- తిరుపతిలో తల్లీబిడ్డల కిడ్నాప్ వ్యవహారం
- నిజానిజాలు తేల్చాలని ప్రతిపక్షం డిమాండ్
సహనం వందే, తిరుపతి:
ఆరు నెలల పసికందుకు అప్పులు, వడ్డీ లెక్కలతో ఏం పని? కానీ తిరుపతి జిల్లా తొట్టంబేడు మండలం శివనాథపాలెం గ్రామంలో వెలుగుచూసిన ఘటనలో ఓ చిన్నారి అప్పుల వివాదంలో చిక్కుకుంది. గ్రామానికి చెందిన ఆది, మేఘమాల దంపతులు సుమారు ఏడు నెలల క్రితం శ్రీకాళహస్తికి చెందిన వెంకటగిరి మునెమ్మ, ప్రసాద్, మోహన్ కుటుంబం నుంచి రూ. 1.50 లక్షలు అప్పుగా తీసుకున్నారు. వడ్డీ చెల్లింపులో జాప్యం జరగడంతో ఇరువర్గాల మధ్య వివాదం మొదలైంది.
ఇంట్లో భర్త లేడు.. తల్లీబిడ్డలే లక్ష్యమా?
ఈ నెల 11న ఆది ఇంట్లో లేని సమయంలో ప్రసాద్, ఆయన కుమారుడు మోహన్ అక్కడికి వెళ్లినట్లు కుటుంబ సభ్యులు చెబుతున్నారు. వడ్డీ చెల్లించాలని మేఘమాలపై ఒత్తిడి తెచ్చారని, చివరకు ఆమెను ఒడిలో ఉన్న ఆరు నెలల బిడ్డతో సహా బలవంతంగా తమ వెంట తీసుకెళ్లారని ఆరోపిస్తున్నారు. అప్పు తీసుకున్న వ్యక్తి అందుబాటులో లేకపోతే భార్యను, పసికందును ఇబ్బందులకు గురిచేయడం ఎంతవరకు సమంజసం? డబ్బు వసూలు కోసం చట్టపరమైన మార్గాలను కాదని, ఇలా కుటుంబ సభ్యులను వేధించడం కలకలం రేపుతోంది.
వెలుగులోకి మరో కోణం
మేఘమాల, ఆమె బిడ్డ కనిపించకపోవడంతో కుటుంబ సభ్యులు పోలీసులను ఆశ్రయించగా, వారి జోక్యంతో తల్లీబిడ్డ సురక్షితంగా తిరిగి వచ్చారు. అయితే ఈ వ్యవహారంపై శ్రీకాళహస్తి డీఎస్పీ పావని తొట్టంబేడు పోలీస్స్టేషన్లో నిర్వహించిన మీడియా సమావేశంలో మరో కోణాన్ని వెల్లడించారు. మేఘమాల ఇచ్చిన రాతపూర్వక ఫిర్యాదులో వడ్డీ చెల్లించాలంటూ ఒత్తిడి చేసినట్లు మాత్రమే ఉందని, తనను బలవంతంగా తీసుకెళ్లారని లేదా నిర్బంధించారని ప్రత్యేకంగా పేర్కొనలేదని తెలిపారు. దీంతో కుటుంబ సభ్యుల ఆరోపణలకు, పోలీసుల వద్ద నమోదైన ఫిర్యాదులోని వివరాలకు మధ్య తేడా కనిపిస్తోంది.
కేసు నమోదులోనూ ప్రశ్నలు
ఈ ఘటనపై కేసు నమోదు చేసేందుకు స్థానిక న్యాయస్థానం అనుమతి కోరినట్లు డీఎస్పీ వివరించారు. ఫిర్యాదుకు సంబంధించి రసీదు ఇచ్చామని, 13న తొట్టంబేడు ఎస్ఐ జారీ చేసిన నోటీసు ప్రకారం కోర్టు అనుమతి రాగానే తదుపరి చర్యలు తీసుకుంటామని స్పష్టం చేశారు. అయితే ఒక తల్లి, చిన్నారిని బలవంతంగా తీసుకెళ్లారన్న తీవ్ర ఆరోపణలు వచ్చినప్పుడు, అసలు ఏం జరిగిందనే విషయాన్ని పోలీసులు సమగ్రంగా పరిశీలించి బాధితులకు న్యాయం చేయాల్సిన అవసరం ఉంది.
రాజకీయ విమర్శలు… నిగ్గుతేలాల్సిన నిజాలు
ఈ ఘటన రాజకీయంగానూ దుమారం రేపింది. సామాన్య కుటుంబాలకు రక్షణ కల్పించడంలో ప్రభుత్వం విఫలమైందని, అప్పు వసూలు పేరుతో పసికందును ఇంటి నుంచి ఎలా తీసుకెళ్తారని వైఎస్సార్ కాంగ్రెస్ పార్టీ నిలదీసింది. రాజకీయ విమర్శలకు మించి ఈ ఘటనలో తల్లీబిడ్డలను నిజంగానే బలవంతంగా తీసుకెళ్లారా? బెదిరింపులకు పాల్పడ్డారా? ఫిర్యాదులో అన్ని వివరాలు ఉన్నాయా? అనే ప్రశ్నలకు దర్యాప్తు ద్వారా సమాధానాలు రావాల్సి ఉంది.