బ్యాంకు ‘బీమా’కింకరులు – మాయమాటలతో బీమా ఉచ్చులోకి పేదలు

• యమకింకరుల్లా ప్రజలను వేధిస్తున్నారు
• వారి సొమ్మును దండుకునే కసాయి వ్యాపారం
• అవసరం లేకున్నా బీమా చేర్పిస్తున్నారు
• భారీ కమీషన్ల కోసం ప్రజల్ని బలి చేస్తున్నారు
• రుణాలకు వచ్చే వారిపై వల వేస్తున్నారు
• పాత పాలసీలు రద్దు చేసి కొత్తవి కొనేలా కుట్ర

సహనం వందే, హైదరాబాద్:
బీమా అనేది ప్రజలకు రక్షణ కవచంలా ఉండాలి. కానీ ఇప్పుడు బ్యాంకు అధికారులకు అది దోపిడీకి మార్గంలా మారింది. ఒకప్పుడు భరోసాగా ఉన్న ఈ రంగం, ఇప్పుడు నిస్సహాయ ప్రజల జేబులకు చిల్లు పెడుతోంది. భారీ కమీషన్లు, ఆర్థిక అక్షరాస్యత లేకపోవడం… ఇవన్నీ కలిసి ఒక విషవలయం సృష్టించాయి. బీమా అనేది ఇప్పుడు మోసాల క్రీడగా, అమాయకుల సొమ్మును కొల్లగొట్టే కుట్రగా పరిణమించింది. ఈ మోసాలకు సంబంధించి కేవలం ఒక సంవత్సరంలో లక్షలాది ఫిర్యాదులు రావడమే ఈ వ్యవస్థ ఎంతగా భ్రష్టు పట్టిందో చూపిస్తోంది. ఇది కేవలం ఒక సమస్య కాదు… మన ఆర్థిక వ్యవస్థను పీడిస్తున్న ఒక వ్యవస్థీకృత నేరం.

బ్యాంకర్ల కమీషన్ల కక్కుర్తి…
బీమా మోసాలకు మూల కారణం బ్యాంకులు, ఏజెంట్ల కమీషన్ల దాహం. ఈనాడు అక్షరాలా 15 పెద్ద బ్యాంకులు కేవలం బీమా విక్రయాల ద్వారా రూ. 21,773 కోట్లు ఆర్జించాయి. హెచ్‌డిఎఫ్‌సీ బ్యాంకు అయితే ఏకంగా రూ. 6,467 కోట్లతో అగ్రస్థానంలో నిలిచింది. ఈ ఆదాయ దాహం ప్రజలను దోచుకునేందుకు బ్యాంక్ సిబ్బందిని ప్రేరేపిస్తోంది. ఒక బీమా పాలసీ మొదటి సంవత్సరం ప్రీమియంలో ఏకంగా 65 శాతం వరకు కమీషన్లుగా వెళ్తోంది. ఈ ఆశ ఏజెంట్లను బలవంతంగా కొత్త పాలసీలు అమ్ముకునేందుకు పురికొల్పుతుంది. దీంతో కస్టమర్ల అవసరాలు, శ్రేయస్సులు గాలిలో కలిసిపోతున్నాయి. బ్యాంకులు, ఏజెంట్లు వారి జేబులు నింపుకోవడానికి, ప్రజల ఆర్థిక భవిష్యత్తును అంధకారంలోకి నెట్టివేస్తున్నారు.

రుణాలకు వల పన్ని వేటాడుతున్నారు…
రుణం కోసం బ్యాంకులకు వెళ్ళిన అమాయకులను బీమా పాలసీలు కొనడానికి బలవంతం చేయడం ఇప్పుడు సర్వసాధారణమైంది. రుణం కావాలంటే తప్పకుండా బీమా తీసుకోవాల్సిందేనని ఒత్తిడి చేస్తారు. లోన్ ఆమోదం కోసం ఎగబడే ప్రజలు ఈ మోసపు వలలో చిక్కుకుంటున్నారు. బ్యాంకు లాకర్ కావాల్సినవారిని సైతం బీమా పాలసీలు కొనమని ఒత్తిడి చేస్తున్నారు. బ్యాంకుల ఉన్నతాధికారుల నుండి సామాన్య ఏజెంట్ల వరకు అందరూ కమీషన్లు, లక్ష్యాల మీదనే దృష్టి పెడుతున్నారు. ‘చర్నింగ్’ అనే ఒక దారుణమైన పద్ధతి ద్వారా ఏజెంట్లు కస్టమర్లను పాత పాలసీలు రద్దు చేసి కొత్తవి కొనేలా ప్రోత్సహిస్తారు. దీనివల్ల ప్రజలకు ఎలాంటి ప్రయోజనం ఉండదు. కానీ ఏజెంట్లకు మాత్రం మళ్ళీ కమీషన్లు వస్తాయి.

నిష్ప్రయోజనకరంగా మారిన పాలసీలు…
బీమా రంగంలో జరుగుతున్న ఈ మోసాలను బీమా నియంత్రణ అభివృద్ధి ప్రాధికార సంస్థ (ఐఆర్డీఏఐ) బట్టబయలు చేసింది. గత సంవత్సరంలో దేశవ్యాప్తంగా 2,15,569 ఫిర్యాదులు వచ్చాయి, ఇందులో 1,20,726 ఫిర్యాదులు జీవిత బీమాకు సంబంధించినవి. విచారణకు అర్హత ఉన్న ఫిర్యాదుల్లో 58 శాతం మోసాలకు సంబంధించినవే. ఈ సంఖ్య ఎంత భయంకరమైనదో చూపిస్తోంది. ఆరోగ్య బీమాలో ఫిర్యాదులు 21 శాతం పెరిగి 31,490కి చేరాయి. ఇక సగం పాలసీలు ఐదేళ్లలోనే రద్దవుతున్నాయి. పాలసీ రద్దు చేసుకున్నవారికి కేవలం 30 శాతం సొమ్ము మాత్రమే తిరిగి వస్తుంది. ప్రజల శ్రమ, డబ్బు నిస్సారంగా నీళ్ళపాలవుతున్నాయి.

సంబంధంలేని పాలసీలు అంటగడుతున్నారు…
ఈ దగాకోరు వ్యవస్థను సరిదిద్దాలంటే పాలసీ అమ్మకాలపై కమీషన్ల నియమాలను పూర్తిగా మార్చాలి. బ్యాంకు బోర్డు సభ్యులను, బీమా కంపెనీల ఉన్నతాధికారులను కూడా ఈ మోసాలకు జవాబుదారులుగా చేయాలి. సర్వే ప్రకారం 57 శాతం మంది మేనేజర్లు కస్టమర్లకు వారికి సంబంధంలేని పాలసీలు అమ్ముతున్నారని అంగీకరించారు. ఈ అమ్మకపు ఒత్తిడిని తొలగించకపోతే పరిస్థితి మరింత అధ్వానంగా మారుతుంది. లక్షలాది కుటుంబాలు ఆర్థికంగా అస్థిరంగా మారుతాయి. ప్రభుత్వం, నియంత్రణ సంస్థలు వెంటనే కఠిన చర్యలు తీసుకోవాలి.