సహనం వందే, హైదరాబాద్:
సీపీఐ సీనియర్ నాయకుడు, మాజీ పార్లమెంటు సభ్యుడు సురవరం సుధాకర్ రెడ్డి కన్నుమూశారు. కొంతకాలంగా అనారోగ్యంతో బాధపడుతున్న ఆయన హైదరాబాద్‌లోని ఓ ఆసుపత్రిలో చికిత్స పొందుతూ శుక్రవారం రాత్రి తుదిశ్వాస విడిచారు. ఆయన మరణం కమ్యూనిస్టు పార్టీకి, కార్మిక వర్గానికి తీరని లోటు.
విద్యార్థి దశ నుంచే పోరాటం…
1942 మార్చి 25న మహబూబ్‌నగర్ జిల్లాలో జన్మించిన సుధాకర్ రెడ్డి విద్యార్థి దశ నుంచే ప్రజా సమస్యలపై పోరాడారు. కేవలం 15 ఏళ్ల వయసులోనే పాఠశాలలో బ్లాక్‌బోర్డులు, పుస్తకాల కోసం ఉద్యమం చేసి తన నాయకత్వ లక్షణాలను చాటుకున్నారు. ఉస్మానియా కళాశాలలో బీఏ, ఉస్మానియా విశ్వవిద్యాలయంలో ఎల్‌ఎల్‌బీ చదివి ఉన్నత విద్యావంతుడిగా ఎదిగారు.
కమ్యూనిస్టు సైనికుడిగా రాజకీయ ప్రస్థానం…
సుధాకర్ రెడ్డి తన రాజకీయ జీవితాన్ని పూర్తిగా సీపీఐకే అంకితం చేశారు. పార్టీలో అనేక కీలక బాధ్యతలు నిర్వహించారు. ఆంధ్రప్రదేశ్ రాష్ట్ర కౌన్సిల్ కార్యదర్శిగా, జాతీయ కార్యనిర్వాహక కమిటీ సభ్యుడిగా ఆయన సేవలు ఎనలేనివి. 2012 నుంచి 2019 వరకు సీపీఐ జాతీయ ప్రధాన కార్యదర్శిగా పార్టీని నడిపించారు. నల్గొండ నుంచి రెండుసార్లు లోక్‌సభ సభ్యుడిగా ఎన్నికై ప్రజల గొంతుకను పార్లమెంటులో వినిపించారు. తెలంగాణ సాయుధ పోరాటంలో పాల్గొన్న ఆయన, కార్మికులు, పేదల హక్కుల కోసం చివరి శ్వాస వరకు పోరాడారు.
యువతకు స్ఫూర్తి…
ప్రజా జీవితంలో ఆయన నిబద్ధత, నిస్వార్థ సేవ యువతకు స్ఫూర్తిదాయకం. అంతర్జాతీయ అంశాలపై ఆయనకు ఉన్న అవగాహన, సుదీర్ఘ రాజకీయ అనుభవం ఎందరికో ఆదర్శం. ఆయన మరణం రాజకీయ వర్గాలను, పార్టీ శ్రేణులను శోకంలో ముంచెత్తింది. పలువురు ప్రముఖులు ఆయన కుటుంబానికి ప్రగాఢ సానుభూతి తెలిపారు. సురవరం సుధాకర్ రెడ్డి చేసిన సేవలు, పోరాటాలు తెలుగు రాష్ట్రాల రాజకీయ చరిత్రలో చిరస్థాయిగా నిలిచిపోతాయి.
ముఖ్యమంత్రి రేవంత్ రెడ్డి సంతాపం…
సురవరం మృతి పట్ల ముఖ్యమంత్రి రేవంత్ రెడ్డి దిగ్భ్రాంతి వ్యక్తం చేశారు. ఆయన మరణం కార్మిక లోకానికి… కమ్యూనిస్టు పార్టీకి తీరని లోటని ఆయన పేర్కొన్నారు. మాజీ ముఖ్యమంత్రి కేసీఆర్ కూడా సంతాపం ప్రకటించారు. సీపీఐ జాతీయ ప్రధాన కార్యదర్శి రాజా, కార్యదర్శి నారాయణ, సీపీఎం ప్రధాన కార్యదర్శి ఎంఏ బేబీ, సీపీఐ రాష్ట్ర కార్యదర్శి కూనంనేని సాంబశివరావు, సీపీఎం రాష్ట్ర కార్యదర్శి జాన్ వెస్లీ తదితరులు సంతాపం ప్రకటించారు.
