- ప్రతిష్టాత్మక ఈ అంతర్జాతీయ జర్నల్ వెల్లడి
- మాంసాహారంతోనే శతాధిక ఆయువు సాధ్యం
- చైనా శాస్త్రవేత్తల మైండ్-బ్లోయింగ్ రీసెర్చ్
- వందేళ్ళ వృద్ధులపై సంచలనాత్మక పరిశోధన
- శాకాహారులకు డేంజర్ బెల్స్… జాగ్రత్త సుమా
సహనం వందే, హైదరాబాద్:
అసలు వంద సంవత్సరాలు బతకాలంటే ఏం తినాలి? సాధారణంగా మనం ఆరోగ్యంగా ఉండాలంటే రోజూ ఆకుకూరలు, కూరగాయలు, పండ్లు తినాలని వైద్యులు సలహా ఇస్తుంటారు. కానీ ఒక కొత్త రీసెర్చ్ మాత్రం దీనికి పూర్తి భిన్నంగా ఒక షాకింగ్ మర్మాన్ని బయటపెట్టింది. వయసు మీరిన మహిళల్లో శాకాహారం తినేవారి కంటే మాంసాహారం తినేవారు ఎక్కువ కాలం జీవిస్తున్నట్లు చైనాలో నిర్వహించిన ఒక భారీ సర్వే తేల్చింది. ‘ది అమెరికన్ జర్నల్ ఆఫ్ క్లినికల్ న్యూట్రిషన్’ అనే ప్రతిష్టాత్మక పత్రికలో ప్రచురితమైన ఈ అధ్యయనం ఇప్పుడు ప్రపంచవ్యాప్తంగా అందరి దృష్టినీ ఆకర్షిస్తోంది.
ఐదు వేల మందిపై సుదీర్ఘ పరిశోధన…
ఈ సరికొత్త అధ్యయనాన్ని చైనాలోని ప్రఖ్యాత పరిశోధనా సంస్థలు సంయుక్తంగా నిర్వహించాయి. ఫుడాన్ యూనివర్సిటీ, చైనీస్ సెంటర్ ఫర్ డిసీజ్ కంట్రోల్ అండ్ ప్రివెన్షన్, షాంఘై జియో టోంగ్ యూనివర్సిటీకి చెందిన శాస్త్రవేత్తలు కలిసి ‘చైనీస్ లాంగిట్యూడినల్ హెల్తీ లాంగివిటీ సర్వే’ పేరుతో ఈ ప్రాజెక్ట్‌ను పూర్తి చేశారు. ప్రపంచవ్యాప్తంగా వృద్ధులపై జరిగిన అతిపెద్ద సర్వేలలో ఇది ఒకటిగా నిలిచింది. శాస్త్రవేత్తలు సరిగ్గా 100 ఏళ్లు దాటిన 1,459 మందిని, అలాగే 80 నుండి 90 సంవత్సరాల వయసున్న మరో 3,744 మంది సాధారణ వృద్ధుల జీవన విధానాన్ని నిశితంగా పరిశీలించి ఈ నివేదికను రూపొందించారు.
తక్కువ బరువున్న మహిళలకు మాంసాహారం
ఈ రీసెర్చ్‌లో భాగంగా శాస్త్రవేత్తలు ఒక కీలక విషయాన్ని గుర్తించారు. మాంసాహారాన్ని క్రమం తప్పకుండా తినే మహిళలు వంద సంవత్సరాల వయసును చేరుకునే అవకాశం చాలా ఎక్కువగా ఉందని తేలింది. ముఖ్యంగా శరీర బరువు తక్కువగా ఉన్న మహిళల విషయంలో ఈ ప్రభావం స్పష్టంగా కనిపించింది. తక్కువ బరువు ఉన్న మహిళలు రోజూ మాంసాహారం తీసుకోవడం వల్ల వారు 100 సంవత్సరాలు బతికే అవకాశం ఏకంగా 144 శాతం వరకు పెరుగుతుందని పరిశోధకులు స్పష్టం చేశారు. సాధారణ లేదా ఎక్కువ బరువు ఉన్నవారిలో ఈ వ్యత్యాసం అంతగా కనిపించలేదు.
పురుషులలో కనిపించని ఈ ప్రత్యేక ప్రభావం
ఇక్కడ మరో ముఖ్యమైన విషయం ఏమిటంటే… ఈ ఆశ్చర్యకరమైన ఫలితాలు కేవలం మహిళలకే పరిమితమయ్యాయి. పురుషుల విషయంలో మాత్రం మాంసాహారానికి, దీర్ఘకాలిక ఆయువుకు ఎలాంటి సంబంధం లేదని తేలింది. మగవారిలో శాకాహారం తిన్నా, మాంసాహారం తిన్నా ఆయుష్షు విషయంలో పెద్దగా తేడా ఏమీ కనిపించలేదు. అయితే ఈ రీసెర్చ్‌లోనే మరో కోణం కూడా ఉంది. పాలు, గుడ్లు, చేపలు వంటివి తినే శాకాహారులు కూడా మాంసాహారులతో సమానంగా వంద సంవత్సరాలు బతికే అవకాశం ఉందని తేలింది. ఎలాంటి పోషకాలు లేకుండా కేవలం ఆకుకూరలపై మాత్రమే ఆధారపడి తీవ్రంగా బరువు తగ్గిన వారిలోనే సమస్య కనిపిస్తోందని నిపుణులు వివరిస్తున్నారు.
వృద్ధాప్యంలో ప్రొటీన్ యొక్క ప్రాముఖ్యత
వయసు పైబడిన కొద్దీ శరీరంలో కండరాల బలం తగ్గిపోవడం సహజంగా జరుగుతుంది. ఈ కండరాల పటిష్టతను కాపాడుకోవడానికి ప్రొటీన్ అత్యంత అవసరం. వృద్ధాప్యంలో శరీరానికి తగినన్ని క్యాలరీలు, శక్తి అందకపోతే ఆయుష్షు తగ్గే ప్రమాదం ఉంటుంది. అందుకే మాంసాహారంలో లభించే ప్రొటీన్లు వృద్ధులకు శ్రీరామరక్షలా పనిచేస్తాయి. బాడీ మాస్ ఇండెక్స్ (బీఎంఐ) అనేది ఈ ఆయుర్దాయాన్ని నిర్ణయించడంలో కీలక పాత్ర పోషిస్తోంది. బరువు తక్కువగా ఉన్నవారు మాంసాహారం తీసుకోవడం వల్ల వారి శరీరానికి అవసరమైన పోషకాలు లభిస్తాయి.
సమతుల్య ఆహారమే ఆరోగ్య రహస్యం
అయితే కేవలం మాంసాహారమే గొప్పదనే అపోహ పెట్టుకోవద్దని నిపుణులు హెచ్చరిస్తున్నారు. ఏ ఆహారమైనా సమతుల్యంగా తీసుకోవడమే అసలైన రహస్యం. ప్రాసెస్ చేసిన మాంసాలు లేదా కొన్ని రకాల రెడ్ మీట్ ఆరోగ్యానికి హాని కలిగిస్తాయి. మారుతున్న కాలానికి తగినట్లుగా మన ఆహారపు అలవాట్లను మార్చుకోవడం చాలా అవసరం. కేవలం ఆకుకూరలే కాకుండా సరైన మోతాదులో ప్రొటీన్ ఉన్న నాణ్యమైన ఆహారాన్ని శరీరానికి అందించినప్పుడే ఎలాంటి అనారోగ్యాలు దరిచేరకుండా దీర్ఘకాలిక, ఆరోగ్యకరమైన జీవితాన్ని సాగించవచ్చు.
