- ఒకరి బిల్లులు మరొకరి ఖాతాలోకి బదిలీ
- తప్పు చేసిన అధికారులకు రక్షణ
- కాంట్రాక్టర్ మౌనం వెనుక కుట్ర?
- విజిలెన్స్ ఆరా.. అయినా చర్యలేవీ!
- జలమండలి నిర్లక్ష్యానికి కోటి మూల్యం!
సహనం వందే, హైదరాబాద్:
ప్రభుత్వ సంస్థల్లో ప్రజాధనం ఎలా ఖర్చవుతోంది? కోట్ల రూపాయల చెల్లింపులు చేసే అధికారులు కనీస జాగ్రత్తలు తీసుకుంటున్నారా? హైదరాబాద్ జలమండలిలో వెలుగుచూసిన రూ.1.3 కోట్ల నిధుల బదిలీ వ్యవహారం ఈ ప్రశ్నలకు కారణమవుతోంది. జలమండలిలో ఆర్థిక లావాదేవీల పర్యవేక్షణ ఏ స్థాయిలో ఉందో ఈ ఘటన ద్వారా అర్థం చేసుకోవచ్చు. ఇది సాధారణ తప్పిదమని సరిపెట్టుకునే వ్యవహారం కాదు. భారీ చెల్లింపుల్లో కనీస తనిఖీలు కూడా చేయని అధికారుల పనితీరుపై తీవ్రమైన విమర్శలు వెల్లువెత్తుతున్నాయి.
ఒకరి బిల్లు మరొకరి ఖాతాలోకి
జలమండలిలో కొన్ని పనులను నామినేషన్ పద్ధతిలో, మరికొన్నింటిని టెండర్ల ద్వారా కాంట్రాక్టర్లకు అప్పగిస్తుంటారు. పనులు పూర్తయిన తర్వాత సంబంధిత కాంట్రాక్టర్లకు బిల్లులు చెల్లించే బాధ్యత ఆర్థిక విభాగంపై ఉంటుంది. ఏ కాంట్రాక్టర్‌కు ఎంత చెల్లించాలి? ఏ పని పూర్తయింది? ఎవరి ఖాతాలో జమ చేయాలి? అనే వివరాలన్నీ పరిశీలించాలి. కానీ ఇక్కడ అధికారులు ఈ ప్రక్రియను అత్యంత నిర్లక్ష్యంగా నిర్వహించారు. ‘ఎస్‌ఎస్’ అక్షరాలతో ప్రారంభమయ్యే ఒక సంస్థకు చెల్లించాల్సిన బిల్లు మొత్తాన్ని, అదే అక్షరాలతో మొదలయ్యే మరో సంస్థకు బదిలీ చేశారు. ప్రభుత్వ నిధుల చెల్లింపులు ఇంత యథేచ్ఛగా జరుగుతున్నాయా అనే విస్మయం కలుగుతోంది.
కళ్లుమూసుకుని నిధుల బదిలీ
ఒక కాంట్రాక్టర్‌కు నిధులు విడుదల చేసే ముందు పూర్తి పేరు, బ్యాంకు ఖాతా సంఖ్య, ఇతర వివరాలను సరిచూసుకోవడం ప్రాథమిక విధి. కానీ సంబంధిత అధికారులు ఈ వివరాలను కనీసం పరిశీలించలేదు. ఒక సాధారణ ఉద్యోగి నెలల తరబడి పనిచేసినా సంపాదించలేనంత పెద్ద మొత్తాన్ని ఒకే లావాదేవీలో తప్పు ఖాతాకు పంపించారు. ఇంతటి భారీ చెల్లింపులో ఒకరి పొరపాటును మరొకరు గుర్తించలేదా? చెల్లింపులకు ముందు తనిఖీ చేసే వ్యవస్థ లేదా? అన్న ప్రశ్నలకు సమాధానాలు రావాల్సి ఉంది.
కాంట్రాక్టర్ మౌనం.. అధికారుల నిస్సహాయత
అధికారుల నిర్లక్ష్యం ఒక ఎత్తయితే, ఆ నిధులను అందుకున్న కాంట్రాక్టర్ వ్యవహరించిన తీరు మరో చర్చకు దారితీస్తోంది. తనకు రావాల్సిన బిల్లుల కంటే ఎక్కువ మొత్తం జమ అయిన విషయం తెలిసినా సదరు కాంట్రాక్టర్ మౌనంగా ఉన్నారనే ఆరోపణలు వస్తున్నాయి. సాధారణంగా అదనపు సొమ్ము జమ అయినప్పుడు సంబంధిత సంస్థకు తెలియజేయాల్సిన బాధ్యత ఉంటుంది. పొరపాటును ఆలస్యంగా గుర్తించిన అధికారులు డబ్బులు వెనక్కి ఇవ్వాలని కోరినా అటువైపు నుంచి స్పందన లేదని తెలుస్తోంది. తనకు చెందని సొమ్మును తిరిగి ఇవ్వకపోవడం ఎంతవరకు సమంజసం? మరోవైపు, సొమ్మును వెనక్కి తీసుకురావడానికి అధికారులు కాంట్రాక్టర్ చుట్టూ తిరగాల్సిన పరిస్థితి రావడం వ్యవస్థలోని లోపాలను బయటపెడుతోంది.
నెలలు గడిచినా చర్యలేవీ.. ఎవరికి రక్షణ?
ఈ ఘటన జరిగి నెలలు గడిచినా బాధ్యులైన అధికారిపై శాఖాపరమైన చర్యలు తీసుకోకపోవడం మరింత విస్మయం కలిగిస్తోంది. సాధారణ ఉద్యోగి చిన్న తప్పు చేసినా వివరణలు అడిగే ఉన్నతాధికారులు, ఇంత పెద్ద నిర్లక్ష్యం జరిగినప్పుడు ఎందుకు మౌనంగా ఉన్నారనే విమర్శలు వినిపిస్తున్నాయి. బాధ్యులను గుర్తించి కఠిన చర్యలు తీసుకోవాల్సిన అవసరం లేదా? తప్పు జరిగిన తర్వాత కూడా చర్యలు లేకపోవడం వెనుక ఎవరి ప్రమేయం ఉంది? అన్న సందేహాలు తలెత్తుతున్నాయి. ప్రస్తుతం విజిలెన్స్ అండ్ ఎన్‌ఫోర్స్‌మెంట్ విభాగం ఈ వ్యవహారంపై ఆరా తీస్తున్నట్లు సమాచారం. దీనిపై జలమండలి ఉన్నతాధికారులు సమాధానం చెప్పాల్సిన అవసరం ఉంది.
