- బయటపడ్డ రహస్య మెయిల్స్
- ఎపిస్టీన్ ను కలిసినట్టు మెలానియా వెల్లడి
- అమెరికా ప్రథమ మహిళపై వేటగాడి నీడ
- కోర్టులో తేల్చుకుందామన్న మెలానియా
సహనం వందే, అమెరికా:
అమెరికా ప్రథమ మహిళ మెలానియా ట్రంప్ తనపై వస్తున్న లైంగిక కుంభకోణాల ఆరోపణలపై ఉగ్రరూపం దాల్చారు. లైంగిక నేరగాడు జెఫ్రీ ఎపిస్టీన్తో తనకు ఎటువంటి సంబంధం లేదని తేల్చిచెప్పారు. ఈ అంతర్జాతీయ రాజకీయ, సెక్స్ కుంభకోణం ఇప్పుడు అగ్రరాజ్యాన్ని కుదిపేస్తోంది. బాధితులకు న్యాయం జరగాలని ఆమె డిమాండ్ చేయడం ఒక వింత.
మెలానియా సంచలన ప్రకటన
వైట్ హౌస్లోని గ్రాండ్ ఫోయెర్ నుండి మెలానియా ట్రంప్ 5 నిమిషాల పాటు అసాధారణ ప్రసంగం చేశారు. తన పరువు తీయడానికి రాజకీయ ప్రత్యర్థులు కుట్ర చేస్తున్నారని మండిపడ్డారు. ఎపిస్టీన్ చేసిన ఘోరమైన లైంగిక నేరాలతో తనకు ముడిపెట్టడం నీచమని ఆగ్రహం వ్యక్తం చేశారు. తన న్యాయవాదుల ద్వారా ఈ అబద్ధపు ప్రచారాలపై పోరాడుతానని హెచ్చరించారు. అక్టోబర్ నెలలో హార్పర్ కాలిన్స్ సంస్థ కూడా తనపై తప్పుడు వార్తలు రాసి క్షమాపణలు చెప్పిందని గుర్తు చేశారు.
రహస్య ఈ-మెయిల్ గుట్టు
జస్టిస్ డిపార్ట్మెంట్ విడుదల చేసిన లక్షలాది పేజీల ఎపిస్టీన్ ఫైల్స్లో ఒక ఈమెయిల్ సంచలనం రేపుతోంది. 2002 నాటి ఈ మెయిల్లో మెలానియా పేరుతో ఉన్న సందేశం గిస్లేన్ మాక్స్వెల్కు పంపినట్లు ఉంది. అందులో ఎపిస్టీన్ గురించి ప్రస్తావన ఉండటం గమనార్హం. అయితే అది కేవలం మర్యాదపూర్వకమైన సందేశం మాత్రమేనని మెలానియా కొట్టిపారేశారు. న్యూయార్క్, ఫ్లోరిడాలోని సామాజిక వర్గాల్లో ఉండటం వల్ల పరిచయాలు ఉండవచ్చు కానీ స్నేహం లేదని స్పష్టం చేశారు.
ట్రంప్ పరిచయం వెనుక అసలు నిజం
ఎపిస్టీన్ ద్వారానే డోనాల్డ్ ట్రంప్, మెలానియా కలిశారన్న ప్రచారాన్ని ఆమె తీవ్రంగా ఖండించారు. తాను 1998లో న్యూయార్క్ నగరంలో జరిగిన ఒక పార్టీలో ట్రంప్ను కలిశానని వివరించారు. ఈ విషయంలో వస్తున్నవన్నీ కట్టుకథలని కొట్టిపారేశారు. అప్పట్లో ట్రంప్ ఎపిస్టీన్ను గొప్పవాడని పొగిడినప్పటికీ ప్రస్తుతం ఆ వివాదాలకు స్వస్తి పలకాలని చూస్తున్నారు. కానీ మెలానియా వ్యాఖ్యలు మళ్ళీ ఈ అంశాన్ని తెరపైకి తెచ్చాయి.
బాధితుల కోసం బహిరంగ విచారణ
ప్రతి బాధితురాలు తన కథను బహిరంగంగా చెప్పుకునే అవకాశం ఉండాలని మెలానియా డిమాండ్ చేశారు. అమెరికా కాంగ్రెస్ దీనిపై తక్షణమే బహిరంగ విచారణ జరపాలని కోరారు. డెమోక్రాట్ ప్రతినిధి రాబర్ట్ గార్షియా కూడా ఈ డిమాండ్ను సమర్థించారు. హౌస్ ఓవర్ సైట్ కమిటీ చైర్మన్ జేమ్స్ కోమర్ను విచారణ జరపాలని కోరారు. ఎపిస్టీన్ బాధితుల కథలు రికార్డుల్లోకి ఎక్కినప్పుడే నిజం బయటపడుతుందని మెలానియా నొక్కి చెప్పారు.
ఫోటోల సాక్ష్యం… దర్యాప్తు
ఎపిస్టీన్ నివాసంలో దొరికిన ఫోటోల్లో ఒక డ్రాయర్లో ట్రంప్, మెలానియా, ఎపిస్టీన్, మాక్స్వెల్ కలిసి ఉన్న ఫోటో లభించింది. ఎపిస్టీన్ ఫైల్స్ ట్రాన్స్పరెన్సీ యాక్ట్ ద్వారా ఈ రహస్యాలన్నీ బయటకు వస్తున్నాయి. ఎపిస్టీన్ 2019లో జైలులో ఆత్మహత్య చేసుకోగా… మాక్స్వెల్కు 2021లో 20 ఏళ్ల జైలు శిక్ష పడింది. గతేడాది అక్టోబర్ నుండి ఈ వివాదం సద్దుమణిగిందని భావిస్తున్న తరుణంలో మెలానియా స్వయంగా స్పందించడం సంచలనం రేపింది.
ఇరాన్ యుద్ధం… రాజకీయ వేడి
ప్రస్తుతం అమెరికా ఇరాన్ యుద్ధంతో సతమతమవుతోంది. రాయబారి సెర్గియో గోర్ భారత్తో వాణిజ్య చర్చల గురించి మాట్లాడుతున్నారు. ఇలాంటి కీలక సమయంలో ఎపిస్టీన్ అంశం మళ్ళీ చర్చకు రావడం గమనార్హం. రాజకీయ ప్రాముఖ్యత ఉన్న ఈ సమయంలో మెలానియా తన పరువు కోసం చేస్తున్న పోరాటం అమెరికా రాజకీయాల్లో ఏ మలుపు తిరుగుతుందో చూడాలి.
