- ఆకాశం నుంచి 3 కోట్ల దోమల విడుదల
- అమెరికాలో గూగుల్ వినూత్న ప్లాన్
- ప్రాణాంతక వ్యాధుల నియంత్రణే లక్ష్యం
- ప్రకృతిపై పెరుగుతున్న ఆందోళనలు
సహనం వందే, హైదరాబాద్:
టెక్నాలజీ దిగ్గజం గూగుల్ ఇప్పుడు సాఫ్ట్వేర్ రంగం దాటి బయాలజీ వైపు అడుగులు వేస్తోంది. మనుషులను పట్టిపీడిస్తున్న దోమలను కట్టడి చేసేందుకు ఆ సంస్థ ఏకంగా కోట్లాది దోమలను వదిలేందుకు సిద్ధమవుతోంది. ఆకాశం నుంచి దోమల వర్షం కురిపించడమే ఈ వింత ప్రయోగం వెనుక ఉన్న అసలు వ్యూహం. ఇది కేవలం టెక్నాలజీ మాత్రమేనా లేక ప్రకృతి గమనాన్ని మార్చే యత్నమా?
టెక్నాలజీతో కొత్త యుద్ధం
ప్రపంచవ్యాప్తంగా దోమల వల్ల సంభవించే డెంగీ, మలేరియా వంటి వ్యాధులపై గూగుల్ సమర శంఖం పూరించింది. ఇందులో భాగంగా అమెరికాలోని కాలిఫోర్నియా, ఫ్లోరిడా రాష్ట్రాల్లో 3 కోట్ల 20 లక్షల దోమలను వదిలేందుకు సంస్థ ఏర్పాట్లు చేస్తోంది. దోమలను అణిచివేయడానికి దోమలనే ఆయుధంగా వాడుకోవడమే ఈ ప్రయోగం ప్రత్యేకత. ఇది ఒక రోగాన్ని తగ్గించేందుకు మరో మందును వాడినట్లుగా ఉంటుంది.
ప్రత్యేకంగా తయారు చేసిన కీటకాలు
ఈ ప్రయోగంలో విడుదల చేయబోయేవి సాధారణ దోమలు కావు. వీటిని ప్రయోగశాలల్లో ప్రత్యేకంగా ఇంజనీరింగ్ చేసి తయారు చేశారు. ఈ దోమలు వ్యాధులను మోసుకెళ్లవు. అంతేకాకుండా వ్యాధులను వ్యాప్తి చేసే దోమల సంతతిని తగ్గించేలా వీటిని రూపొందించారు. వీటివల్ల ప్రజలకు ఎలాంటి ముప్పు ఉండదని శాస్త్రవేత్తలు ధీమా వ్యక్తం చేస్తున్నారు.
అధికారుల అనుమతి కోసం నిరీక్షణ
గూగుల్ ఈ ప్రయోగం కోసం ఫెడరల్ అధికారుల దగ్గర అధికారికంగా అనుమతి కోరింది. రాబోయే రెండేళ్ల కాలంలో దశలవారీగా ఈ లక్ష్యాన్ని పూర్తి చేయాలని గూగుల్ ప్రణాళికలు రచించింది. అమెరికా ప్రభుత్వ సంస్థలు పర్యావరణ ప్రభావం, భద్రత, స్థానిక జీవరాశులపై ఈ దోమల వల్ల కలిగే పరిణామాలను నిశితంగా పరిశీలిస్తున్నాయి. అన్ని అంశాలను క్షుణ్ణంగా తనిఖీ చేసిన తర్వాతే గ్రీన్ సిగ్నల్ వచ్చే అవకాశం ఉంది.
ప్రకృతిలో మానవ జోక్యం
సామాన్యుల నుంచి నిపుణుల వరకు ఇప్పుడు ఒకటే ప్రశ్న తలెత్తుతోంది. ప్రకృతిలో మనం చేసే ఇటువంటి మార్పులు భవిష్యత్తులో ఎలాంటి పరిణామాలకు దారితీస్తాయనే భయం అందరిలో ఉంది. అయితే ఈ ప్రయోగం సక్సెస్ అయితే ఆరోగ్య రంగంలో భారీగా ఖర్చు తగ్గుతుందని గూగుల్ భావిస్తోంది. భవిష్యత్తులో దోమల బెడదను కంట్రోల్ చేసే కొత్త పద్ధతులకు ఇది ఆద్యం కానుంది.
తెలివైన శత్రువుతో పోరు
దోమలు కూడా మారుతున్న కాలంతో పాటు తెలివిగా మారుతున్నాయి. రీసెర్చ్ ప్రకారం దోమలు మనం వాడే బాడీ స్ప్రేలు, రిపెల్లెంట్లను కూడా గుర్తుపెట్టుకుంటున్నాయని తేలింది. అంటే మనం చేసే ప్రయోగాలకు అవి ప్రతిస్పందిస్తున్నాయన్నమాట. ఈ ఇంజనీరింగ్ దోమల ప్రయోగం ఎంతవరకు సఫలం అవుతుందనేది ఇప్పుడు అందరిలోనూ ఆసక్తిని రేకెత్తిస్తోంది.
భవిష్యత్తు టెక్నాలజీ వైపు అడుగు
గూగుల్ వంటి సంస్థలు తీసుకుంటున్న ఈ రిస్క్ వెనుక ప్రపంచవ్యాప్తంగా డెంగీ, మలేరియాతో చనిపోతున్న లక్షలాది మంది ప్రాణాలను కాపాడాలనే లక్ష్యం ఉంది. ఒకప్పుడు సాఫ్ట్వేర్ అప్డేట్లు పంపిన గూగుల్… ఇప్పుడు దోమల ద్వారా సమాజంలో అప్డేట్లు పంపే ప్రయత్నం చేస్తోంది. ఒకవేళ ఈ ప్రయోగం సక్సెస్ అయితే అమెరికా తర్వాత మిగిలిన దేశాలకు కూడా ఈ పద్ధతి విస్తరించే అవకాశం ఉంది.
