కాళేశ్వరంలో సునామీ – సీబీఐ దర్యాప్తుకు ప్రభుత్వం నిర్ణయం

• రాష్ట్ర శాసనసభలో ఏకగ్రీవంగా ఆమోదం
• తెలంగాణలో వేడెక్కిన రాజకీయం

సహనం వందే, హైదరాబాద్:
తెలంగాణ రాజకీయాల్లో మరో కీలక ఘట్టం ఆవిష్కృతమైంది. లక్ష కోట్ల రూపాయల అవినీతి ఆరోపణలతో అట్టుడికిపోతున్న కాళేశ్వరం ప్రాజెక్టుపై దర్యాప్తును కేంద్ర దర్యాప్తు సంస్థ సీబీఐకి అప్పగించాలని రాష్ట్ర శాసనసభ ఏకగ్రీవంగా నిర్ణయించడం సంచలనం రేపింది. ముఖ్యమంత్రి రేవంత్ రెడ్డి నేతృత్వంలోని కాంగ్రెస్ ప్రభుత్వం తీసుకున్న ఈ నిర్ణయం, గత ప్రభుత్వంలో జరిగిన అవకతవకలపై పూర్తిస్థాయి లోతుగా దర్యాప్తు జరగాలన్న ప్రజల ఆకాంక్షను ప్రతిబింబిస్తోందని విశ్లేషకులు చెబుతున్నారు. ఈ పరిణామం బీఆర్ఎస్ పార్టీని తీవ్ర ఇబ్బందుల్లోకి నెట్టింది.

బీఆర్ఎస్ వాకౌట్: గన్‌పార్కులో నిరసన జ్వాల
కాళేశ్వరంపై చర్చ జరుగుతున్న సమయంలో సభలో తమకు మాట్లాడే అవకాశం ఇవ్వడం లేదంటూ బీఆర్ఎస్ సభ్యులు ఆదివారం రాత్రి నిరసనగా వాకౌట్ చేశారు. ముఖ్యమంత్రి రేవంత్ రెడ్డి చేసిన ఆరోపణలు, సభా వ్యవహారశైలిపై ఆగ్రహం వ్యక్తం చేస్తూ అసెంబ్లీ ఎదురుగా ఉన్న గన్‌పార్కుకు చేరుకున్నారు. జస్టిస్ పీసీ ఘోష్ కమిషన్ నివేదిక పత్రాలను చెత్తబుట్టలో పడేసి వినూత్న నిరసన తెలిపారు. దీనిపై కేటీఆర్ స్పందిస్తూ కాంగ్రెస్, బీజేపీలు కుమ్మక్కై కాళేశ్వరం ప్రాజెక్టును మూసివేసేందుకు కుట్ర పడుతున్నాయని ఆరోపించారు. రైతుల ప్రయోజనాలను కాపాడేందుకు అవసరమైతే ఉద్యమాన్ని కొనసాగిస్తామని హెచ్చరించారు. ఈ వాకౌట్, నిరసన కాళేశ్వరం కేసుపై అధికార, ప్రతిపక్షాల మధ్య రాజకీయ వైరం మరింత తీవ్రమైందని స్పష్టం చేసింది.