, ముఖ్యమంత్రి లేదా మంత్రులను పదవి నుంచి తొలగించే ఈ బిల్లుపై ప్రతిపక్షాలు తీవ్ర అభ్యంతరం వ్యక్తం చేస్తున్నాయి. ఈ బిల్లు ప్రజాస్వామ్యానికి, రాజ్యాంగానికి వ్యతిరేకమని, ప్రతిపక్షాలను అణచివేయడానికి బీజేపీ అధికార దుర్వినియోగం చేస్తోందని విమర్శలు వెల్లువెత్తుతున్నాయి.

జైలు శిక్ష అనుభవించిన మహానాయకులు…
ఈ బిల్లు కనుక ఆనాడే అమలై ఉంటే దేశ చరిత్రనే మారిపోయేది. భారత స్వాతంత్ర్యం కోసం నిరంతరం పోరాడిన మహాత్మా గాంధీ, జవహర్‌లాల్ నెహ్రూ, సర్దార్ వల్లభాయ్ పటేల్ వంటి నేతలు కూడా పదవులకు అనర్హులయ్యేవారు. స్వాతంత్ర్య పోరాటంలో భాగంగా మహాత్మా గాంధీ దాదాపు ఆరేళ్లు, నెహ్రూ తొమ్మిదేళ్లు, పటేల్ నాలుగేళ్లు జైలులో గడిపారు. ఈ జాబితాలో భగత్ సింగ్, వీర సావర్కర్ వంటివారు కూడా ఉన్నారు. సావర్కర్ ఏకంగా 11 ఏళ్లు జైలు జీవితం గడిపారు. కేవలం స్వాతంత్ర్య పోరాటం మాత్రమే కాకుండా, ప్రజాస్వామ్య పునరుద్ధరణ కోసం 1975-77 మధ్య ఎమర్జెన్సీ సమయంలో పోరాడిన నాయకులు కూడా ఉన్నారు. అప్పటి ప్రధాని ఇందిరా గాంధీకి వ్యతిరేకంగా పోరాడిన అటల్ బిహారీ వాజ్‌పాయ్, లాల్ కృష్ణ అద్వానీ వంటి వారు దాదాపు 19 నెలలు జైలు శిక్ష అనుభవించారు.

అవినీతి కేసుల పేరుతో రాజకీయ కుట్రలు
ప్రస్తుత బిల్లు ప్రకారం నెల రోజులు జైలు శిక్ష అనుభవించిన నాయకులు అనర్హులైతే, భవిష్యత్తులో కేవలం రాజకీయ కక్ష సాధింపుల కోసం తప్పుడు కేసులతో ప్రతిపక్ష నేతలను జైలుకు పంపి, వారిని పదవి నుంచి తొలగించడం సులభమవుతుంది. ప్రస్తుత రాజకీయాల్లో అవినీతి ఆరోపణలు, మనీ లాండరింగ్ కేసులు ఎక్కువగా వినిపిస్తున్నాయి. గతంలో జయలలిత, లాలూ ప్రసాద్ యాదవ్ వంటి ముఖ్యమంత్రులు జైలు జీవితం గడిపారు. ఇటీవల, తెలంగాణ మాజీ ముఖ్యమంత్రి కె.చంద్రశేఖర్ రావు కుమార్తె కవిత, ఢిల్లీ ముఖ్యమంత్రి అరవింద్ కేజ్రీవాల్ వంటి నేతలు కూడా మనీ లాండరింగ్ కేసుల్లో అరెస్టై జైలుకు వెళ్లారు. ఈ బిల్లుతో కేంద్ర ప్రభుత్వం తమకు అనుకూలంగా లేని రాష్ట్ర ప్రభుత్వాలను కూల్చివేయడానికి మార్గం సుగమం చేసుకుంటోందని ప్రతిపక్షాలు ఆరోపిస్తున్నాయి.

ప్రజా ఉద్యమాలకు చరమగీతం…
ఈ బిల్లు వల్ల భవిష్యత్తులో ప్రజా ఉద్యమాలు, పోరాటాలు చేసేవారు కూడా రాజకీయాల నుంచి దూరం కావాల్సిన పరిస్థితి ఏర్పడుతుంది. దేశం కోసం పోరాడిన యోధులకు, అవినీతి ఆరోపణలు ఎదుర్కొన్నవారికి మధ్య తేడాను గుర్తించకుండా అందరినీ ఒకే గాటన కట్టడం సరికాదని విశ్లేషకులు చెబుతున్నారు. ఈ బిల్లు కేవలం రాజకీయ రగడకు మాత్రమే పరిమితం కాకుండా దేశంలో ప్రజాస్వామ్య భవిష్యత్తుపై తీవ్ర ప్రభావం చూపుతుంది. రాజకీయ నాయకులను వారి నేరాల ఆధారంగా శిక్షించాల్సిన అవసరం ఉన్నప్పటికీ, కేవలం రాజకీయ కక్ష సాధింపులకు ఉపయోగపడేలా చట్టాలు చేయడం సరికాదు.

దేశం కోసం జైలు… దుర్భర జీవితం

• మహాత్మా గాంధీ దాదాపు 6 సంవత్సరాలు (2,338 రోజులు) జైలులో గడిపారు. 1922లో చౌరీ-చౌరా ఘటన తర్వాత, 1930లో ఉప్పు సత్యాగ్రహం సమయంలో, 1942లో క్విట్ ఇండియా ఉద్యమంలో ఆయనను అరెస్టు చేశారు. గాంధీజీని పూణేలోని అగాఖాన్ మహల్, యరవాడ జైలులో ఉంచారు. ఆయన సాధారణ ఖైదీలా కఠిన జీవన పరిస్థితులను ఎదుర్కొన్నారు. ఆహారం, ఆరోగ్య సౌకర్యాలు తక్కువగా ఉండేవి. ఆయన నిరాహార దీక్షలు జైలు అధికారులను కలవరపరిచాయి.
• జవహర్‌లాల్ నెహ్రూ దాదాపు 9 సంవత్సరాలు (3,259 రోజులు) జైలులో గడిపారు. 1921లో నాన్-కోఆపరేషన్ ఉద్యమం, 1930లో ఉప్పు సత్యాగ్రహం, 1942లో క్విట్ ఇండియా ఉద్యమంలో ఆయన అరెస్టయ్యారు. నెహ్రూని అల్మోరా, నైనీ, బరేలీ, అహ్మద్‌నగర్ ఫోర్ట్ జైళ్లలో ఉంచారు. ఆయన కఠినమైన జైలు నిబంధనలు, తక్కువ ఆహార సదుపాయాలు, ఒంటరి ఖైదు (సాలిటరీ కాన్ఫైన్‌మెంట్) ఎదుర్కొన్నారు.
• సర్దార్ వల్లభాయ్ పటేల్ దాదాపు 4 సంవత్సరాలు జైలులో గడిపారు. 1930లో ఉప్పు సత్యాగ్రహం,1942లో క్విట్ ఇండియా ఉద్యమంలో అరెస్టయ్యారు. పటేల్‌ను యరవాడ, అహ్మద్‌నగర్ ఫోర్ట్ జైళ్లలో ఉంచారు. ఆయన ఆరోగ్య సమస్యలు, జైలు అధికారుల నుంచి ఒత్తిడి, సాధారణ ఖైదీలతో సమానమైన కఠిన పరిస్థితులను ఎదుర్కొన్నారు.
• భగత్ సింగ్ 1927 నుంచి 1931 వరకు దాదాపు 4 సంవత్సరాలు జైలులో ఉన్నారు. 1929లో సెంట్రల్ అసెంబ్లీ బాంబు కేసు, లాహోర్ కుట్ర కేసులో అరెస్టయ్యారు. లాహోర్ సెంట్రల్ జైలులో భగత్ సింగ్‌ను తీవ్రంగా హింసించారు. ఆయన నిరాహార దీక్షలు చేపట్టారు. దీనివల్ల ఆయన ఆరోగ్యం క్షీణించింది. 1931లో ఆయనను, రాజ్‌గురు, సుఖ్‌దేవ్‌లతో కలిసి ఉరితీశారు.
• వీర్ సావర్కర్ సావర్కర్ దాదాపు 11 సంవత్సరాలు (1910-1921) అండమాన్‌లోని కాలాపానీ (సెల్యులర్ జైలు)లో గడిపారు. ఆ జైలు దుర్భర పరిస్థితులకు ప్రసిద్ధి. సావర్కర్‌ను ఒంటరి ఖైదులో ఉంచారు, కఠిన శ్రమ, ఆహార లేమి, తీవ్రమైన శారీరక హింసను ఎదుర్కొన్నారు.
• అటల్ బిహారీ వాజ్‌పాయ్ ఎమర్జెన్సీ సమయంలో 1975-77 మధ్య దాదాపు 19 నెలలు జైలులో ఉన్నారు. బెంగళూరు, ఢిల్లీ జైళ్లలో ఆయనను ఉంచారు. రాజకీయ ఖైదీగా, ఆయన కఠిన నిబంధనలను ఎదుర్కొన్నారు.
• అద్వానీ కూడా ఎమర్జెన్సీలో 19 నెలలు (1975-1977) జైలులో గడిపారు. బెంగళూరు జైలులో ఆయనను ఉంచారు.
• జయప్రకాష్ నారాయణ (జేపీ) ఎమర్జెన్సీలో 5 నెలలు (1975) జైలులో ఉన్నారు. జేపీ ఉద్యమం ఎమర్జెన్సీకి వ్యతిరేకంగా జనాదరణ పొందింది.