- ఫీజులు, సర్టిఫికెట్లు వెనక్కి ఇవ్వని దుస్థితి
- యాజమాన్యాలతో యంత్రాంగం కుమ్మక్కు
సహనం వందే, హైదరాబాద్:
ఇంజినీరింగ్ కౌన్సెలింగ్‌లో విద్యార్థులు తీవ్ర ఇబ్బందులు పడుతున్నారు. వారికి నచ్చని కాలేజీల్లో సీట్లు కేటాయించినప్పటికీ, అధికారులు పెట్టిన నిబంధనల వల్ల వాటిని రద్దు చేసుకునే అవకాశం లేకుండా పోయింది. ఈ పరిస్థితులను కొన్ని ప్రైవేటు కాలేజీలు అవకాశంగా తీసుకుని, విద్యార్థులపై పెత్తనం చెలాయిస్తున్నాయి. నిర్దిష్టమైన కళాశాలలో చేరకపోతే ఫీజులు, ఒరిజినల్ సర్టిఫికెట్లు వెనక్కి ఇవ్వబోమని బెదిరిస్తున్నాయి. దీంతో మంచి కళాశాలలు లేదా నచ్చిన కోర్సులో సీటు వస్తుందని ఆశపడిన విద్యార్థుల కలలు అడియాశలయ్యాయి.
మూడో విడత కౌన్సెలింగ్‌తో చిక్కులు…
రెండో విడతలో సీటు పొందిన విద్యార్థులు తమకు నచ్చని కళాశాలలో తాత్కాలికంగా చేరారు. మూడో విడతలో మంచి కళాశాలలో సీటు వస్తుందనే ఆశతో వారు తమ టీసీ, ఇతర సర్టిఫికెట్లను కళాశాలలో సమర్పించి ఫీజులు చెల్లించారు. అయితే మూడో విడత కౌన్సెలింగ్‌లో వారికి ఆశించిన విధంగా సీటు లభించకపోవడంతో సర్టిఫికెట్లు తిరిగి ఇవ్వాలని కోరుతున్నారు. ఈ పరిస్థితులను ఆసరాగా చేసుకుని ప్రైవేటు కళాశాల యాజమాన్యాలు, విద్యార్థులు తమ సర్టిఫికెట్లు వెనక్కి అడిగితే అధిక మొత్తంలో ఫీజులు చెల్లించాల్సిందిగా ఒత్తిడి చేస్తున్నాయి. ఫీజు రీయింబర్స్‌మెంట్ వర్తించినప్పటికీ, అదనపు డబ్బులు చెల్లించకపోతే సర్టిఫికెట్లు తిరిగి ఇవ్వబోమని బెదిరిస్తున్నారని విద్యార్థులు ఆవేదన వ్యక్తం చేస్తున్నారు.
ప్రభుత్వ వైఖరిపై విద్యార్థి సంఘాల ఆగ్రహం
ఇప్పటికే ఉన్నత విద్యామండలి, కళాశాల విద్యాశాఖ అధికారులు ఈ సమస్యను పరిష్కరించడంలో విఫలమయ్యారని విద్యార్థి సంఘాలు మండిపడుతున్నాయి. కౌన్సెలింగ్ నిబంధనలు విద్యార్థులకు ఇబ్బందులు కలిగించే విధంగా ఉన్నాయని, ప్రైవేటు యాజమాన్యాలకు లాభాలు చేకూర్చే విధంగా అధికారులు వ్యవహరిస్తున్నారని ఎస్ఎఫ్ఐ తీవ్ర స్థాయిలో విమర్శించింది. అఖిల భారత సాంకేతిక విద్యామండలి (ఏఐసీటీఈ) నిబంధనల ప్రకారం… విద్యార్థులు తమ అడ్మిషన్‌ను రద్దు చేసుకుంటే, కళాశాలలు వారి ఫీజులను, సర్టిఫికెట్లను వెంటనే తిరిగి ఇవ్వాల్సి ఉంటుంది. కానీ తెలంగాణలో ఈ నిబంధనలు పట్టించుకోవడం లేదని ఎస్ఎఫ్ఐ ఆరోపించింది.
తక్షణమే సమస్య పరిష్కరించాలి: ఎస్ఎఫ్ఐ
విద్యార్థులకు జరుగుతున్న ఈ అన్యాయాన్ని వెంటనే నిలువరించాలని భారత విద్యార్థి ఫెడరేషన్ (ఎస్ఎఫ్ఐ) తెలంగాణ రాష్ట్ర కమిటీ డిమాండ్ చేసింది. నచ్చని సీటును రద్దు చేసుకునే వెసులుబాటును కల్పించాలని, సర్టిఫికెట్లు, ఫీజులు వెనక్కి ఇవ్వని కళాశాలలపై కఠిన చర్యలు తీసుకోవాలని కోరింది. విద్యార్థుల భవిష్యత్తును దృష్టిలో పెట్టుకుని ప్రభుత్వం తక్షణమే జోక్యం చేసుకోవాలని ఎస్ఎఫ్ఐ రాష్ట్ర అధ్యక్షుడు ఎస్. రజనీకాంత్, రాష్ట్ర కార్యదర్శి టి. నాగరాజు ఒక ప్రకటనలో కోరారు. ఈ సమస్యపై ప్రభుత్వ స్పందన కోసం విద్యార్థులు ఆశగా ఎదురుచూస్తున్నారు.
