ఆకాశంలో ఆరు గ్రహాల ఊరేగింపు – రేపు ఒకే లైన్‌లో లోకాల విందు

• వరుస కట్టిన అంతరిక్ష గోళాలు
• ఆరు గ్రహాల చారిత్రాత్మక కలయిక
• సూర్యాస్తమయం తర్వాతే పండుగ
• టెలిస్కోప్ ఉంటేనే మరింత స్పష్టం

సహనం వందే, హైదరాబాద్:

అంతరిక్షంలో అరుదైన దృశ్యం ఆవిష్కృతం కానుంది. ఒకే వరుసలో ఆరు గ్రహాల కొలువు ఖగోళ ప్రియులను అలరించనున్నాయి. ఈ గ్రహాల కవాతును చూడాలంటే సమయం, సరైన ప్రదేశం ముఖ్యం. ప్రకృతి ప్రసాదించే ఈ అద్భుతాన్ని వీక్షించేందుకు ప్రపంచవ్యాప్తంగా ఏర్పాట్లు జరుగుతున్నాయి. మేఘాలు అడ్డుపడకుంటే ఈ విందును స్పష్టంగా చూడవచ్చు.

హైదరాబాద్‌లో ఎప్పుడు చూడాలి?
ముంబైతోపాటు హైదరాబాద్‌లో ఆదివారం ఈ గ్రహాల పరేడ్ అత్యంత స్పష్టంగా కనిపిస్తుంది. ఆ రోజు సాయంత్రం సూర్యాస్తమయం తర్వాత ఆకాశం వైపు చూడాలి. బీజింగ్, బెర్లిన్, లండన్ నగరాలతోపాటు మన నగరంలో కూడా అదే రోజున ఉత్తమ వీక్షణ అవకాశం ఉంటుంది. ఆకాశం నిర్మలంగా ఉంటేనే ఈ గ్రహాలను గుర్తుపట్టడం సాధ్యమవుతుంది.

దేశవ్యాప్త వీక్షణ సాధ్యమేనా?
భారతదేశవ్యాప్తంగా అన్ని ప్రాంతాల్లో దీనిని చూడవచ్చు. అయితే పశ్చిమ దిశలోని హోరిజన్ స్పష్టంగా కనిపించే ప్రాంతాలను ఎంచుకోవాలి. ఎత్తైన భవనాలు లేదా చెట్లు అడ్డుగా లేని చోట నిలబడితేనే బుధుడు, శుక్రుడు వంటి గ్రహాలను చూడగలరు. ఇవి ఆకాశంలో చాలా కిందకు కనిపిస్తాయి కాబట్టి మైదాన ప్రాంతాలు లేదా టెర్రస్‌లు ఉత్తమమైనవి. స్థానిక ఖగోళ సంఘాల సాయంతో వీటిని మరింత స్పష్టంగా చూడవచ్చు.

సమయం… దిశ
సూర్యుడు అస్తమించిన కొద్దిసేపటికే ఈ గ్రహాలన్నీ ఆకాశంలో ఒకే భాగంలో కనిపిస్తాయి. బుధుడు, శుక్రుడు, శని, నెప్ట్యూన్ గ్రహాలు పశ్చిమ ఆకాశంలో హోరిజన్‌కు దగ్గరగా కిందకు ఉంటాయి. గురు గ్రహం మాత్రం ఆకాశంలో ఎత్తులో జెమిని నక్షత్ర మండలంలో ప్రకాశవంతంగా కనిపిస్తుంది. యురేనస్ గ్రహం టారస్ నక్షత్ర మండలంలో ఉండి అర్ధరాత్రి వరకు ఆకాశంలోనే ఉంటుంది.

కనిపించే గ్రహాలు ఇవే
మొత్తం ఆరు గ్రహాలు ఈ వరుసలో ఉన్నాయి. బుధుడు, శుక్రుడు, శని, గురు గ్రహాలను మనం కంటితోనే నేరుగా చూడవచ్చు. కానీ యురేనస్, నెప్ట్యూన్ గ్రహాలను చూడటానికి కచ్చితంగా బైనాక్యులర్లు లేదా టెలిస్కోప్ అవసరమవుతాయి. శనివారం ఇవి ఒకే దగ్గరగా గుంపుగా ఉన్నట్లు కనిపిస్తాయి. ప్రాంతాన్ని బట్టి ఈ తేదీల్లో చిన్న మార్పులు ఉంటాయి. జెస్ లీ ప్రకారం ఇది ఒక గొప్ప అవకాశం.

వాతావరణం అడ్డుపడనుందా?
ఈ వారాంతంలో వాతావరణం మిశ్రమంగా ఉండే అవకాశం ఉందని సైమన్ కింగ్ తెలిపారు. ఆకాశం మేఘావృతమై ఉంటే గ్రహాలను చూడటం కష్టమవుతుంది. ఇంగ్లాండ్, వేల్స్ ప్రాంతాల్లో శనివారం రాత్రి ఆకాశం నిర్మలంగా ఉండవచ్చు. ఆదివారం కొన్ని ప్రాంతాల్లో మాత్రమే స్పష్టత ఉంటుంది. మన దేశంలో కూడా స్థానిక వాతావరణ పరిస్థితులపైనే ఈ వీక్షణ ఆధారపడి ఉంటుంది.

చీకటిలో కళ్ల సర్దుబాటు
మందకొడి వెలుతురులో గ్రహాలను గుర్తించడానికి కళ్లకు సమయం ఇవ్వాలి. బయటకు వెళ్లే ముందు కనీసం 10 నిమిషాలు చీకటి గదిలో ఉండాలని బెకీ స్మథర్స్ సూచించారు. దీనివల్ల ఆకాశంలోని మసక వస్తువులను వెంటనే గుర్తుపట్టవచ్చు. చలి ఎక్కువగా ఉంటే వెచ్చని దుస్తులు ధరించడం ముఖ్యం. మొబైల్ యాప్‌లు వాడేటప్పుడు రెడ్ లైట్ ఫీచర్ వాడాలి. ఇది రాత్రి చూపును దెబ్బతీయకుండా కాపాడుతుంది.