- భక్తులకు రక్షణ కవచంలా డిజిటల్ పోర్టల్
- ఒక్క క్లిక్‌లోనే అత్యవసర సేవలు
- ప్రత్యక్ష ట్రాఫిక్ మ్యాపింగ్… వాతావరణ హెచ్చరికలు
- క్షణాల్లో ఫిర్యాదుల పరిష్కారం…
సహనం వందే, కేరళ:
క్యూ లైన్ల గందరగోళం, ఎటు వెళ్లాలో తెలియని అయోమయం, క్షణం క్షణం పెరిగే రద్దీ… శబరిమల అనగానే ప్రతి భక్తుడికీ గుర్తొచ్చే కష్టాలివి. ఏటా తరలివచ్చే కోట్లాది మంది ఇబ్బందులను గమనించిన కేరళ ప్రభుత్వం, ఈసారి సరికొత్త టెక్నాలజీతో ముందుకొచ్చింది. భక్తుల ప్రయాణాన్ని సులభతరం చేసేందుకు ‘వన్ క్లిక్ శబరి’ అనే సమగ్ర డిజిటల్ పోర్టల్‌ను రంగంలోకి దించింది. సమాచారం కోసం వేర్వేరు యాప్‌లు వెతికే పనిలేకుండా, అత్యవసర సేవలన్నింటినీ ఒకే గొడుగు కిందకు తీసుకువచ్చి భక్తులకు కొండంత అండగా నిలుస్తోంది.
ప్రయాణం పక్కా… ప్రశాంత దర్శనం
శబరిమలలోని ప్రత్యక్ష పరిస్థితులను క్షణాల్లో మొబైల్ స్క్రీన్‌పైకి తేవడమే ఈ పోర్టల్ ప్రత్యేకత. లైవ్ మ్యాపింగ్ ద్వారా దారుల్లోని రద్దీ, ట్రాఫిక్ నిలిచిపోయిన ప్రాంతాలను ముందే గుర్తించి ప్రత్యామ్నాయ మార్గాలు ఎంచుకోవచ్చు. ఆర్టీసీ బస్సుల వేళలు, రైళ్ల రాకపోకల వివరాలు ముందే అందుబాటులో ఉండటంతో స్టేషన్లలో గంటల తరబడి వేచి ఉండే తిప్పలు తప్పుతాయి. సమయాన్ని పక్కాగా ప్లాన్ చేసుకోవడం వల్ల ప్రయాణ బడలిక తగ్గి, వృద్ధులు, పిల్లలతో వచ్చే కుటుంబాలు ఎంతో ప్రశాంతంగా స్వామివారిని దర్శించుకోవచ్చు.
అధిక ధరల దోపిడీకి చెక్…
యాత్రలో అనధికారిక వసూళ్లు, అధిక ధరల దోపిడీకి చెక్ పెట్టేలా పోర్టల్‌లో పారదర్శక వ్యవస్థను రూపుదిద్దారు. పంబ నుంచి సన్యాసి నిలయం వరకు ప్రతి సేవకు ఎంత రుసుము చెల్లించాలో కచ్చితమైన ఫిక్స్డ్ రేట్లు ఇందులో ఉంటాయి. భక్తులు తమ ఖర్చులను బేరీజు వేసుకోవడానికి, బిల్లులను సరిచూసుకోవడానికి ఇది ఎంతో ఉపయోగపడుతుంది. ఏ సేవకూ ఎక్కువ ఇవ్వాల్సిన అవసరం లేకుండా, ఎలాంటి ఆర్థిక మోసాలకు గురికాకుండా ఇది భక్తులకు కవచంలా పనిచేస్తుంది.
ఒక్క క్లిక్‌తో తక్షణ సాయం
కొండపై గానీ, ప్రయాణంలో గానీ ఎలాంటి అసౌకర్యం ఎదురైనా నేరుగా అధికారుల దృష్టికి తీసుకెళ్లేందుకు ఒక పటిష్టమైన కంప్లైంట్ విభాగాన్ని ఏర్పాటు చేశారు. సమస్యను నమోదు చేసిన మరుక్షణమే మైదానంలో ఉన్న సిబ్బంది స్పందించి తగిన చర్యలు తీసుకుంటారు. దీనికితోడు వాతావరణ మార్పులు, హఠాత్తుగా కురిసే వర్షాలు, దారుల్లో పెరిగే రద్దీపై ఈ పోర్టల్ ద్వారా అలర్ట్ అందుతాయి. ఈ ముందస్తు సమాచారం ప్రమాదాలను నివారించి, భక్తులు సురక్షిత ప్రాంతాల్లో తలదాచుకునేందుకు దోహదపడుతుంది.
సమన్వయంతో పరిపూర్ణ యాత్ర
సాంకేతికతను భక్తికి అనుసంధానించడం వల్ల క్యూ లైన్ల నిర్వహణ నుంచి అత్యవసర వైద్యం వరకు అన్ని ప్రభుత్వ విభాగాలు ఒకే తాటిపైకి వచ్చాయి. ఇది యంత్రాంగంపై ఒత్తిడిని తగ్గించడమే కాక, శబరిమల యాత్రను మరింత క్రమశిక్షణతో అనుభూతిగా మారుస్తోంది. అనవసర కంగారు, గందరగోళాలకు తావులేకుండా యాత్రను సురక్షితంగా పూర్తి చేయడానికి స్మార్ట్‌ఫోన్ ఉన్న ప్రతి భక్తుడూ ఈ ‘వన్ క్లిక్ శబరి’ సదుపాయాన్ని సద్వినియోగం చేసుకోవడం శ్రేయస్కరం.
