- ఫోన్ పక్కన నిద్ర పోతే క్యాన్సర్ వస్తుందట
- ఏఐ సాయంతో 84 శాతం నకిలీ చిట్కాలు
- ఐదుగురిలో ఒకరు నకిలీలను నమ్మేస్తున్నారు
- నకిలీ ఆరోగ్య కంటెంట్ను కుమ్మరిస్తున్నారు
సహనం వందే, హైదరాబాద్:
ఇంటర్నెట్ ప్రపంచంలో నకిలీ వైద్యం పడగ విప్పుతోంది. కృత్రిమ మేధతో సృష్టించిన నకిలీ వైద్యులు టిక్టాక్లో తప్పుడు ఆరోగ్య సలహాలను ప్రచారం చేస్తూ ప్రజల ప్రాణాలతో చెలగాటం ఆడుతున్నారు. ఈ దారుణమైన పరిస్థితిపై నిపుణులు తీవ్ర ఆందోళన వ్యక్తం చేస్తున్నారు.
ఏఐ వైద్యుల కోట్లాది వ్యూస్
కృత్రిమ మేధతో సృష్టించిన నకిలీ వైద్యుల ఖాతాలు టిక్టాక్లో కోట్లాది వ్యూస్ను సాధిస్తున్నాయి. ఇంగ్లాండ్లోని హ్యాలమ్ డిజిటల్ మార్కెటింగ్ ఏజెన్సీ ఈ నెలాఖరులో ఈ పరిశోధనను ప్రచురించింది. టిక్టాక్లో అత్యధికంగా చూసిన ఆరోగ్య సంబంధిత వీడియోలలో 40 శాతం మేర కృత్రిమ మేధ సృష్టించిన కంటెంటే కనిపిస్తోంది. ఆరోగ్య చిట్కాలు అనే పదాన్ని వెతికినప్పుడు 84 శాతం వీడియోలు కృత్రిమ మేధతో కూడినవే ఉన్నట్లు తేలింది. ఈ నకిలీ వైద్యులు సగటున 25 లక్షల వ్యూస్ను దక్కించుకుంటున్నారు.
ప్రాణాంతక క్యాన్సర్ అబద్ధాలు
ప్లాస్టిక్లో ఆహారాన్ని వేడి చేయడం, డియోడరెంట్లు వాడడం, ఫోన్ పక్కన పెట్టుకుని పడుకోవడం వల్ల క్యాన్సర్ వస్తుందంటూ ఈ నకిలీ ఖాతాలు ప్రచారం చేస్తున్నాయి. క్యాన్సర్ రీసెర్చ్ యూకే సంస్థ ఈ నిరాధార వార్తలను పూర్తిగా ఖండించింది. ఆన్లైన్ ఆరోగ్య తప్పుడు సమాచారం ప్రజారోగ్యానికి నిజమైన ముప్పు అని ఎన్హెచ్ఎస్ హెచ్చరించింది. బ్రిటీష్ మెడికల్ అసోసియేషన్ కౌన్సిల్ డిప్యూటీ చైర్ డాక్టర్ ఎమ్మా రన్స్విక్ మాట్లాడుతూ ఈ నకిలీ ఖాతాలు వైద్య వదంతులను, అద్భుత నివారణలను ప్రచారం చేస్తున్నాయని ఆందోళన వ్యక్తం చేశారు. ప్రాణాలతో చెలగాటం ఆడుతున్న టిక్టాక్ వంటి వేదికలు దీనిని ఆపాలని ఆమె హెచ్చరించారు.
విచిత్రమైన నకిలీ చిట్కాల మోసం
ఈ నకిలీ ఖాతాలు రకరకాల ఆరోగ్య సమస్యల కోసం కోకోకోలాలో ఉల్లిపాయ కలిపి తాగడం వంటి విచిత్రమైన నివారణలను ప్రచారం చేస్తున్నాయి. హయాలేథినాప్ ప్లస్ ప్రో మాక్స్ అనే నకిలీ యాంటీ ఏజింగ్ ఉత్పత్తిని కూడా ఇవి సిఫారసు చేశాయి. జుట్టు రాలడం, చర్మం బలహీనపడటం, గోర్లు విరగడం, కీళ్ల నొప్పులను తగ్గిస్తుందని ఒక ఏఐ అవతార్ చెప్పుకొచ్చింది. అయితే ఆన్లైన్లో ఈ ఉత్పత్తికి సంబంధించిన ఎలాంటి ఆధారాలు లభించలేదు.
పరిశోధన వెల్లడించిన భయానక నిజాలు
హ్యాలమ్ సంస్థ మొత్తం 1198 వీడియోలను విశ్లేషించింది. ఆరోగ్య చిట్కాలు, వైద్యుల సలహాలు వంటి కీలకమైన పదాలతో పాటు వ్యక్తిగత ఆర్థిక వృద్ధి, విద్య వంటి అంశాలపై టాప్ 50 వీడియోలను పరిశీలించింది. యూనివర్సిటీ కాలేజ్ లండన్ ఆరోగ్య తప్పుడు సమాచార పరిశోధకుడు అలెక్స్ రువానీ మాట్లాడుతూ కృత్రిమ మేధ వైద్యుల వీడియోలు నకిలీ ఆరోగ్య కంటెంట్ను విపరీతంగా పెంచుతున్నాయని తెలిపారు. ఇది నమ్మకాన్ని దెబ్బతీసే పద్ధతి అని ఆమె హెచ్చరించారు.
సోషల్ మీడియాలో ఆరోగ్య సమాచార వేట
ఇంగ్లాండ్లో హెల్త్వాచ్ ఇంగ్లాండ్ తరఫున సవాంటా సంస్థ గత ఏడాది 18 సంవత్సరాలు పైబడిన 3575 మంది పురుషులు, 3832 మంది మహిళలపై సర్వే నిర్వహించింది. ప్రతి ఐదుగురిలో ఒకరు ఆరోగ్య సమాచారం కోసం సోషల్ మీడియాను ఆశ్రయిస్తున్నట్లు ఆ సర్వే తేల్చింది. నమ్మదగిన సమాచారాన్ని, వాణిజ్య మోసాలను గుర్తించే నైపుణ్యాలు లేకపోవడం వల్ల ప్రజలు తీవ్రంగా మోసపోతున్నారని హెల్త్వాచ్ ఇంగ్లాండ్ పాలసీ డైరెక్టర్ విలియం పెట్ తెలిపారు.
వేదికల బాధ్యతపై తీవ్ర విమర్శలు
ఈ పరిశోధన ఫలితాలు తమ ప్లాట్ఫారమ్ను కచ్చితంగా ప్రతిబింబించవని టిక్టాక్ ప్రతినిధి స్పష్టం చేశారు. హానికరమైన ఆరోగ్య తప్పుడు సమాచారాన్ని, కృత్రిమ మేధ కంటెంట్ను తొలగిస్తున్నామని తెలిపారు. ప్రపంచ ఆరోగ్య సంస్థ, ఎన్హెచ్ఎస్లతో కలిసి నమ్మదగిన సమాచారాన్ని అందిస్తున్నామని చెప్పారు. ఎన్హెచ్ఎస్ ఇంగ్లాండ్ నేషనల్ మెడికల్ డైరెక్టర్ ప్రొఫెసర్ ఫ్రాంకీ స్వోర్డ్స్ మాట్లాడుతూ క్లిక్ల కోసం తప్పుడు సలహాలు ఇస్తుండటం కలవరపెడుతోందన్నారు. రాయల్ కాలేజ్ ఆఫ్ జీపీఎస్ అధ్యక్షుడు ప్రొఫెసర్ విక్టోరియా ట్జోర్ట్జియో బ్రౌన్ కూడా దీనిపై తీవ్ర ఆందోళన వ్యక్తం చేశారు.
