- రీసైక్లింగ్ బాటలో పాత పూజా సామాగ్రి
- పాత పటాలు, పూజా సామాగ్రికి ఉద్వాసన
- పర్యావరణ పరిరక్షణ… నూతన పరిష్కారం
- దేవుడికి గౌరవప్రదమైన వీడ్కోలు
- మనసును హత్తుకునే మహా యజ్ఞం!
సహనం వందే, హైదరాబాద్:
ఏళ్ల తరబడి పూజించిన దేవుడి విగ్రహాలు, పటాలు, పూజా సామాగ్రి దెబ్బతింటే ఏం చేయాలో తెలియక భక్తులు సతమతమవుతుంటారు. నగరంలో ఇన్నాళ్లూ సరైన మార్గం లేక ఇబ్బంది పడ్డ పౌరులకు జీహెచ్ఎంసీ ‘ప్రాజెక్ట్ ఉద్వాసన’ ద్వారా ఒక గొప్ప ఉపశమనం లభించింది. భక్తి భావనకు భంగం కలగకుండా, పర్యావరణాన్ని కాపాడుతూ వీటిని గౌరవప్రదంగా సాగనంపే ప్రక్రియను ప్రారంభించారు.
పూజా సామగ్రి మిగిల్చే వేదన
హైదరాబాద్ నగరంలో వేలాది ఇళ్లలో పాతబడిన దేవుడి ఫోటోలు, దెబ్బతిన్న విగ్రహాలు, క్యాలెండర్లు, పూజా సామగ్రి పేరుకుపోయాయి. వీటిని గౌరవంగా పారవేసే వ్యవస్థ లేకపోవడమే దీనికి ప్రధాన కారణం. ప్రజలు వీటిని పూజా మందిరాల్లోనే దశాబ్దాల పాటు ఉంచేస్తున్నారు. చివరకు దిక్కుతోచక చెట్ల కింద పడేస్తున్నారు. మరికొందరు నదులు, చెరువులు లేదా మున్సిపల్ చెత్తలో వేస్తున్నారు. దీనివల్ల పవిత్ర వస్తువులు కలుషితమై భక్తుల మనసులు తీవ్రంగా గాయపడుతున్నాయి.
ప్రాజెక్ట్ ఉద్వాసన రూపకల్పన
ఈ సమస్యను గమనించిన గ్రేటర్ హైదరాబాద్ మున్సిపల్ కార్పొరేషన్ ఒక గొప్ప ఆలోచనతో ముందుకు వచ్చింది. ఈ ఏడాది నుంచి ప్రాజెక్ట్ ఉద్వాసనను అమలులోకి తెచ్చింది. భక్తిని, పర్యావరణ పరిరక్షణను ఒకే తాటిపైకి తెచ్చిన కార్యక్రమమిది. పవిత్ర వస్తువులకు ఉద్వాసన పూజ చేసి పంపడం ఈ ప్రాజెక్ట్ ప్రత్యేకత. ప్రజలకు తమ నిష్టను కాపాడుకోవడానికి ఇది సురక్షితమైన మార్గంగా మారింది.
గౌరవప్రదమైన సేకరణ పద్ధతి
ఈ కార్యక్రమంలో ప్రజల భాగస్వామ్యం చాలా కీలకంగా మారింది. పౌరులు తమ ఇళ్లలోని దేవుడి పటాలు, విగ్రహాలు, పూజా పదార్థాలను ఈ కేంద్రాలకు తెచ్చి ఇస్తున్నారు. జీహెచ్ఎంసీ సిబ్బంది ఆ సామగ్రిని వేరు చేసి భద్రపరుస్తున్నారు. సాంప్రదాయబద్ధంగా దేవుళ్లకు గౌరవ వీడ్కోలు మంత్రాలతో ఈ పూజా విధానం సాగుతుంది. మానసిక ప్రశాంతతతో పాటు బాధ్యతాయుతమైన నాగరికతను ఇది నగరంలో పెంచుతోంది.
వ్యర్థాల శాస్త్రీయ పునర్వినియోగం
సేకరించిన వస్తువులను వేరు చేయడం ఈ ప్రాజెక్ట్ లో మరో ముఖ్యం. ఫోటోలకు ఉన్న ఫ్రేములు, గాజులు, కాగితాలు, విగ్రహాల పదార్థాలను విడదీస్తారు. అనంతరం వాటిని పర్యావరణానికి హాని కలగని రీతిలో రీసైక్లింగ్ చేస్తారు. భక్తి సామాగ్రి నగరంలో చెత్తగా మారకుండా ఇది అడ్డుకట్ట వేస్తోంది. చెత్త నిర్వహణలో భాగమైన ఈ పద్ధతి వల్ల నగర వీధులు, జలవనరులు పరిశుభ్రంగా మారుతున్నాయి.
పర్యావరణ శ్రేయస్సుకు ఊతం
ఈ కొత్త వ్యవస్థ వల్ల హైదరాబాద్ లోని జలవనరులు, పచ్చదనం రక్షిస్తారు. నీటిలో రసాయనాలు కలిసే ప్రమాదం పూర్తిగా తప్పింది. చెట్ల కింద పడేసే పాత సామాగ్రి వల్ల పరిసరాలు అశుభ్రం కావడం ఆగింది. నగర పారిశుధ్యంలో ఇది ఒక మైలురాయిగా నిలిచింది. పౌరులు కూడా ఈ కార్యక్రమంలో చురుగ్గా పాల్గొని తమ పవిత్ర బాధ్యతను నిలబెట్టుకుంటున్నారు.
భక్తికి పర్యావరణ జోడింపు
సాంప్రదాయం, ఆధునిక పర్యావరణ పరిరక్షణ కలిసి నడవచ్చని ఈ ప్రాజెక్ట్ నిరూపించింది. నగర ప్రజల్లో దీనివల్ల సరికొత్త చైతన్యం వచ్చింది. పవిత్రమైన రీతిలో సాగనంపడం వల్ల భక్తుల్లోని ఆందోళన తొలగిపోయింది. స్వచ్ఛ హైదరాబాద్ నిర్మాణంలో ప్రాజెక్ట్ ఉద్వాసన కీలకాంశంగా మారింది. రాబోయే రోజుల్లో ఇతర నగరాలకు ఇది ఒక గొప్ప మార్గదర్శకంగా నిలుస్తుంది.
