బాసుల జీతం వంద రెట్లు అధికం – సీఈవోలు, ఉద్యోగుల మధ్య వేతనాల్లో భారీ అంతరం

Huge Salaries to Corporate Higher Officials
  • భారత కార్పొరేట్ హై లెవెల్ అధికారులకు కోట్లల్లో వేతనం
  • ఉద్యోగులకు దక్కని ఫలం… పెద్దోళ్లకే ఆర్ధిక ప్రయోజనం
  • భారీగా పెరుగుతున్న 232 కంపెనీల బాసుల జీతాలు

సహనం వందే, హైదరాబాద్:

భారత కార్పొరేట్ రంగంలో సీఈవోల వేతనాలు, సాధారణ ఉద్యోగుల సంపాదన మధ్య వ్యత్యాసం ఊహకందని విధంగా పెరుగుతోంది. ఒకే సంస్థలో పనిచేస్తున్నప్పటికీ, సంస్థలు అభివృద్ధి చెందుతున్న కొద్దీ కొద్దిమంది ఉన్నతాధికారుల సంపద దూసుకుపోతుండగా, కష్టపడే సాధారణ ఉద్యోగుల వేతనాలు నత్తనడకన సాగుతున్నాయని తాజా నివేదికలు స్పష్టం చేస్తున్నాయి.

రికార్డు స్థాయిలో వేతనాల అంతరం
బీఎస్‌ఈ 500 సూచీలోని 232 కంపెనీల వార్షిక నివేదికలను పరిశీలించగా, దాదాపు సగం సంస్థల బాసుల వేతనం సగటు ఉద్యోగి సంపాదనకు వంద రెట్లకుపైగా ఉన్నట్లు తేలింది. 2020 ఆర్థిక సంవత్సరంలో 40 శాతంగా ఉన్న ఈ వాటా ఆరేళ్లలో మరింత పెరిగింది. 2024 ఆర్థిక సంవత్సరం నుంచి అధినేతల్లో ఎక్కువమంది సగటు ఉద్యోగి వేతనానికి కనీసం 80 రెట్లు పొందుతున్నారు.

కోట్లలో జీతం
కేవలం అధినేతలే కాకుండా 2026 ఆర్థిక సంవత్సరంలో దాదాపు 7 శాతం పాలక మండలి సభ్యులు ఏడాదికి రూ. 10 కోట్లు లేదా అంతకంటే ఎక్కువ పారితోషికం అందుకున్నారు. 2020లో ఇది కేవలం 3 శాతమే ఉండగా, ఆరేళ్లలో ఈ సంఖ్య రెండింతలకు మించి పెరిగింది. మరోవైపు ఏడాదికి కోటి రూపాయల కంటే తక్కువ పొందే డైరెక్టర్ల వాటా 76 శాతం నుంచి 70 శాతానికి పడిపోయింది. పెద్ద సంస్థల నిర్వహణలో సంక్లిష్టత, అంతర్జాతీయ వ్యాపార విస్తరణ, సాంకేతిక మార్పులు, ఏఐ వినియోగం వల్ల అనుభవజ్ఞులైన నాయకుల కోసం పోటీ పెరిగి ఈ భారీ వేతనాలకు దారితీస్తోంది.

పనితీరు పేరిట భారీ ప్రోత్సాహకాలు
2010 ప్రాంతంలో కంపెనీ అధినేతల మొత్తం పారితోషికంలో స్థిర వేతనం 70 నుంచి 80 శాతం వరకు ఉండేది. కానీ ఇప్పుడు పెద్ద కంపెనీల్లో వృత్తిపరమైన అధినేతల పారితోషికంలో కనీసం 60 శాతం వరకు కంపెనీ పనితీరుతో ముడిపడిన అదనపు మొత్తాలు, దీర్ఘకాలిక ప్రోత్సాహకాలే ఉంటున్నాయి. ఫలితంగా సంస్థకు మంచి ఫలితాలు వస్తే అధినేతల ఆదాయం వేగంగా పెరుగుతోంది.

లాభాలకు, జీతాలకు పొంతన లేదు
2026 ఆర్థిక సంవత్సరంలో బీఎస్‌ఈ 500 కంపెనీల డైరెక్టర్ల పారితోషికం అంతకుముందు ఏడాదితో పోలిస్తే 38 శాతం పెరగగా, నికర లాభాలు 22 శాతం మాత్రమే వృద్ధి చెందాయి. ఇదే సమయంలో సాధారణ ఉద్యోగుల వేతన వ్యయం కేవలం 1 శాతం మాత్రమే పెరిగింది. వేలాది మంది ఉద్యోగులకు జీతాలు పెంచితే సంస్థపై భారీ ఆర్థిక భారం పడుతుందని, అందుకే కీలక బాధ్యతలు నిర్వహించే కొద్దిమందికి అధిక పారితోషికం ఇస్తున్నామని కంపెనీలు వాదిస్తున్నాయి.

మారాల్సిన కార్పొరేట్ ఆలోచనా విధానం
అమెరికాలో 2025 ఆర్థిక విశ్లేషణల ప్రకారం ప్రధాన కార్యనిర్వాహకుల పారితోషికంలో 70 శాతానికిపైగా దీర్ఘకాలిక ప్రోత్సాహకాల రూపంలోనే ఉండటంపై వాటాదారులు, పెట్టుబడిదారులు ప్రశ్నలు లేవనెత్తుతున్నారు. ఆర్థిక వృద్ధి మందగిస్తే లేదా కృత్రిమ మేధ కారణంగా ఖర్చులపై ఒత్తిడి పెరిగితే ఈ విధానాలు మారే అవకాశం ఉంది. కేవలం లాభాల రూపంలోనే కాకుండా ఉద్యోగుల సంక్షేమం, సంస్థలో న్యాయమైన వేతన విధానం ద్వారా కూడా కంపెనీ విజయాన్ని అంచనా వేయాల్సిన సమయం ఆసన్నమైంది.

Share

Leave a Reply

Your email address will not be published. Required fields are marked *