కేంద్ర ప్రభుత్వానికి రాహుల్ గాంధీ విజ్ఞప్తి
– కర్ణాటక, తెలంగాణల్లో ఇలాంటి చట్టాలు
సహనం వందే, ఢిల్లీ:
దళిత, గిరిజన వర్గాల సంక్షేమానికి కేంద్ర బడ్జెట్‌లో నిర్దిష్ట వాటా కేటాయించేలా జాతీయ చట్టం తీసుకురావాలని కాంగ్రెస్ అధినేత రాహుల్ గాంధీ డిమాండ్ చేశారు. ఈ మేరకు శుక్రవారం దళిత, గిరిజన వర్గాల పరిశోధకులు, కార్యకర్తలు, సామాజిక కార్యకర్తల ప్రతినిధి బృందంతో ఆయన సమావేశమయ్యారు. ఈ వర్గాలకు బడ్జెట్‌లో నిర్దిష్ట వాటా కేటాయించడానికి జాతీయ చట్టం తీసుకురావాలన్న వారి డిమాండ్‌కు ఆయన మద్దతు తెలిపారు. కర్ణాటక, తెలంగాణ రాష్ట్రాల్లో ఇలాంటి చట్టాలు అమల్లో ఉన్నాయని, వీటి వల్ల ఆయా వర్గాలకు గణనీయమైన ప్రయోజనాలు చేకూరాయని రాహుల్ గాంధీ పేర్కొన్నారు. దళితులు, గిరిజనులకు పాలనలో అర్థవంతమైన ప్రాతినిధ్యం, గొంతుక ఉండేలా నిర్దిష్ట చర్యలు తీసుకోవాల్సిన అవసరం ఉందని ఆయన నొక్కి చెప్పారు.
యూపీఏ పాలనలో సబ్-ప్లాన్‌లు…
యూపీఏ ప్రభుత్వం జాతీయ స్థాయిలో దళితులు, గిరిజనుల కోసం సబ్-ప్లాన్‌లను ప్రవేశపెట్టిందని, అయితే ప్రస్తుత ప్రభుత్వం ఈ నిబంధనలను బలహీన పరిచిందన్నారు. ఫలితంగా ఈ వర్గాలకు బడ్జెట్‌లో చాలా తక్కువ వాటా మాత్రమే అందుతోందని రాహుల్ గాంధీ ఆవేదన వ్యక్తం చేశారు. దళితులు, గిరిజనుల అవసరాలను తీర్చడానికి ప్రత్యేకంగా రూపొందించిన పథకాలకు బడ్జెట్‌లో సరైన వాటా ఉండేలా జాతీయ చట్టం తీసుకురావడం అవసరమని ఆయన స్పష్టం చేశారు.
సీడీఎస్ ఛైర్‌పర్సన్ స్పందన…
సెంటర్ ఫర్ దళిత స్టడీస్ (సీడీఎస్) ఛైర్‌పర్సన్ మల్లేపల్లి లక్ష్మయ్య మాట్లాడుతూ, “మా చర్చలకు రాహుల్ గాంధీ సానుకూలంగా స్పందించారు. హిమాచల్ ప్రదేశ్, జార్ఖండ్‌లలో కూడా ఈ చట్టాన్ని అమలు చేయాలని మేము కోరాము. ఎస్సీ/ఎస్టీ సబ్-ప్లాన్ చట్టం మెరుగ్గా అమలు జరిగేలా కర్ణాటక, తెలంగాణ రాష్ట్రాలు సమగ్ర సమీక్ష నిర్వహించాల”ని కోరారు.
ప్రతినిధి బృందంలో ప్రముఖులు…
రాహుల్ గాంధీని కలిసిన ఈ ప్రతినిధి బృందంలో నేషనల్ క్యాంపెయిన్ ఆన్ దళిత హ్యూమన్ రైట్స్ (ఎన్‌సీడీహెచ్ఆర్) వ్యవస్థాపకుడు పాల్ దివాకర్, ఎన్‌సీడీహెచ్ఆర్ కు చెందిన బీనా పలికల్, అశోక్ భారతి, ప్రముఖ దళిత మహిళా హక్కుల కార్యకర్త మంజుల ప్రదీప్ ఉన్నారు.
