- ప్రైవేట్ ఆరోగ్యశ్రీ ఆస్పత్రులకు అనారోగ్యం
- ప్రభుత్వం వద్ద రూ. 1300 కోట్లు పెండింగ్
- 31వ తేదీ అర్ధరాత్రి నుంచి వైద్య సేవలు బంద్
- ఆరోగ్యశ్రీ నెట్ వర్క్ ఆసుపత్రుల అల్టిమేటం
- సమస్యలు పరిష్కరించాలని డిమాండ్
సహనం వందే, హైదరాబాద్:
తెలంగాణ ఆరోగ్యశ్రీ పథకంలో సేవలు అందిస్తున్న నెట్‌వర్క్ ఆస్పత్రులు తీవ్ర ఆర్థిక సంక్షోభంలో కూరుకుపోయాయి. ఈ సమస్యలను పరిష్కరించకపోతే ఈనెల 31వ తేదీ అర్ధరాత్రి నుంచి సేవలను నిలిపివేస్తామని తెలంగాణ నెట్‌వర్క్ హాస్పిటల్స్ అసోసియేషన్ ఫర్ ఆరోగ్యశ్రీ (తాన్హా) అధ్యక్షులు డాక్టర్ వద్దిరాజు రాకేష్ హెచ్చరించారు. .
ఆరోగ్యశ్రీ, ఉద్యోగుల ఆరోగ్య పథకం (ఈహెచ్‌ఎస్), జర్నలిస్టుల ఆరోగ్య పథకం (జేహెచ్‌ఎస్) లాంటి పథకాల్లో సేవలు అందించడంలో ఎదురవుతున్న సమస్యలను పరిష్కరించాలని అసోసియేషన్ ఆరోగ్యశ్రీ ట్రస్ట్ సీఈఓకు విజ్ఞప్తి చేసింది. ఆర్థిక ఒత్తిడి, బకాయిలు, సరైన విధానాల లేకపోవడం వల్ల ఆస్పత్రులు మూతపడే ప్రమాదం ఉందని తాన్హా ఆందోళన వ్యక్తం చేసింది
ఆర్థిక ఒత్తిడితో ఆస్పత్రుల ఇబ్బందులు…
తెలంగాణలోని ఆరోగ్యశ్రీ నెట్‌వర్క్ ఆస్పత్రులు ఆర్థిక ఒత్తిడితో సతమతమవుతున్నాయి. ఇప్పటివరకు ప్రభుత్వం ప్రైవేట్ ఆస్పత్రులకు ఇవ్వాల్సిన ఆరోగ్యశ్రీ బకాయిలు రూ. 1300 కోట్లు పెండింగ్ లో ఉన్నాయని రాకేష్ పేర్కొన్నారు. సకాలంలో బకాయిలు అందకపోవడం వల్ల వైద్యులకు జీతాలు, ఏజెన్సీలకు బిల్లులు చెల్లించలేకపోతున్నాయి. ఈ పరిస్థితి వల్ల కొన్ని ఆస్పత్రులు మూతపడే ప్రమాదం ఏర్పడింది. డాక్టర్లు జీతాలు లేకపోవడంతో పనిచేయడానికి ఇష్టపడటం లేదు. ఏజెన్సీలు కూడా బకాయిలు చెల్లించే వరకు వైద్య పరికరాలు సరఫరా చేయడం లేదు. ఈ ఆర్థిక ఇబ్బందులు ఆస్పత్రుల సేవల నాణ్యతను దెబ్బతీస్తున్నాయి, లబ్ధిదారులకు సక్రమంగా సేవలు అందడం కష్టమవుతోందని రాకేష్ పేర్కొన్నారు.
సమస్యల పరిష్కారంలో జాప్యం…
గత జనవరిలో ఆరోగ్యశ్రీ ట్రస్ట్ అధికారులు, వైద్య ఆరోగ్యశాఖ కార్యదర్శితో జరిగిన సమావేశంలో నెట్‌వర్క్ ఆస్పత్రులు తమ సమస్యలను వివరించాయి. ఒప్పంద నిబంధనలను సవరించడం, ప్యాకేజీల రేట్లను పెంచడం, సకాలంలో చెల్లింపులు, ఫిర్యాదుల పరిష్కార విధానం ఏర్పాటు వంటి అంశాలపై చర్చించారు. అయినప్పటికీ ఈ సమస్యలు పరిష్కారం కాకపోవడంతో ఆస్పత్రులు మరింత ఇబ్బందుల్లో పడ్డాయి. గత ఆరు నుంచి ఎనిమిది నెలల్లో పరిస్థితి మరింత దిగజారిందని తాన్హా ఆవేదన వ్యక్తం చేసింది.
ట్రస్ట్ ఏకపక్ష నిర్ణయాలపై అసంతృప్తి
ఆరోగ్యశ్రీ ట్రస్ట్ నుంచి నెట్‌వర్క్ ఆస్పత్రులతో సంప్రదింపులు లేకుండా ఏకపక్షంగా సర్క్యులర్లు జారీ చేయడం మరో పెద్ద సమస్యగా ఉంది. ఈ సర్క్యులర్లు ఆస్పత్రులకు అనవసర ఆర్థిక భారం కలిగిస్తున్నాయి. అంతేకాక బకాయిలను రద్దు చేయడం, కోతలు విధించడం వంటి చర్యలు ఆస్పత్రులను మరింత ఇబ్బందుల్లోకి నెట్టాయి. ఆరోగ్యశ్రీ, ఈహెచ్‌ఎస్, జేహెచ్‌ఎస్ పథకాలను వేరు చేయడం, చెల్లింపుల్లో ప్రాధాన్యత ఇవ్వడం వంటి చర్యలు తీసుకోవాలని తాన్హా కోరుతోంది. ఈ సమస్యలను పరిష్కరించకపోతే సేవలు నిలిపివేయక తప్పదని ఆస్పత్రులు స్పష్టం చేశాయి.
సీఎంతో సమావేశం ఏర్పాటుకు డిమాండ్…
తాన్హా తమ సమస్యలను పరిష్కరించేందుకు ఆరోగ్యశ్రీ ట్రస్ట్ సీఈఓతోపాటు, వైద్య ఆరోగ్య శాఖ మంత్రి, ముఖ్యమంత్రితో సమావేశం ఏర్పాటు చేయాలని కోరుతోంది. ఈ సమావేశంలో తమ సమస్యలను నేరుగా వివరించి, శాశ్వత పరిష్కారం కోసం చర్చించాలని ఆస్పత్రులు భావిస్తున్నాయి. సీఈఓ కొత్తగా బాధ్యతలు స్వీకరించిన నేపథ్యంలో ఈ సమస్యలను వేగంగా పరిష్కరించి, ఆరోగ్యశ్రీ పథకం లబ్ధిదారులకు సేవలు సజావుగా అందేలా చర్యలు తీసుకోవాలని తాన్హా విజ్ఞప్తి చేసింది.
