- తెలియని దారుల్లో ధైర్యంగా అడుగులేయడం
- సిమ్ కార్డుల నుంచి వేల కోట్ల సామ్రాజ్యం
- కోల్డ్ మెయిల్స్ మంత్రం…26 ఏళ్లకే బిలియనీర్
సహనం వందే, హైదరాబాద్:
జీవితం అంటే మనం గీసుకున్న గీతల్లో నడవడం కాదు.. తెలియని దారుల్లో ధైర్యంగా అడుగులేయడం. ఒక సాధారణ కుర్రాడు.. చేతిలో చిల్లిగవ్వ లేని స్థితి నుంచి వేల కోట్ల ఓయో సామ్రాజ్యాన్ని ఎలా నిర్మించాడో చెప్పే అద్భుత కావ్యం రితేష్ అగర్వాల్ ప్రయాణం. ఆయన పంపిన చిన్న మెయిల్స్ ఆయన తలరాతను ఎలా మార్చాయో ఈ కథనంలో చర్చిద్దాం. ఇది కేవలం ఒక వ్యాపారవేత్త కథ కాదు.. ఆశ చావని పోరాటం.
నమ్మకమే ఒక లేఖ
మనం ఎవరినైతే కలవలేమో వారిని చేరుకునే మార్గమే కోల్డ్ ఈ-మెయిల్స్. ఉదాహరణకు ఒక సామాన్యుడు రాత్రికి రాత్రి ఒక పెద్ద వ్యాపారవేత్తకు తన ఐడియాను మెయిల్ చేయడం లాంటిది. అక్కడ పరిచయం ఉండదు. అపరిచితులకు పంపే నమ్మకపు పిలుపులు. రితేష్ తన 17 ఏళ్ల వయసులో ప్రపంచంలోని అగ్రశ్రేణి పెట్టుబడిదారులకు తన ఐడియాను వివరిస్తూ మెయిల్స్ చేసేవారు. ఎటువంటి పరిచయం లేని వ్యక్తులకు మెయిల్స్ పంపారు. ఆ మెయిల్స్ వల్లే ఆయనకు థీల్ ఫెలోషిప్ కింద సుమారు 94 లక్షల రూపాయల గ్రాంట్ లభించింది. ఒక చిన్న మెయిల్ ద్వారా అంతర్జాతీయ పెట్టుబడిదారుల దృష్టిని ఆకర్షించడం ఆయన తొలి విజయం.
అవకాశాల వంతెన
మరో ఉదాహరణ చూస్తే… హోటల్ యజమానులకు రితేష్ పంపిన మెయిల్స్ ఆయనకు వ్యాపార భాగస్వాములను తెచ్చిపెట్టాయి. హోటళ్లలో నాణ్యత లేదని.. తాను దాన్ని మెరుగుపరుస్తానని ఆయన నేరుగా మెయిల్స్ చేసేవారు. అలా ఒక చిన్న మెయిల్ ద్వారా ఒక హోటల్ యజమానిని ఒప్పించి తన మొదటి ఓయో హోటల్ను ప్రారంభించారు. ఈ చొరవే ఆయనను 26 ఏళ్లకే బిలియనీర్ను చేసింది. 9400 కోట్ల రూపాయల వ్యక్తిగత సంపదకు ఆ కోల్డ్ మెయిల్స్ పునాది వేశాయి.
మనసులోని వెలుగు
రితేష్ చెప్పిన మొదటి సూత్రం సానుకూల దృక్పథం. మనం పంపే మెయిల్కు రిప్లై రాకపోవచ్చని అనుకుంటే.. అసలు ప్రయత్నమే మొదలవ్వదు. తన మెయిల్ ఖచ్చితంగా ఎవరో ఒకరిని చేరుతుందని ఆయన నమ్మారు. ఆ నమ్మకమే ఆయనలోని స్వయం అనుమానాన్ని పటాపంచలు చేసింది. మన ఆలోచనలు బాగున్నప్పుడే మన చుట్టూ ఉన్న ప్రపంచం కూడా మారుతుంది. సానుకూలత అనేది వ్యాపారానికి మాత్రమే కాదు.. మనిషి మనసుకి కూడా ఒక ఇంధనం లాంటిది.
ముందడుగు వేయడం
భారతదేశం ఇప్పుడు అవకాశాల అడ్డాగా మారింది. కానీ చాలా మంది యువత సంకోచంతో ఆగిపోతున్నారు. అపరిచితుడికి మెయిల్ చేస్తే ఏమనుకుంటారో అనే భయం వారిని అడ్డుకుంటోంది. రితేష్ ఆ భయాన్ని జయించారు. ఆయన దృష్టిలో భయం ఉన్నా సరే ముందుకు సాగడమే అసలైన విజయం. ఆగిపోవడం అంటే ఓడిపోవడం అని ఆయన నమ్ముతారు. మన సంకోచమే మన కలలకి సంకెళ్లు వేస్తుందని… వాటిని తెంచుకుని బయటకు రావాలని ఆయన పిలుపునిచ్చారు.
నిరంతర జ్ఞానాన్వేషణ
జ్ఞానం అనేది అంతం లేని మహాసముద్రం. రితేష్ తన టీనేజ్ రోజుల్లోనే స్టార్టప్ మీటింగ్లకు దొంగచాటుగా వెళ్లేవారు. భోజనం కోసం వెళ్లినా అక్కడ జరిగే చర్చల నుంచి ఎంతో నేర్చుకున్నారు. తెలియని ప్రతి విషయాన్ని అడిగి తెలుసుకోవడంలో ఆయనకు మొహమాటం లేదు. నేర్చుకోవాలనే తపన ఉన్న చోట విజయం ఆటోమేటిక్ గా వస్తుంది. అందుకే నిరంతరం నేర్చుకుంటూ మారుతున్న ప్రపంచానికి అనుగుణంగా మనల్ని మనం మార్చుకోవాలి.
జీవన వేదం
జీవితంలో ఏదీ సులభంగా రాదు… కానీ ప్రయత్నిస్తే ఏదీ అసాధ్యం కాదు. సిమ్ కార్డులు అమ్మడం నుంచి ప్రపంచ స్థాయి బిలియనీర్ వరకు సాగిన ఈ ప్రయాణంలో ఎన్నో కష్టాలు ఉన్నాయి. అపరిచితులకు పంపిన ఆ చిన్న కోల్డ్ మెయిల్స్ ఆయనను ఈ స్థాయికి చేర్చాయి. పట్టుదల ఉంటే ఆకాశమే హద్దు అని రితేష్ అగర్వాల్ నిరూపించారు. యువత తమ కలలను వెంబడించాలని… నిరంతరం చొరవ తీసుకోవాలని ఆయన కోరుతున్నారు. ఆయన కథ ఒక వ్యక్తి విజయం కాదు.. ఒక తరానికే స్ఫూర్తి.
