- బీటిల్మేనియా లైవ్ కాన్సర్ట్ షెడ్యూల్
- లివర్‌పూల్ మ్యూజిక్ లెజెండ్స్
- టికెట్ల విక్రయాలు షురూ… అభిమానులకు పండుగ
సహనం వందే, హైదరాబాద్:
ప్రపంచ సంగీత చరిత్రలో చెరగని ముద్ర వేసిన రాక్ అండ్ రోల్ శైలిని మరోసారి కళ్ళకు కట్టేందుకు యూరప్‌కు చెందిన ప్రముఖ ట్రిబ్యూట్ బ్యాండ్ బీటిల్మేనియా భారత్‌కు వస్తోంది. 65 సంవత్సరాల క్రితం యునైటెడ్ కింగ్‌డమ్‌లోని లివర్‌పూల్ నగరం నుండి మొదలైన ది బీటిల్స్ మ్యూజిక్ మానియా నేటికీ ప్రపంచవ్యాప్తంగా కోట్లాది మంది అభిమానులను అలరిస్తూనే ఉంది. ఈ నేపథ్యంలో భారతదేశంలోని ప్రధాన నగరాల్లో ఈ ప్రత్యేకమైన మ్యూజికల్ కన్సర్ట్ నిర్వహించేందుకు ఏర్పాట్లు పూర్తయ్యాయి.
భారత్‌లో అడుగుపెడుతున్న బృందం
యూరప్ నంబర్ వన్ బీటిల్స్ ట్రిబ్యూట్ బ్యాండ్‌గా పేరుగాంచిన ఈ బృందం ఈ నెలలో భారతదేశంలో పర్యటించనుంది. దశాబ్దాల క్రితం నాటి ఆ క్లాసిక్ రాక్ అండ్ రోల్ ధ్వనులను, నాటి అపురూపమైన అనుభూతిని భారతీయ సంగీత ప్రియులకు ప్రత్యక్షంగా పంచేందుకు ఈ టూర్ ప్రత్యేకంగా రూపుదిద్దుకుంది. రాక్ అండ్ రోల్ అభిమానులు ఎప్పుడెప్పుడా అని ఎదురుచూస్తున్న ఈ సంగీత విభావరి కోసం ఇప్పటికే అన్ని ఏర్పాట్లు జరుగుతున్నాయి.
చెన్నై, బెంగళూరు వేదికల వివరాలు
ఈ ఇండియా టూర్‌లో భాగంగా ఈ నెల 11 వ తేదీ సాయంత్రం 7 గంటలకు చెన్నైలోని చెట్పేట్ హారింగ్టన్ రోడ్‌లో ఉన్న సర్ ముత్తా వెంకటసుబ్బారావు కన్సర్ట్ హాల్‌లో ఈ ప్రదర్శన జరగనుంది. ఆ తర్వాత 12న సాయంత్రం బెంగళూరులోని కోరమంగళ హ్యాపీ బ్రూ బార్ అండ్ కిచెన్ అలాగే సన్‌బర్న్ యూనియన్‌లో ఈ మ్యూజికల్ ఈవెంట్ కొనసాగుతుంది. ఈ వేదికల ద్వారా దక్షిణ భారతదేశంలోని సంగీత ప్రియులకు అద్భుతమైన లైవ్ అనుభూతి దక్కనుంది.
హైదరాబాద్‌లోనూ ప్రదర్శన…
సంగీత ప్రియులకు నగరంలోనూ ఈ అరుదైన అవకాశం లభిస్తోంది. 15 న సాయంత్రం 7 గంటలకు సికింద్రాబాద్ క్లబ్ వేదికగా బీటిల్మేనియా ఇండియా టూర్ ప్రదర్శన జరగనుంది. హైదరాబాద్‌లోని రాక్ అండ్ రోల్ ప్రేమికులు ఈ లైవ్ కాన్సర్ట్‌లో పాల్గొని దశాబ్దాల నాటి మధురమైన పాటలను ఆస్వాదించేందుకు నిర్వాహకులు ఏర్పాట్లు చేస్తున్నారు. పాత జ్ఞాపకాలను నెమరువేసుకునేలా సాగే ఈ వేడుక నగర వాసులను విశేషంగా ఆకట్టుకోనుంది
టికెట్ల విక్రయాలు…
కాన్ట్ బై మీ లవ్ అని పాడుకున్న ఆ నాటి అక్షరాలను నిజం చేస్తూ, ప్రస్తుతం ఈ మ్యూజికల్ షోకు సంబంధించిన టికెట్ల కొనుగోళ్లు ఆన్‌లైన్ వేదికగా జోరుగా సాగుతున్నాయి. ప్రదర్శన తేదీలు దగ్గర పడుతుండటంతో వివిధ నగరాల్లోని యువత, మ్యూజిక్ లవర్స్ టికెట్లు ఎగబడి బుక్ చేసుకుంటున్నారు. పరిమిత సీటింగ్, అంతర్జాతీయ స్థాయి ప్రదర్శన కావడంతో టికెట్లకు భారీ డిమాండ్ ఏర్పడింది.
తరాలను కలిపే మ్యూజికల్ వేడుక
కాలంతో సంబంధం లేకుండా ప్రతి తరానికీ నచ్చే రాక్ అండ్ రోల్ సంగీతాన్ని నేరుగా ఆస్వాదించడానికి ఈ టూర్ ఒక చక్కటి వేదిక కానుంది. లివర్‌పూల్ దిగ్గజాల జ్ఞాపకాలను పునరుద్ధరిస్తూ యూరప్ కళాకారులు అందించే ఈ ప్రదర్శన శ్రోతలకు చిరకాలం గుర్తుండిపోయే అద్భుతమైన అనుభూతిని ఇస్తుంది అనడంలో సందేహం లేదు.
