- బిర్యానీ నగరంలో రొట్టెల ప్రయాణం!
- జొన్న వైపు సిటిజన్లు… జంక్ ఫుడ్కు ఎండ్
- మహిళా వ్యాపారుల సరికొత్త విప్లవం
సహనం వందే, హైదరాబాద్:
బిర్యానీల నగరంలో ఇప్పుడు జొన్న రొట్టెల జాతర నడుస్తోంది. రాత్రి వేళల్లో పిజ్జాలు, ఫాస్ట్ ఫుడ్ తిని విసిగిపోయిన భాగ్యనగర వాసులు ఇప్పుడు ఆరోగ్యకరమైన సిరిధాన్యాల వైపు పరుగులు తీస్తున్నారు. ఒకప్పుడు పేదవాడి ఆహారంగా భావించిన ఈ గ్రామీణ వంటకం… ఇప్పుడు హైటెక్ సిటీ కార్పొరేట్ ఉద్యోగుల ప్లేట్లలో హాట్ కేకుల్లా మారి సరికొత్త ఆహార విప్లవాన్ని సృష్టిస్తోంది.
నగరంలో మారిన ట్రెండ్
హైదరాబాద్ అంటేనే బిర్యానీకి కేరాఫ్ అడ్రస్. కానీ ఐటీ కల్చర్ పెరిగిన తర్వాత జీవన విధానంలో వచ్చిన మార్పులు, పెరిగిన ఒత్తిడి వల్ల జనం ఆర్గానిక్ వైపు మొగ్గు చూపుతున్నారు. రోజూ రాత్రి పూట బిర్యానీలు, పిజ్జాలు తిని బోర్ కొట్టేసి, పొట్ట పెరిగిపోతోందని టెన్షన్ పడుతున్న వారికి ఇది ప్రత్యామ్నాయంగా మారింది. మైదాతో చేసే రుమాలు రొట్టెలు, పరాటాల కంటే ఈ జొన్న రొట్టెలే జీర్ణక్రియకు ఎంతో మంచివని డాక్టర్లు సైతం చెప్తుండటంతో చిన్న పిల్లల నుంచి ముసలి వాళ్ల వరకు అందరూ ఈ రొట్టెలను ఇష్టంగా తింటూ తమ డైలీ డైట్లో భాగం చేసుకుంటున్నారు.
గ్లోబల్ డిమాండ్ నుంచి గల్లీ వరకు
ఒకప్పుడు మన తాతలు, ముత్తాతలు జొన్నలు, సజ్జలు తిని 100 ఏళ్లు గట్టిగా బతికారు. కానీ ఆధునిక కాలంలో ఫాస్ట్ ఫుడ్కు అలవాటు పడి రోగాల బారిన పడుతున్న తరుణంలో ప్రపంచవ్యాప్తంగా మిల్లెట్స్ ప్రాముఖ్యత మళ్లీ పెరిగింది. ఐక్యరాజ్యసమితి సైతం అంతర్జాతీయ మిల్లెట్స్ సంవత్సరాన్ని ప్రకటించిందంటే వీటికి ఎంత డిమాండ్ ఉందో అర్థం చేసుకోవచ్చు. ఆ గ్లోబల్ ట్రెండ్ ఇప్పుడు మన హైదరాబాద్ వీధుల్లో స్పష్టంగా కనిపిస్తోంది. బిర్యానీ హండీ పక్కనే జొన్న రొట్టెల పెనం కూడా అంతే వేడెక్కుతుండటం ఇక్కడి ప్రత్యేకత.
సాయంత్రం వేళల్లో క్యూ లైన్లు
హైదరాబాద్లోని కేపీహెచ్బీ, మాదాపూర్, దిల్ షుక్ నగర్ లాంటి ఏరియాల్లో సాయంత్రం అయిందంటే చాలు రోడ్డు పక్కన జొన్న రొట్టెల బండ్లు వెలుస్తున్నాయి. వేడివేడి జొన్న రొట్టెతో పాటు కాంబినేషన్గా ఇచ్చే పప్పు, ఇంకా రోటి పచ్చళ్లు చూస్తుంటేనే నోరూరుతుంది. డైటింగ్ చేసే వాళ్లకు, షుగర్ పేషెంట్లకు ఇది అమృతంలా మారింది. పిజ్జా ముక్కల కంటే ఈ జొన్న రొట్టె ముక్కే ఎంతో మిన్న అని జనం క్యూ కడుతున్నారు.
మహిళా సాధికారతకు మార్గం
ఈ జొన్న రొట్టెల వ్యాపారం వెనుక ఒక గొప్ప సామాజిక మార్పు దాగి ఉంది. ఈ బండ్లను నడుపుతున్న వారిలో ఎక్కువ మంది మహిళలే ఉండటం విశేషం. పల్లెల నుంచి వలస వచ్చిన ఎంతో మంది మహిళలు తమకు తెలిసిన రొట్టెలు చేసే విద్యతో స్వయం ఉపాధి పొందుతున్నారు. అధికారుల నుంచి ఎలాంటి పెద్ద సాయం లేకపోయినా తమ కష్టాన్నే నమ్ముకుని రోడ్డు పక్కన చిన్న చిన్న స్టాళ్లు పెట్టుకుని నెలకు వేల రూపాయలు సంపాదిస్తూ కుటుంబాలను పోషించుకుంటున్నారు. ఇంటి రుచిని తలపించేలా వీరు చేసే వంటకాలే వీరి సక్సెస్కు సీక్రెట్.
తక్కువ ధరలో పౌష్టికాహారం
ఈ ట్రెండ్ వల్ల సామాన్య ప్రజలకు తక్కువ ధరలోనే ఎంతో పౌష్టికాహారం లభిస్తోంది. 50 లేదా 60 రూపాయలకే కడుపు నిండా హెల్దీ ఫుడ్ దొరుకుతుండటంతో బ్యాచిలర్స్, ఉద్యోగులు సంతోషం వ్యక్తం చేస్తున్నారు. అయితే రోడ్డు పక్కన దుమ్ము, ధూళి పడకుండా మరికొంత హైజీనిక్ పద్ధతులు పాటిస్తే బాగుంటుందనేది కస్టమర్ల మాట. అలాగే మున్సిపల్ అధికారులు ట్రాఫిక్కు ఇబ్బంది లేకుండా వీరికి ప్రత్యేక జోన్లు కేటాయిస్తే ఈ మహిళా వ్యాపారులకు ఎంతో మేలు జరుగుతుంది.
రైతులకు పెరిగిన లబ్ధి
ఈ జొన్న రొట్టెల అమ్మకాల వల్ల స్థానిక మార్కెట్లో జొన్నల డిమాండ్ కూడా భారీగా పెరిగింది. హోల్ సేల్ మార్కెట్లలో ఒకప్పుడు తక్కువ ధరకు అమ్ముడైన జొన్నలు ఇప్పుడు మంచి ధర పలుకుతున్నాయి. ఇది పరోక్షంగా రైతన్నకు కూడా ఎంతో కొంత లాభాన్ని చేకూరుస్తోంది. జంక్ ఫుడ్ సంస్కృతి నుంచి మన మూలాల్లోకి ప్రయాణిస్తున్నాం అనడానికి ఇదొక నిదర్శనం. దీనివల్ల అటు నగర వాసుల ఆరోగ్యం మెరుగుపడటంతో పాటు ఇటు మహిళా సాధికారతకు, గ్రామీణ రైతుల జొన్న పంటల అమ్మకాలకు ఎంతో మేలు జరుగుతోంది.
