కోట్లున్నా కూటికి కరువు – జీడీపీ మర్మం… అభివృద్ధి అబద్ధం

• రఘురామరాజన్ సంచలన వ్యాఖ్యలు
• దేశంలో పెరగని ప్రైవేట్ పెట్టుబడులు
• పడిపోతున్న ఉద్యోగ అవకాశాలు
• దేశ ఆర్థిక ప్రగతి వెనుక ఉన్న రహస్యం

సహనం వందే, హైదరాబాద్:

మన దేశ ఆర్థిక వ్యవస్థ దూసుకుపోతోందని రోజూ టీవీల్లోనూ, పేపర్లలోనూ గొప్పలు చెప్తుంటే మనమందరం వావ్ అనుకుంటున్నాం కదా. కానీ అసలు మన జేబుల్లోకి డబ్బులు వస్తున్నాయా? మన దేశంలో నిజంగానే ఉద్యోగాలు వస్తున్నాయా అని ఎప్పుడైనా ఆలోచించారా? సరిగ్గా ఇదే అనుమానాన్ని మన రిజర్వ్ బ్యాంక్ మాజీ గవర్నర్ రఘురామరాజన్ లేవనెత్తారు. అసలు మన జీడీపీ లెక్కలు నిజమేనా, లేక ఇందులో ఏదైనా మర్మం ఉందా అని అందరినీ షాక్ కి గురి చేశారు.

కోట్లలో వ్యాపారం… కిరాణాకు డబ్బుల్లేవ్
మీరు ఏదైనా వ్యాపారం చేస్తూ అది బాగా నడుస్తోందని… కోట్లలో ఆదాయం వస్తోందని చెప్తున్నారు అని అనుకుందాం. కానీ మీ చేతిలో మాత్రం కనీసం కిరాణా కొట్టు సామాను కొనడానికి కూడా డబ్బులు లేవనుకోండి. అప్పుడు ఆ లెక్కల వల్ల మీకు ఉపయోగం ఏం ఉంటుంది చెప్పండి. సరిగ్గా మన దేశ ఆర్థిక పరిస్థితి కూడా ఇప్పుడు అలాగే తయారైందని రిజర్వ్ బ్యాంక్ మాజీ గవర్నర్ రఘురామరాజన్ చెప్పారు. గణాంకాలు ఒకలా చెబుతుంటే, గ్రౌండ్ రియాలిటీ మాత్రం మరోలా ఉంటోంది. ఈ వైరుధ్యమే జీడీపీ లెక్కల విషయంలో దేశంలోని ఆర్థికవేత్తలకు, మేధావులకు అంతుచిక్కని ప్రశ్నగా మిగిలిపోయింది.

రఘురామరాజన్ వ్యాఖ్యల దుమారం…
మన దేశ జీడీపీ గణాంకాల గురించి ఇటీవల కాలంలో రఘురామరాజన్ చేసిన వ్యాఖ్యలు రాజకీయంగా, ఆర్థికంగా పెద్ద దుమారమే రేపుతున్నాయి. ఆయన స్పందిస్తూ తాను ఎప్పుడూ మన దేశ జీడీపీ వృద్ధి రేటును తాను పూర్తిగా తోసిపుచ్చలేదని స్పష్టం చేశారు. అయితే అసలు సమస్య అక్కడే ఉందంటూ ఆయన ఒక పెద్ద బాంబ్ పేల్చారు. మన దేశంలో జీడీపీ పెరుగుతోంది అని లెక్కలు చెబుతున్నప్పటికీ, ఆ వృద్ధికి తగినట్లుగా సమాజంలో ఫలితాలు మాత్రం కనిపించడం లేదని ఆయన అన్నారు. సాధారణంగా ఒక దేశంలో ఆర్థిక వృద్ధి వేగంగా ఉంటే అక్కడ ప్రజల జీవన ప్రమాణాలు మెరుగుపడాలి.

ప్రైవేట్ పెట్టుబడులు ఎక్కడ?
రఘురామరాజన్ వ్యక్తం చేసిన అతి పెద్ద గందరగోళం ఏమిటంటే, దేశంలో ఆర్థిక వృద్ధి లెక్కలు బాగానే వస్తున్నా దానికి తగ్గట్టుగా ప్రైవేట్ పెట్టుబడులు మాత్రం ఎందుకు రావడం లేదనే కోణంలో ఉంది. సాధారణంగా వ్యాపారస్తులు లేదా కంపెనీలు దేశం అభివృద్ధి చెందుతోంది అంటే ముందుకు వచ్చి వేల కోట్లు పెట్టుబడి పెడతారు. కానీ మన దేశంలో మాత్రం ప్రైవేట్ రంగం నుండి కొత్తగా భారీ పెట్టుబడులు రావడం లేదని ఆయన ఆందోళన వ్యక్తం చేశారు. దీనివల్ల ఆర్థిక వ్యవస్థలో నిజమైన బలం ఉందా లేదా అనే అనుమానాలు సర్వత్రా వ్యక్తమవుతున్నాయి. కేవలం కొన్ని రంగాల వృద్ధిని చూసి దేశమంతా బాగుంది అనుకోవడం పొరపాటు అని ఆయన పరోక్షంగా హెచ్చరిస్తున్నారు.

విదేశీ ప్రత్యక్ష పెట్టుబడులకు ఏమైంది?
అలాగే విదేశీ ప్రత్యక్ష పెట్టుబడుల విషయంలో కూడా ఆశించిన స్థాయిలో పురోగతి లేకపోవడం మరొక పెద్ద సమస్యగా మారింది. విదేశీ కంపెనీలు మన దేశంలో డబ్బులు పెట్టడానికి ఆసక్తి చూపకపోవడానికి గల కారణాలను మనం లోతుగా విశ్లేషించాలి. మన దేశంలో వ్యాపారం చేయడానికి ఉన్న నిబంధనలు లేదా ఇబ్బందులు దీనికి కారణం కావచ్చని నిపుణులు భావిస్తున్నారు. విదేశీ పెట్టుబడులు రాకపోతే మన దేశ సాంకేతికత, తయారీ రంగం అంతర్జాతీయ స్థాయిలో పోటీపడటం కష్టమవుతుంది. కేవలం స్వదేశీ మార్కెట్ మీద మాత్రమే ఆధారపడితే ఆర్థిక వృద్ధి ఎక్కువ కాలం నిలకడగా ఉండదు.

నిరుద్యోగ భారతం…
ఇక మన దేశ యువతను అత్యంత ఎక్కువగా వేధిస్తున్న మరో ప్రధాన సమస్య ఉద్యోగాల సృష్టి. మన దేశంలో ప్రతి ఏటా లక్షలాది మంది చదువులు పూర్తి చేసుకుని ఉద్యోగాల కోసం రోడ్డున పడుతున్నారు. కానీ ఆశించిన స్థాయిలో కొత్త ఉద్యోగాలు మాత్రం సృష్టించడం లేదని రఘురామరాజన్ చాలా స్పష్టంగా చెప్పారు. జీడీపీ వృద్ధి చెందుతోంది అంటే కంపెనీలు లాభాలు ఆర్జిస్తున్నాయి అని అర్థం, మరి ఆ లాభాలు ఎవరికి వెళ్తున్నాయనే ప్రశ్న ఇక్కడ ఉదయిస్తుంది. సామాన్య యువతకు చేతినిండా పని లేకపోతే ఆ ఆర్థిక వృద్ధి వల్ల నిజంగా ఒరిగేది ఏంటని ఆయన ప్రశ్నిస్తున్నారు. కేవలం కాగితం మీద కనిపించే అంకెలు యువతకు ఉపాధిని ఇవ్వలేవని అందరూ అర్థం చేసుకోవాలి.

కుబేరులకే పరిమితమా?
ఈ వృద్ధి రేటు ఫలాలు కేవలం కొద్దిమంది కుబేరులకే పరిమితం అవుతున్నాయా అనే అనుమానం ఇప్పుడు బలంగా వినిపిస్తోంది. దేశంలో పేదలు మరింత పేదలుగా మారుతుంటే, ధనవంతులు మరింత ధనవంతులు అవుతున్నారనే విమర్శలకు ఇది బలమైన సాక్ష్యంగా మారుతోంది. ఆర్థిక వృద్ధి అనేది సమాజంలోని అన్ని వర్గాలకు సమానంగా చేరినప్పుడే అది నిజమైన అభివృద్ధి అనిపించుకుంటుంది. లేకపోతే ఆ వృద్ధి కేవలం కాగితాలకే పరిమితమైపోతుంది.

చివరగా…
అభివృద్ధి అనే పదం కేవలం టీవీల్లో వినిపించే పదం కాకూడదు. అది ప్రతి ఒక్కరి ఇంట్లో భోజనంగా, ప్రతి యువకుడి చేతిలో ఉద్యోగంగా మారినప్పుడే ఆ అభివృద్ధికి అసలైన అర్థం ఉంటుంది. అంకెలు గొప్పగా ఉన్నా అసలు సమస్యలు అలాగే ఉంటే దానిని మనం ఏమని పిలవాలి?