‘చెత్త’ ఆహారం… కొత్త వ్యాపారం! – పారేయాల్సిన ఆహారం చౌకగా విక్రయం

Waste Food New Business
  • హైదరాబాద్‌లో యువకుల వినూత్న ప్రయోగం
  • సర్‌ప్రైజ్ బ్యాగ్స్‌తో వృథాకు అడ్డుకట్ట
  • వినియోగదారులు, వ్యాపారులకు ఇద్దరికీ లాభం
  • ప్రపంచవ్యాప్తంగా విస్తరిస్తున్న కొత్త ట్రెండ్

సహనం వందే, హైదరాబాద్:

బేకరీలు, రెస్టారెంట్లలో రోజంతా అమ్మకాలు ముగిశాక మిగిలిపోయే కేకులు, బ్రెడ్లు, పఫ్‌లను మరుసటి రోజు అమ్మలేక నిర్వాహకులు చెత్తబుట్టలో పారేస్తుంటారు. అయితే ఇప్పుడు ఈ మిగులు ఆహారమే ‘సర్‌ప్రైజ్ బ్యాగ్స్’ పేరుతో కొత్త వ్యాపారానికి మార్గం చూపిస్తోంది. ప్రత్యేక మొబైల్ యాప్‌ల ద్వారా సమీపంలోని బేకరీలు, కేఫ్‌లలో మిగిలిన ఆహార సంచులను బుక్ చేసుకుని, ఆన్‌లైన్‌లో డబ్బు చెల్లించాక వచ్చే కోడ్ చూపించి దుకాణంలో నేరుగా తీసుకోవచ్చు. ఏ దుకాణం నుంచి సంచి వస్తుందో తెలుస్తుంది కానీ, లోపల ఏయే పదార్థాలు ఉంటాయో ముందుగా తెలియకపోవడమే దీని ప్రత్యేకత. అసలు విలువలో కొన్నిసార్లు మూడో వంతు ధరకే నాణ్యమైన ఆహారం లభించడంతో పాటు, సంచిలో ఏముంటుందో తెలుసుకోవాలనే ఆసక్తి వినియోగదారులను విశేషంగా ఆకర్షిస్తోంది.

హైదరాబాద్‌లో ‘రీప్లేట్’ వినూత్న అడుగు!
విదేశాల్లో ప్రాచుర్యం పొందిన ఈ ఆలోచనను కరణ్ సింగ్ గుజ్రాల్, ఆదిత్య ఆర్య అనే ఇద్దరు స్నేహితులు ‘రీప్లేట్’ సంస్థ ద్వారా హైదరాబాద్‌లో ప్రారంభించారు. గచ్చిబౌలిలోని ఒక కాఫీ దుకాణంలో అమ్ముడుపోని క్రొసాంట్లు, మఫిన్లను పారేయడం చూసిన వీరు, 40కి పైగా బేకరీల నిర్వాహకులతో చర్చించి ఈ వేదికను రూపొందించారు. ప్రస్తుతం నగరంలోని బికనీర్‌వాలా, బేక్‌లోర్, బ్రౌన్ బేర్ సహా ఆరు బ్రాండ్లకు చెందిన 20 దుకాణాల ద్వారా రోజుకు సగటున 60, వారాంతాల్లో 75 సంచులను విక్రయిస్తున్నారు. ఇప్పటివరకు 350కి పైగా సంచులను అందించి, సుమారు 300 కిలోల ఆహారం వృథా కాకుండా అడ్డుకున్నారు.

వ్యాపారులకు కొత్త కస్టమర్లా?
సగానికి సగం ధరకు ఆహారం ఇస్తే అసలు ధరకు కొనేవారు తగ్గుతారని బేకరీ నిర్వాహకులు మొదట్లో సందేహించారు. కానీ, ఈ సంచుల ద్వారా తమ దుకాణం రుచి చూసిన కొత్త వినియోగదారులు, ఆ తర్వాత సాధారణ ధరలకు కూడా కొనుగోలు చేసే రెగ్యులర్ కస్టమర్లుగా మారుతున్నారని రీప్లేట్ అనుభవం నిరూపించింది. మరోవైపు 2015లో డెన్మార్క్‌లో మొదలైన ‘టూ గుడ్ టు గో’, ‘ఫ్లాష్‌ఫుడ్’, ‘కర్మ’ వంటి అంతర్జాతీయ సంస్థలు యూరప్, ఉత్తర అమెరికాల్లో ఇదే తరహా సేవలను విజయవంతంగా నిర్వహిస్తున్నాయి. భవిష్యత్తులో రీప్లేట్ కూడా హోటళ్లు, రెస్టారెంట్లు, సూపర్ మార్కెట్లకు తన సేవలను విస్తరించే ప్రణాళికలో ఉంది.

ఆహార భద్రతే అసలైన పరీక్ష!
అమ్ముడుపోని ఆహారం అంటే పాడైపోయినది కానప్పటికీ, వినియోగదారుల ఆరోగ్య భద్రత విషయంలో రాజీ పడకూడదు. ఆహారం ఎప్పుడు తయారైంది, ఎంతసేపటిలోపు తినాలి, ఎలా నిల్వ చేశారనే స్పష్టమైన వివరాలు యాప్‌లో ఉండాలి. ముఖ్యంగా పాలు, క్రీమ్, మాంసం వంటి త్వరగా పాడయ్యే పదార్థాల విషయంలో అప్రమత్తత అవసరం. అలాగే, ఆహార అలర్జీలు ఉన్నవారి కోసం సంచిలోని పదార్థాలపై కనీస సమాచారం అందించడం వల్ల వ్యాపార సంస్థలపై వినియోగదారులకు నమ్మకం పెరుగుతుంది.

మూడు ప్రయోజనాల సమాహారం!
ఒకప్పుడు చెత్తబుట్టలోకి వెళ్లిపోయిన ఆహారం నేడు వ్యాపారులకు అదనపు ఆదాయాన్ని, వినియోగదారులకు చౌకగా రుచికరమైన భోజనాన్ని అందిస్తూ పర్యావరణానికి మేలు చేస్తోంది. ఒకవైపు ఆహార కొరత, మరోవైపు భారీగా ఆహార వృథా జరుగుతున్న ప్రస్తుత తరుణంలో ఈ రెండింటి మధ్య అంతరాన్ని తగ్గించడానికి ఇలాంటి వేదికలు ఎంతో అవసరం. హైదరాబాద్‌లో మొదలైన ఈ ప్రయత్నం దేశంలోని మరిన్ని నగరాలకు విస్తరిస్తే ఆహార వృథా నివారణలో ఒక కొత్త విప్లవం రావడం ఖాయం.

Share

Leave a Reply

Your email address will not be published. Required fields are marked *