దివ్యక్షేత్రం బద్రీనాథ్ యాత్రకు శ్రీకారం

• తెరుచుకున్న తలుపులు
• భక్తుల హృదయాలలో ఆనంద తరంగాలు!
• ఈసారి భక్తుల రాకపై పరిమితి లేదు
• ప్రయాణానికి నమోదు తప్పనిసరి…
• కేదార్‌నాథ్, బద్రీనాథ్‌లకు హెలికాప్టర్ సేవలు

సహనం వందే, చమోలి:

ఉత్తరాఖండ్ హిమాలయాల ఒడిలో కొలువై ఉన్న పవిత్ర బద్రీనాథ్ ధామ్, ఆరు నెలల నిరీక్షణ తర్వాత తన దివ్య ద్వారాలు తెరుచుకుంది. ఆదివారం ఉదయం వేద మంత్రాల దివ్య ధ్వనులు మారుమోగుతుండగా, మంగళకరమైన సంగీతాల నడుమ, 40 క్వింటాళ్ల సుగంధ భరిత పుష్పాల అలంకరణతో శోభాయమానంగా ఆలయ గర్భగుడి తలుపులు తెరిచారు. ఈ శుభ సందర్భంలో ఉత్తరాఖండ్ ముఖ్యమంత్రి పుష్కర్ సింగ్ ధామి కూడా పాల్గొని తొలి పూజలు నిర్వహించారు. భక్తుల హృదయాలు భక్తి పారవశ్యంతో నిండిపోయాయి. ఆలయం తలుపులు తెరుచుకున్న వెంటనే “జై బద్రీ విశాల్” అంటూ భక్తిపూర్వకమైన నినాదాలు మిన్నంటాయి. గర్వాల్ రైఫిల్స్ బృందం వారి మధురమైన భక్తి సంగీతంతో ఆలయ ప్రాంగణం ఆధ్యాత్మిక ఆనందంతో ఓలలాడింది. మొదటి రోజునే పది వేల మందికి పైగా భక్తులు శ్రీ బద్రీనారాయణుని దివ్య దర్శనం కోసం తరలివచ్చారు.

చార్ ధామ్ యాత్రలో పరమ పవిత్ర ఘట్టం…
చార్ ధామ్ యాత్రలో అత్యంత ముఖ్యమైనది బద్రీనాథ్ యాత్ర. శ్రీ మహావిష్ణువు కొలువై ఉన్న ఈ దివ్య క్షేత్రం భక్తులకు మోక్షాన్ని ప్రసాదించే శక్తి కలిగిందని విశ్వసిస్తారు. అక్షయ తృతీయ నాడు గంగోత్రి, యమునోత్రి ఆలయాలు తెరుచుకోవడంతో ప్రారంభమైన ఈ యాత్ర, ఆ తర్వాత కేదార్‌నాథ్ తలుపులు తెరుచుకోవడంతో మరింత ఉత్సాహాన్ని నింపింది. ఇప్పుడు బద్రీనాథ్ ఆలయం కూడా తెరుచుకోవడంతో 2025 చార్ ధామ్ యాత్ర పూర్తి స్థాయిలో ఆధ్యాత్మిక శోభను సంతరించుకుంది. లక్షలాది మంది భక్తులు ఈ పవిత్ర హిమాలయ ప్రాంతాలను సందర్శిస్తూ, తమ ఆత్మను శాంతింపజేసుకుంటూ, భగవంతుని ఆశీస్సులు పొందుతున్నారు.

ప్రయాణానికి నమోదు తప్పనిసరి…
ఈ దివ్య యాత్రలో పాల్గొనడానికి భక్తులు తప్పనిసరిగా తమ పేర్లను నమోదు చేసుకోవాలి. ఆన్‌లైన్, ఆఫ్‌లైన్ విధానాల ద్వారా ఈ ప్రక్రియను పూర్తి చేయవచ్చు. ఆన్‌లైన్ నమోదు ప్రక్రియ ఉత్తరాఖండ్ టూరిజం శాఖ అధికారిక వెబ్‌సైట్ (www.registrationandtouristcare.uk.gov.in) ద్వారా తమ వివరాలను (పేరు, వయస్సు, చిరునామా, ఆధార్ నంబర్) నమోదు చేసుకోవచ్చు. నమోదు పూర్తయిన తర్వాత పొందిన పర్మిట్‌ను యాత్రలో వెంట తీసుకెళ్లడం తప్పనిసరి. ఆఫ్‌లైన్ కూడా నమోదు చేసుకోవచ్చు. హరిద్వార్, రిషికేష్, డెహ్రాడూన్‌లలో ఏర్పాటు చేసిన ప్రత్యేక నమోదు కేంద్రాలలో కూడా భక్తులు తమ పేర్లను నమోదు చేసుకోవచ్చు. రిషికేష్ ట్రాన్సిట్ క్యాంప్‌లో భక్తుల తాకిడి అధికంగా ఉంది.

భక్తుల సంఖ్యపై ఎలాంటి పరిమితులు లేవు…
ఈ సంవత్సరం భక్తుల సంఖ్యపై ఎలాంటి పరిమితులు లేవని, ప్రతి ఒక్కరూ సురక్షితంగా దర్శనం చేసుకునేందుకు అన్ని ఏర్పాట్లు పూర్తి చేశామని ముఖ్యమంత్రి పుష్కర్ సింగ్ ధామి భరోసా ఇచ్చారు. ఇప్పటివరకు దాదాపు 13.5 లక్షల మంది భక్తులు ఈ పవిత్ర యాత్ర కోసం తమ పేర్లను నమోదు చేసుకున్నారు.

బద్రీనాథుని సన్నిధికి చేరే మార్గాలు…
బద్రీనాథ్ ధామ్‌కు చేరుకోవడానికి రోడ్డు, విమాన మార్గాలు అందుబాటులో ఉన్నాయి:

• రోడ్డు మార్గం: డెహ్రాడూన్, హరిద్వార్, రిషికేష్‌ల నుండి బస్సులు, టాక్సీలు నిరంతరం అందుబాటులో ఉంటాయి. రిషికేష్ నుండి బద్రీనాథ్ సుమారు 300 కిలోమీటర్ల దూరం ఉంటుంది. దీనికి 10-12 గంటల సమయం పడుతుంది. ప్రయాణం కోసం గర్వాల్ మండల్ వికాస్ నిగమ్ బస్సులను ఉపయోగించడం సురక్షితం.
• విమాన మార్గం: డెహ్రాడూన్‌లోని జాలీ గ్రాంట్ విమానాశ్రయం నుండి కేదార్‌నాథ్, బద్రీనాథ్‌లకు హెలికాప్టర్ సేవలు కూడా అందుబాటులో ఉన్నాయి. ఒకే రోజు రెండు క్షేత్రాలను సందర్శించడానికి రూ. 1.25 లక్షలు, మూడు రోజుల ప్యాకేజీ (డెహ్రాడూన్, కేదార్‌నాథ్, బద్రీనాథ్‌లో బసతో) రూ. 1.45 లక్షలు ఖర్చు అవుతుంది. ఎంఐ-17 డబుల్-ఇంజన్ హెలికాప్టర్లు ఈ మార్గంలో ప్రత్యేకంగా నడుస్తున్నాయి.

పటిష్టమైన భద్రతా ఏర్పాట్లు…
బద్రీనాథ్ యాత్ర ప్రారంభానికి ముందే ఉత్తరాఖండ్ డీజీపీ దీపం సేథ్, ఏడీజీ వి. మురుగేశన్ ఆలయ పరిసరాల్లో భద్రతా ఏర్పాట్లను క్షుణ్ణంగా పరిశీలించారు. ట్రాఫిక్ నియంత్రణ, కమ్యూనికేషన్ వ్యవస్థలు, భక్తుల రద్దీని క్రమబద్ధీకరించడానికి అదనపు పోలీసు బలగాలను నియమించారు. యాత్ర మార్గమంతటినీ ప్రత్యేక విభాగాలుగా విభజించి పోలీసుల పర్యవేక్షణలో ఉంచారు. అంతేకాకుండా పార్కింగ్ స్థలాలు, స్వచ్ఛమైన త్రాగునీరు, ఆరోగ్య సంరక్షణ సౌకర్యాలను కూడా ఏర్పాటు చేశారు అత్యవసర సాయం కోసం హెల్ప్‌లైన్ నంబర్లు (8218867005, 9058441404, 0135 2664315, టోల్-ఫ్రీ: 1070) ఎల్లప్పుడూ అందుబాటులో ఉంటాయి.

బద్రీనాథ్…ఆధ్యాత్మిక తేజోమయం
బద్రీనాథ్ ఆలయంలో కొలువై ఉన్న 3.3 మీటర్ల ఎత్తైన నల్లరాతి బద్రీనారాయణ (శ్రీ విష్ణుమూర్తి) విగ్రహం వైదిక యుగం నాటిదని పురాణాలు చెబుతున్నాయి. ఈ ఆలయం హిమాలయాల సాన్నిధ్యంలో సముద్ర మట్టానికి 3,200 మీటర్ల ఎత్తులో భారత్-టిబెట్ సరిహద్దుకు సమీపంలో ఉన్న చివరి గ్రామం మానాకు చేరువలో ఉంది. ఈ పవిత్ర యాత్ర భక్తులకు ఆధ్యాత్మిక పరిపూర్ణతను, దైవిక అనుగ్రహాన్ని ప్రసాదిస్తుందని ప్రగాఢంగా విశ్వసిస్తారు.

యాత్రికులకు ముఖ్య సూచనలు…

-బద్రీనాథ్‌లో చల్లని వాతావరణం ఉంటుంది కాబట్టి వెచ్చని దుస్తులు, సౌకర్యవంతమైన బూట్లు తప్పనిసరిగా తీసుకెళ్లాలి.

-ఎత్తైన ప్రదేశాలలో ఆరోగ్య సమస్యలు వచ్చే అవకాశం ఉన్నందున యాత్రకు ముందు వైద్య పరీక్షలు చేయించుకోవడం మంచిది.

-రిజిస్ట్రేషన్ పర్మిట్, మీ గుర్తింపు కార్డును ఎల్లప్పుడూ మీ వెంట ఉంచుకోండి.

-పర్యావరణాన్ని పరిరక్షించడం మనందరి బాధ్యత కాబట్టి, ప్లాస్టిక్ వాడకాన్ని తగ్గించి, పర్యావరణ అనుకూల ఉత్పత్తులను ఉపయోగించండి.

-బద్రీనాథ్ ధామ్ యాత్ర కేవలం ఒక ప్రయాణం కాదు. అది ఆత్మను పరమాత్మతో కలిపే ఒక దివ్య అనుభూతి. ఈ పవిత్ర యాత్రలో పాల్గొని, శ్రీ బద్రీనారాయణుని అపారమైన కరుణా కటాక్షాలను పొందండి!