- ముగిసిన అధ్యాయం.. మొదలైన ఆదాయం
- 30 ఏళ్ల ఈఎంఐల బానిసత్వానికి విముక్తి
- ఇంటి కోసం జీవితాన్ని అంకితం చేయడమా?
- ఆర్థిక స్వేచ్ఛ కోసం నేటితరం ఆరాటం
సహనం వందే, హైదరాబాద్:
నేటి తరం యువతకు సొంతిల్లు అనేది ఒక తీరని కోరికగా మిగిలిపోతోంది. ఆకాశాన్ని తాకుతున్న ఇంటి ధరలు, భారంగా మారుతున్న బ్యాంకు వడ్డీల వల్ల యువత తమ ఆలోచనా విధానాన్ని మార్చుకుంది. ఇల్లు కొని అప్పుల ఊబిలో కూరుకుపోయే కంటే ఆ డబ్బును స్టాక్ మార్కెట్లో పెట్టి కోట్లు గడించవచ్చని వారు గట్టిగా నమ్ముతున్నారు. ఈ మార్పు రియల్ ఎస్టేట్ రంగానికి పీడకలగా మారుతోంది.
అందని ద్రాక్షగా సొంతిల్లు
ఒకప్పుడు 30 ఏళ్లలోపు సొంతిల్లు కొంటే అది గొప్పగా భావించేవారు. కానీ ఇప్పుడు పరిస్థితి మారింది. ఒక మామూలు ఇల్లు కొనాలన్నా కోటి రూపాయల బడ్జెట్ దాటుతోంది. దీనికి తోడు 30 ఏళ్లపాటు కట్టాల్సిన ఈఎంఐలు యువతను భయపెడుతున్నాయి. ఇల్లు కొని ఒకే చోట బందీ అవ్వడం కంటే ఆ డబ్బును స్టాక్స్ లేదా మ్యూచువల్ ఫండ్స్లో పెట్టి స్వేచ్ఛగా ఉండాలని వారు కోరుకుంటున్నారు.
మార్కెట్టే సురక్షితమైన కోట
వాల్ స్ట్రీట్ జర్నల్ నివేదిక ప్రకారం… చాలామంది యువకులు ఇప్పుడు ఇంటి కంటే స్టాక్ మార్కెట్టే సురక్షితం అని భావిస్తున్నారు. ఉదాహరణకు ఒక ఇల్లు కొని దాన్ని అమ్మాలంటే నెలల సమయం పడుతుంది. పన్నులు, రిజిస్ట్రేషన్ ఖర్చులు తడిసి మోపెడవుతాయి. అదే స్టాక్ మార్కెట్లో అయితే ఒకే క్లిక్తో డబ్బును వెనక్కి తీసుకోవచ్చు. డబ్బు ఇటుకల గోడల మధ్య ఉండటం కంటే మార్కెట్లో ఉండటమే నాకు రక్షణ అని ఒక యువ పెట్టుబడిదారుడు స్పష్టం చేశాడు.
రియల్ ఎస్టేట్ మాయాజాలం
రియల్ ఎస్టేట్ రంగంలో పారదర్శకత ఉండదు. ఇల్లు అమ్మేటప్పుడు వచ్చే లాభం కంటే నిర్వహణ ఖర్చులు, మరమ్మతులు, ఆస్తి పన్నుల భారం ఎక్కువగా ఉంటోంది. అదే స్టాక్ మార్కెట్లో అయితే కంపెనీల వృద్ధిని బట్టి లాభాలు వస్తాయి. మైక్రోసాఫ్ట్ లేదా యాపిల్ వంటి దిగ్గజ కంపెనీల షేర్లు కొంటే ఆ సంస్థల విజయాల్లో మనం కూడా భాగస్వాములం అవుతాం. పెద్ద పెద్ద రియల్ ఎస్టేట్ ప్రాజెక్టుల వెనుక ఉండే చీకటి ఒప్పందాల కంటే సెబీ వంటి సంస్థల నియంత్రణలో ఉండే స్టాక్ మార్కెట్ నయమని భావిస్తున్నారు. మోసపూరితమైన రియల్ ఎస్టేట్ స్కీములకు దూరంగా ఉంటూ డిజిటల్ సంపద వైపు వారు మళ్లుతున్నారు.
ఆర్థిక స్వేచ్ఛ కోసం ఆరాటం
నేటి తరం యువతకు మొబిలిటీ ముఖ్యం. ఉద్యోగం మారినా, నగరం మారినా ఇల్లు ఒక అడ్డంకిగా మారుతుంది. అదే స్టాక్ పోర్ట్ఫోలియో అయితే ప్రపంచంలో ఎక్కడి నుంచైనా నిర్వహించుకోవచ్చు. ఇల్లు కొనేందుకు అవసరమైన భారీ డౌన్ పేమెంట్ మొత్తాన్ని మార్కెట్లో పెడితే పదేళ్లలో అది మూడు రెట్లు అయ్యే అవకాశం ఉంది. ఇంటి కోసం జీవితాన్ని అంకితం చేయడం తప్పు అని వారు భావిస్తున్నారు.
భవిష్యత్తు అంచనాలు
వచ్చే పదేళ్లలో రియల్ ఎస్టేట్ మార్కెట్ కంటే స్టాక్ మార్కెట్ వాటా భారీగా పెరగనుంది. చిన్న మొత్తాలతోనే షేర్లు కొనే సౌలభ్యం ఉండటం వల్ల విద్యార్థులు కూడా పెట్టుబడిదారులుగా మారుతున్నారు. ఇల్లు అనేది కేవలం ఒక సౌకర్యం మాత్రమే. అది పెట్టుబడి కాదన్న కఠిన వాస్తవం ఇప్పుడు అందరికీ అర్థమవుతోంది. ఈ ధోరణి ఇలాగే కొనసాగితే బ్యాంకులు కూడా హోమ్ లోన్స్ కంటే ఇన్వెస్ట్మెంట్ లోన్స్ ఇవ్వాల్సిన పరిస్థితి వస్తుంది.
