- కొన్న గంటలకే డిస్‌ప్లే క్రాక్… ఫోల్డ్ చేస్తే కరకర శబ్దం
- సెంటర్ క్రీజ్ వద్ద పగుళ్లు… ఐఫోన్ డ్యూయో ప్లాప్
- బాధితుల కన్నీళ్లు… యాపిల్‌పై ఆగ్రహం
సహనం వందే, హైదరాబాద్:
లక్షల రూపాయలు తగలేసి కొన్న డ్రీమ్ ఫోన్, చేతికి వచ్చిన కొన్ని గంటల్లోనే ముక్కలైపోతే ఆ బాధ వర్ణనాతీతం. టెక్ ప్రపంచంలో సరికొత్త ట్రెండ్ సృష్టిస్తుందని ఆర్భాటంగా మార్కెట్లోకి అడుగుపెట్టిన యాపిల్ నయా ప్రయోగం ‘ఐఫోన్ డ్యూయో’ ఇప్పుడు కొనుగోలుదారుల కంట కన్నీళ్లు తెప్పిస్తోంది. ప్రీమియం క్వాలిటీకి మారుపేరుగా చెప్పుకునే యాపిల్ సంస్థ, సరిగ్గా టెస్టింగ్ కూడా చేయకుండానే అరకొర డిజైన్‌తో ఈ ఫోన్‌ను కస్టమర్ల నెత్తిన రుద్దిందా అనే అనుమానాలు తీవ్రమవుతున్నాయి.
ఆర్భాటం ఎక్కువ, నాణ్యత తక్కువ!
సంవత్సరాల తరబడి పరిశోధనలు చేసి, మార్కెట్‌ను ఏలేస్తామని యాపిల్ గొప్పలు చెప్పుకున్న ఉత్పత్తులలో ఐఫోన్ డ్యూయో ఒకటి. కానీ తీరా మార్కెట్లోకి వచ్చాక అసలు రంగు బయటపడింది. యాపిల్ ఈ ఫోల్డబుల్ మోడల్‌ను అత్యంత ప్రమోషన్ల మధ్య విడుదల చేసినప్పటికీ, కస్టమర్ల చేతికి వచ్చిన తొలి రోజు నుంచే ఇది ఒక పెద్ద విఫల ప్రయోగంగా మిగిలిపోతోంది. అడ్వాన్స్‌డ్ టెక్నాలజీ అని నమ్మి లక్షలు చెల్లించిన యాపిల్ అభిమానులకు ఈ ప్రయోగం తీరని భంగపాటునే మిగిల్చింది.
గంటల వ్యవధిలోనే పగిలిపోతున్న స్క్రీన్లు
ఫోన్ కొనుగోలు చేసి కేవలం కొన్ని గంటలు లేదా రోజుల వ్యవధిలోనే ప్రధాన ఫోల్డబుల్ డిస్‌ప్లే పూర్తిగా దెబ్బతింటోందని వినియోగదారులు గగ్గోలు పెడుతున్నారు. సాధారణంగా ఫోల్డబుల్ ఫోన్లను రోజుకు వందల సార్లు మడతపెట్టి వాడుతుంటారు. కానీ ఐఫోన్ డ్యూయో మాత్రం కనీసం కొన్ని సార్లు ఓపెన్ చేసేసరికే పగుళ్ల బారిన పడుతుండటం దిగ్భ్రాంతి కలిగిస్తోంది. ఇది కేవలం ఏదో ఒక్క ఫోన్‌లో వచ్చిన సాంకేతిక లోపం కాదని, తయారీలోనే ఉన్న తీవ్రమైన ప్రాథమిక లోపమని టెక్ నిపుణులు స్పష్టం చేస్తున్నారు.
క్రాకింగ్ సౌండ్.. నడిమధ్యలో పగుళ్లు
వినియోగదారులు తెలిపిన వివరాల ప్రకారం, ఈ ఫోన్‌ను తెరిచేటప్పుడు హింజ్ (మడత మెకానిజం) భాగం నుంచి ఒక రకమైన కరకరలాడే శబ్దం స్పష్టంగా వినిపిస్తోంది. ఆ శబ్దం వచ్చిన మరుక్షణం స్క్రీన్ మధ్యభాగంలో ఉన్న క్రీజ్ వెంబడి ఒక పెద్ద చీలిక ఏర్పడుతోంది. ఎలాంటి ఒత్తిడి లేకుండా, చేతిలోంచి కింద పడకుండానే స్క్రీన్ దానంతట అదే పగిలిపోవడం వినియోగదారులను భయాందోళనకు గురిచేస్తోంది. లక్షలు వెచ్చించిన ఫోన్ ఇలా కొద్ది సేపట్లోనే కళ్లముందే నాశనమవుతోందని బాధితులు ఆవేదన వ్యక్తం చేస్తున్నారు.
బిజినెస్ స్టాండర్డ్ నివేదికల సంచలనం
ఈ వ్యవహారంపై ప్రముఖ అంతర్జాతీయ మీడియా సంస్థ బిజినెస్ స్టాండర్డ్ ప్రచురించిన కథనం ప్రస్తుతం టెక్ ప్రపంచంలో సంచలనం సృష్టిస్తోంది. సోషల్ మీడియా ప్లాట్‌ఫామ్‌లలో, యాపిల్ సపోర్ట్ పేజీలలో కొనుగోలుదారులు పెడుతున్న ఫిర్యాదులు, ఆధారాలను ఈ నివేదిక బహిర్గతం చేసింది. గ్లోబల్ మార్కెట్‌తో పాటు వివిధ ప్రాంతాల వినియోగదారులు సేమ్ టు సేమ్ సమస్యను నివేదించారని ఈ నివేదికలు స్పష్టం చేస్తున్నాయి. కస్టమర్ కేర్ నుంచి సరైన స్పందన రాకపోవడంతో బాధితులు తమ ఆక్రోశాన్ని నెట్టింట పోస్ట్ చేస్తున్నారు.
కస్టమర్ల నెత్తిపై ప్రయోగాలు..
ఫోల్డబుల్ మార్కెట్లో శామ్‌సంగ్ వంటి ప్రత్యర్థి కంపెనీలు ఇప్పటికే అనేక మోడళ్లను మెరుగుపరుచుకుంటూ ముందుకు వెళ్లాయి. అయితే ఆలస్యంగా వచ్చినా యాపిల్ ఒక పర్ఫెక్ట్ ప్రొడక్ట్‌తో వస్తుందని కస్టమర్లు ఆశించారు. కానీ కనీస నాణ్యతా ప్రమాణాలు పాటించకుండా, వినియోగదారులను ప్రయోగశాల ఎలుకలుగా వాడుకుంటూ ఇలాంటి సగం కాలిన ప్రొడక్ట్‌ను మార్కెట్లోకి వదలడంపై తీవ్ర విమర్శలు వ్యక్తమవుతున్నాయి. ఇంత భారీ లోపం వెలుగు చూసినా యాపిల్ స్పందిస్తున్న తీరుపై కస్టమర్లు మండిపడుతున్నారు.
చేతులెత్తేస్తే ఎలా?
టెక్నాలజీ పేరుతో లక్షల రూపాయలు గుంజే కంపెనీలు, మన్నిక విషయంలో ఇలా చేతులెత్తేస్తే కస్టమర్ల నమ్మకం ఆవిరైపోతుంది. బ్రాండ్ ఇమేజ్ చూసి కొనుగోలు చేసే ప్రజలకు ఇలాంటి అనుభవాలు తీవ్ర మానసిక వేదనను మిగులుస్తాయి. మరి ఈ ఐఫోన్ డ్యూయో డిజాస్టర్‌పై యాపిల్ సంస్థ ఎలా స్పందిస్తుందో, బాధితులకు ఎలాంటి పరిహారం అందిస్తుందో వేచి చూడాలి.
