అమ్మాయి చేతికి తుపాకి – మహిళల భద్రతకు మార్కెట్లో కొత్త పరికరాలు

Women Protection Pistol
  • కీచైన్‌ నుంచి పెప్పర్ స్ప్రే, స్టన్‌ పెన్‌ వరకు
  • గన్ ‌ లైసెన్స్, పోలీసుల అనుమతి లేకుంటే కటకటాలే
  • ఆయుధం కంటే అవగాహనే మిన్న
  • భయపెట్టడం కంటే అప్రమత్తతే ఎంతో ముఖ్యం

సహనం వందే, హైదరాబాద్‌:

మహిళలపై లైంగిక వేధింపులు, దాడులపై ఆందోళనలు పెరుగుతున్న నేపథ్యంలో ఆత్మరక్షణ పరికరాలకు డిమాండ్ పెరుగుతోంది. సాధారణ బ్యాగులో పెట్టుకునేంత చిన్నగా ఉండే కీచైన్ అలారాలు, పెన్నుల రూపంలో ఉండే విద్యుత్ షాక్ పరికరాలు, అత్యవసర సంకేతాలు పంపే ఆభరణాలు మార్కెట్లోకి వస్తున్నాయి. వీటితో పాటు పెప్పర్ స్ప్రేలు, కారు అద్దాలను పగలగొట్టే చిన్న సుత్తులు, ప్రత్యేకమైన టార్చ్‌లైట్లు కూడా అందుబాటులో ఉన్నాయి. అంటే మహిళలు బయటకు వెళ్లేటప్పుడు తమ వెంట తీసుకెళ్లగలిగే భద్రతా పరికరాల మార్కెట్ విస్తరిస్తోంది.

మహిళల భద్రతకు గ్యాస్‌ గన్‌లు
కార్బన్‌ డయాక్సైడ్‌ వాయువుతో పనిచేసే గ్యాస్‌ గన్‌లు మార్కెట్లోకి వస్తున్నాయి. నిజమైన పిస్టళ్లలా కనిపిస్తూ నాలుగున్నర మిల్లీమీటర్ల చిన్న తూటాలను కలిగి ఉండే వీటిని సాధారణ బొమ్మలుగా భావిస్తే పొరపాటే. వీటి సామర్థ్యాన్ని బట్టి ఆయుధ చట్ట నిబంధనలు వర్తిస్తాయి కాబట్టి, కొనుగోలు చేసే ముందే అనుమతులు, చట్టబద్ధత గురించి స్పష్టంగా తెలుసుకోవాలి.

ఇరవై జౌల్స్‌… కీలక నిబంధన!
2016 నాటి భారత ఆయుధ నిబంధనల ప్రకారం గ్యాస్‌ గన్‌ నుంచి వెలువడే తూటా శక్తి ఇరవై జౌల్స్‌ (లేదా 15 ఫుట్‌ పౌండ్లు), గొట్టం లోపలి వ్యాసం నాలుగున్నర మిల్లీమీటర్లకు మించి ఉంటే తప్పనిసరిగా లైసెన్స్‌ తీసుకోవాలి. ఈ పరిమితులకు లోబడి ఉన్న వాటికి వ్యక్తిగత లైసెన్స్‌ మినహాయింపు ఉన్నప్పటికీ, విక్రేతకు సంబంధిత అనుమతులు ఉండాలని కేంద్ర హోం వ్యవహారాల మంత్రిత్వ శాఖ స్పష్టం చేసింది. కొనుగోలుదారులు గుర్తింపు, నివాస ధ్రువీకరణ పత్రాలు సమర్పించి, తప్పనిసరిగా బిల్లు తీసుకోవాలి.

చిన్న తూటా.. పెద్ద గాయం!
మందుగుండు పేలుడు లేకపోయినా, వాయువు ఒత్తిడితో వేగంగా దూసుకొచ్చే తూటాలు కళ్లు, ముఖం, మెడకు తగిలితే ప్రాణాంతక గాయాలయ్యే ప్రమాదం ఉంది. వీటిని పిల్లలకు అందకుండా భద్రపరచాలి. సరదా కోసం ఎవరిపైనా గురిపెట్టకూడదు. బహిరంగ ప్రదేశాల్లో వీటిని చేతిలో పట్టుకుంటే నిజమైన తుపాకీగా పొరబడి ఘర్షణలు, పోలీసుల జోక్యం వంటి చిక్కులు ఎదురయ్యే అవకాశం ఉంది.

అలారం నుంచి స్టన్‌ పెన్‌ వరకు!
గ్యాస్‌ గన్‌లతో పాటు 130 డెసిబెల్స్‌ శబ్దంతో చుట్టుపక్కల వారిని అప్రమత్తం చేసే కీచైన్‌ అలారాలు, విద్యుత్‌ షాక్‌ ఇచ్చే స్టన్‌ పెన్నులు, బ్రేస్‌లెట్లు, అత్యవసర సంకేతాలు పంపే ఆభరణాలు కూడా అందుబాటులో ఉన్నాయి. పెరుగుతున్న ఆదరణతో బెంగళూరుకు చెందిన బూమ్‌బర్డ్‌ వ్యవస్థాపకురాలు సింధుజ సూరా ఇప్పటివరకు పది వేలకు పైగా పరికరాలను విక్రయించగా, 2023లో శేఖర్‌ మిశ్రా, అర్పిత దంపతులు ‘డెవిల్‌ విల్‌ క్రై’ పేరుతో పెప్పర్‌ స్ప్రేలకు ప్రత్యేక తోలు హోల్డర్లు రూపొందిస్తున్నారు. కొన్ని సంస్థలు తమ ఉద్యోగులకు పుట్టినరోజు కానుకలుగా స్టన్‌ పెన్నులను కూడా అందిస్తున్నాయి.

ఆయుధం కంటే అవగాహనే మిన్న!
భద్రతా పరికరాల నాణ్యత, చట్టపరమైన అంశాలపై పూర్తి అవగాహన లేకుండా మార్కెట్లో ఏది కనిపిస్తే అది కొనుగోలు చేయడం ప్రమాదకరం. అత్యవసర పరిస్థితుల్లో ప్రమాదకరమైన పరికరాలతో ఎదురుదాడికి దిగడం కంటే సురక్షితమైన ప్రదేశానికి చేరుకుని సాయం కోరడమే శ్రేయస్కరం. ఆత్మరక్షణ కోసం తీసుకునే నిర్ణయం చట్టపరమైన చిక్కుల్లోకి నెట్టకుండా ఉండాలంటే ఆయుధం కంటే అవగాహన, భయపెట్టడం కంటే అప్రమత్తత ఎంతో ముఖ్యం.

Share

Leave a Reply

Your email address will not be published. Required fields are marked *