- ఇండియన్ భర్త కోసం ఒక మహిళ ప్రయత్నం
- ‘భారతీయ భర్త కావాలంటూ’ విజ్ఞప్తి
- టైమ్స్ స్క్వేర్‌‌లో నిలబడి ప్లకార్డు ప్రదర్శన
- సంప్రదాయాలకు ఇచ్చే ప్రాధాన్యమే కారణం
సహనం వందే, అమెరికా:
న్యూయార్క్ నగరంలోని టైమ్స్ స్క్వేర్ ప్రపంచానికి కేంద్ర బిందువు లాంటిది. అక్కడ విభిన్న సంస్కృతుల నుంచి వచ్చిన ప్రజలు కనిపిస్తుంటారు. అలాంటి చోట ఒక అమెరికన్ మహిళ ‘భారతీయ భర్త కావాలి’ అని రాసి ఉన్న ప్లకార్డుతో నిలబడడం అందరినీ ఆశ్చర్యపరిచింది. ఆధునిక కాలంలో డేటింగ్ యాప్‌లు, సోషల్ మీడియా ప్రేమ వ్యవహారాలకు వేదికగా మారుతున్నప్పుడు… ఆ మహిళ పాత పద్ధతిని ఎంచుకోవడం ఆసక్తికరంగా మారింది. ఈ వీడియో సామాజిక మాధ్యమాల్లో వేగంగా వ్యాపించింది. దీనిపై వచ్చిన స్పందనలు హాస్యభరితంగానే కాకుండా ఆలోచింపజేసేవిగా కూడా ఉన్నాయి. భారతీయ పురుషులు కుటుంబ బంధాలకు, సంప్రదాయాలకు ఇచ్చే ప్రాధాన్యతే ఈ మహిళను ఆకర్షించిందని నెటిజన్లు అభిప్రాయపడుతున్నారు. దీనికి బాలీవుడ్ చిత్రాల ప్రభావం, క్రికెట్, భారతీయ వంటకాలు కూడా కారణమని విశ్లేషిస్తున్నారు. షారూఖ్ ఖాన్ సినిమాలను చూసి ఈ రొమాంటిక్ ఆలోచన చేసిందని ఒకరు ట్వీట్ చేయగా, భారతీయ పురుషులు మంచి భర్తలని మరొకరు చమత్కరించారు.
వందలాది బంధువులతో భారత పెళ్లిళ్లు…
అమెరికన్ మహిళ భారతీయ భర్త కోసం వెతుకుతున్న ఈ ఘటన పెద్ద చర్చను రేకెత్తించింది. భారతీయ వివాహాల్లో జరిగే పెద్ద పెద్ద వేడుకలు, వందలాదిమంది బంధువులు, కుటుంబ సంబంధాలు ఎలా ఉంటాయో ఆమెకు తెలుసా అని నెటిజన్లు ఆశ్చర్యంగా ప్రశ్నిస్తున్నారు. ఆహారపు అలవాట్లు, కుటుంబ డైనమిక్స్‌లలోని తేడాలు సవాళ్లను సృష్టిస్తాయని కూడా చర్చిస్తున్నారు. ప్రస్తుతం అమెరికాలో భారతీయులు ఎక్కువగా డెమోక్రటిక్ పార్టీ వైపు మొగ్గు చూపుతున్నారు. అయితే ట్రంప్ హయాంలో వలసల నిబంధనలు కఠినతరం అవుతాయనే భయంతో గుజరాత్, పంజాబ్ వంటి రాష్ట్రాల నుంచి అక్రమ వలసలు పెరిగాయని నివేదికలు చెబుతున్నాయి. ఈ నేపథ్యంలో వీసా దరఖాస్తుదారుల కోసం ఆలయాల్లో ప్రత్యేక పూజలు చేయించడం వంటి సంఘటనలు చోటు చేసుకుంటున్నాయి.
భవిష్యత్తుపై కొత్త ఆశలు
ఈ వీడియోపై సోషల్ మీడియాలో వేలాది మంది స్పందించారు. కొంతమంది భారతీయ మగాళ్లు తమ ఉద్యోగ వివరాలు, జాతకాలను కూడా షేర్ చేశారు. ఇది కేవలం పబ్లిసిటీ స్టంట్ కావచ్చు లేదా ఒక ప్రయోగం కావచ్చు అని కొందరు అంచనా వేస్తున్నారు. ఏదేమైనా ఒక అమెరికన్ మహిళ భారతీయ భర్త కోసం వెతకడం అమెరికా రాజకీయాల్లో భారతీయుల పాత్రను, వారి ఓటు బ్యాంకు ప్రభావాన్ని మరోసారి ముందుకు తెచ్చింది. భవిష్యత్తులో వలసల విధానాలు ఎలా మారినా భారతీయ అమెరికన్ల శక్తి మరింత పెరుగుతుందని ఈ ఘటన సూచిస్తోంది.
