రెమ్యూనరేషన్లలో సంస్కరణలు – కేరళలో సినీ అట్టడుగు వర్గాలకు అగ్రపీఠం

• ఫిల్మ్ డెవలప్‌మెంట్ కౌన్సిల్ ఏర్పాటు
• ముసాయిదా చలనచిత్ర విధానం విడుదల

సహనం వందే, తిరువనంతపురం:
కేరళలో ప్రభుత్వం చలనచిత్ర రంగాన్ని సమూలంగా మార్చడానికి ఒక కీలకమైన ముసాయిదా చలనచిత్ర విధానాన్ని విడుదల చేసింది. ఈ విధానం పరిశ్రమను అధికారికంగా గుర్తించడం, అంతర్జాతీయంగా ప్రాధాన్యత పెంచడం, అన్ని వర్గాలకు సమాన అవకాశాలు కల్పించడం లక్ష్యంగా రూపొందించారు. తిరువనంతపురంలో జరుగుతున్న రెండు రోజుల మలయాళం ఫిల్మ్ కాన్‌క్లేవ్ సందర్భంగా ఈ విధానాన్ని ఆవిష్కరించారు.

లింగ సమానత్వానికి ప్రాధాన్యత
ఈ విధానం సినిమా నిర్మాణాన్ని, ప్రదర్శనను ఒక పరిశ్రమగా గుర్తించడం, మెరుగైన ఆర్థిక వనరులను సమకూర్చడం, లింగ సమానత్వాన్ని సాధించడం, ఆధునిక సాంకేతిక పరిజ్ఞానాన్ని అందిపుచ్చుకోవడం వంటి వ్యూహాత్మక లక్ష్యాలను నిర్దేశించుకుంది. మలయాళ సినిమా సాంస్కృతిక వారసత్వాన్ని కాపాడుతూనే, కేరళను ఒక ప్రాంతీయ నిర్మాణ కేంద్రంగా మార్చాలని ఈ విధానం ఆశిస్తోంది.

సినీ నిర్మాణం ఇకపై ఒక అధికారిక పరిశ్రమ
ఇకపై సినిమా నిర్మాణం ఒక అధికారిక పరిశ్రమగా గుర్తిస్తామని ఈ ముసాయిదా పేర్కొంది. దీనివల్ల పరిశ్రమలో పారదర్శకత, ఆర్థిక స్పష్టత, సామాజిక బాధ్యత పెరుగుతాయని తెలియజేసింది. “సినీ నిర్మాణాన్ని ఒక పరిశ్రమగా గుర్తించడం వల్ల అనేక ప్రయోజనాలు లభిస్తాయి, పారదర్శకత పెరుగుతుంది, ఈ రంగంలో సామాజిక బాధ్యత ప్రోత్సహించబడుతుంది” అని ఈ విధాన పత్రంలో పేర్కొన్నారు.

నిధుల కోసం ప్రత్యేక కార్పొరేషన్…
ఈ విధానంలో అత్యంత ముఖ్యమైన అంశం నిధుల కోసం ఒక సమీకృత చట్రాన్ని ఏర్పాటు చేయడం. మలయాళ సినిమా కోసం సాధారణ ప్రోత్సాహక పథకంతో పాటు, మహిళలు, అట్టడుగు వర్గాలకు ప్రత్యేక మద్దతు ఇవ్వాలని ప్రతిపాదించింది. దీనితో పాటు చలనచిత్ర నిర్మాణాల కోసం ఒక వెంచర్ క్యాపిటల్ ఫండ్‌ను ఏర్పాటు చేయాలని కూడా ప్రణాళికలు రూపొందించారు. ఈ ఫండ్ ముఖ్యంగా బలమైన సామాజిక ప్రాధాన్యత ఉన్న చిత్రాలకు సాయం చేస్తుంది. ఈ ఫండ్ నిర్వహణ బాధ్యతను కేరళ స్టేట్ ఫిల్మ్ డెవలప్‌మెంట్ కార్పొరేషన్ చూసుకుంటుంది.

ఇతర భాషల సినిమాలకు ప్రోత్సాహం
కేరళను అంతర్జాతీయ స్థాయిలో పోటీతత్వంగా ఉంచడానికి, ఇతర భారతీయ, విదేశీ భాషా చిత్రాల నిర్మాణాన్ని కూడా రాష్ట్రంలో ప్రోత్సహించాలని ఈ విధానం చెబుతోంది. అనుమతులను సులభతరం చేయడానికి, మరిన్ని ప్రాజెక్టులను రాష్ట్రానికి ఆకర్షించడానికి సింగిల్-విండో ఫెసిలిటేషన్ సెంటర్ కూడా ప్రారంభిస్తారు.

ఏడాదికి 300 సినిమాలు.‌‌..
భారతదేశం సంవత్సరానికి 2,000 పైగా చిత్రాలను నిర్మిస్తూ ప్రపంచంలోనే అతిపెద్ద చిత్ర నిర్మాణా దేశంగా కొనసాగుతోంది. ఇందులో మలయాళ సినిమా హిందీ తర్వాత రెండో స్థానంలో ఉంది, సంవత్సరానికి దాదాపు 300 చిత్రాలు నిర్మిస్తోంది. 2023లో కేరళ జాతీయ బాక్స్ ఆఫీసుకు 2,000 కోట్ల రూపాయలకు పైగా సమకూర్చి, భారతదేశ సినిమా ఆర్థిక వ్యవస్థలో తన ముఖ్యమైన పాత్రను చాటి చెప్పింది.

ఈ విధానాన్ని అమలు చేయడానికి ముఖ్యమంత్రి పినరయి విజయన్ అధ్యక్షతన, సాంస్కృతిక శాఖా మంత్రి సాజి చెరియన్ సహాధ్యక్షతన ఒక కొత్త ఫిల్మ్ డెవలప్‌మెంట్ కౌన్సిల్‌ను ఏర్పాటు చేయాలని ప్రతిపాదించారు. పారితోషికాలు, బీమా, పని పరిస్థితులు వంటి విషయాలపై సినీ సంస్థలతో సంప్రదింపులు జరిపి సంస్కరణలు తీసుకువస్తామని ప్రభుత్వం హామీ ఇచ్చింది.