- చనిపోయిన వారితోనూ మళ్లీ యాక్షన్ సీన్లు
- ఎడిటింగ్, సంగీతం లాంటి విభాగాల్లోనూ ఏఐ
సహనం వందే, హైదరాబాద్:
భారతీయ సినీ పరిశ్రమలో ఆర్టిఫిషియల్ ఇంటెలిజెన్స్ (ఏఐ) విప్లవాత్మక మార్పులు తెస్తోంది. షకున్ బత్రా లాంటి దర్శకులు తమ ‘ది గెటవే కార్’ చిత్రంలో విజువల్ ఎఫెక్ట్స్, స్క్రిప్ట్ తయారీకి ఏఐని వాడి సరికొత్త పద్ధతులను పరిచయం చేశారు. ‘ఏఐ మా క్రియేటివ్ పనులు వేగవంతం చేస్తుంది. కొత్త ఆలోచనలకు ఇంధనంలా పనిచేస్తుంద’ని బత్రా గట్టిగా చెబుతున్నారు. వార్ లార్డ్ వంటి భారీ చిత్రాల్లో ఏఐ డీప్ ఫేక్ టెక్నాలజీతో పాత నటుల పోలికలను తిరిగి సృష్టించడం, తద్వారా నిర్మాణ ఖర్చులను గణనీయంగా తగ్గించడం చూస్తుంటే ఏఐ చిన్న బడ్జెట్ సినిమాలకు కూడా గొప్ప వరంలా కనిపిస్తోంది. స్క్రిప్టులు రాయడం, ఎడిటింగ్ చేయడం, సంగీతం అందించడం లాంటి విభాగాల్లోనూ ఏఐ సరికొత్త సాధనాలను భారతీయ చిత్రకారులకు అందిస్తోంది. ఏఐ స్టార్టప్లు మన సినిమా కోసం ప్రత్యేకంగా టూల్స్ అభివృద్ధి చేస్తుండటం, భవిష్యత్తులో మన సినిమాను అంతర్జాతీయ స్థాయికి తీసుకెళ్లే అవకాశాలను సూచిస్తోంది.
ఎథిక్స్… ఒరిజినాలిటీకి పెను ప్రమాదం
అయితే ఏఐ తీసుకువస్తున్న ఈ విప్లవం వెనుక తీవ్రమైన భావోద్వేగ సమస్యలు ప్రశ్నలు దాగి ఉన్నాయి. 2013లో విడుదలైన ‘రానఝానా’ చిత్రం ముగింపును ఏఐతో మార్చడం, హీరో మరణాన్ని మార్చివేయడం తీవ్ర వివాదానికి దారితీసింది. ఇది సినిమా ఒరిజినల్ భావనాత్మకతను దెబ్బతీసిందనే విమర్శలు ఫ్యాన్స్, విమర్శకుల నుంచి వచ్చాయి. ఇలా సమ్మతి లేకుండా సృజనాత్మక హక్కులను మార్చే అవకాశం ఏఐకి ఇవ్వకూడదని ఓ ప్రముఖ దర్శకుడు ఆందోళన వ్యక్తం చేశారు. ఏఐ డీప్ ఫేక్ల ద్వారా పాత చిత్రాల్లో మార్పులు చేయడం నటుల ఇమేజీకి, దర్శకుల సృజనాత్మక నియంత్రణకు ముప్పుగా మారింది. ఏఐ రూపొందించిన కంటెంట్కు కాపీరైట్ ఎవరికి ఉంటుంది అనే ప్రశ్నకూ సమాధానం దొరకడం లేదు. ఏఐని ఒక సాధనంలా మాత్రమే వాడాలి… కానీ అది మన సృజనాత్మకతను శాసించకూడదని భారతీయ ఫిల్మ్ ఇన్స్టిట్యూట్ నిపుణులు హెచ్చరిస్తున్నారు.
బాలీవుడ్ నుంచి టాలీవుడ్ దాకా…
భారతీయ సినిమా తనదైన ప్రత్యేక భావోద్వేగ కథనాలతో ప్రపంచవ్యాప్తంగా పేరు గాంచింది. ఏఐ యుగంలో ఈ సృజనాత్మకత మరింత పెరుగుతుందా? లేక దానికి ముప్పుగా మారుతుందా? అనే ప్రశ్న ఇప్పుడు బాలీవుడ్, టాలీవుడ్లలో ప్రధాన చర్చనీయాంశంగా మారింది. ఏఐ కొత్త కథలను, అద్భుతమైన విజువల్స్ను సులభంగా సృష్టించడంలో సాయపడుతుందని… తద్వారా మన ఆలోచనలను విస్తరిస్తుందని టెక్ నిపుణులు వాదిస్తున్నారు. కానీ ఏఐ ఒరిజినల్ భావాలను కాపీ చేసి, సినిమాలను ఒక ఫార్ములా ప్రకారం మార్చేస్తుందని విమర్శకులు ఆందోళన వ్యక్తం చేస్తున్నారు.
