- వెల్ టవర్ సీఈఓ శంఖ్ మిత్రకు భారీ వేతనం
- ఎలన్ మస్క్ తర్వాత రెండో స్థానం ఆయనదే
- ఆ తర్వాత మరో ఇండియన్ కు 860 కోట్లు
సహనం వందే, హైదరాబాద్:
ఎప్పుడైనా ఊహించారా? ఒక్క ఏడాదికి ఏకంగా 7 వేల కోట్ల రూపాయల ప్యాకేజీని ఎవరైనా తీసుకుంటారని? మనలో చాలా మందికి లైఫ్ మొత్తం సంపాదించినా ఈ ఫిగర్ కలలో కూడా రాదు. కానీ భారతీయ సంతతికి చెందిన ఒక వ్యక్తి ఇప్పుడు ఏకంగా ప్రపంచంలోనే అత్యధిక వేతనం తీసుకుంటున్న రెండో సీఈఓగా నిలిచారు. అసలు ఈ శంఖ్ మిత్ర ఎవరు? ఎందుకు ఆయనకు ఇంత భారీ ప్యాకేజీ ఇచ్చారు? ఈ ఇంట్రెస్టింగ్ స్టోరీ ఏంటో ఇప్పుడు చూద్దాం.
సీఈఓ వేతనాల్లో కొత్త రికార్డు
ప్రపంచంలో అత్యధిక వేతనం తీసుకుంటున్న ఎగ్జిక్యూటివ్ల జాబితాలో ఎలాన్ మస్క్ అగ్రస్థానంలో కొనసాగుతున్నారు. ఆయన తర్వాత ఏకంగా 7,061 కోట్ల రూపాయల వేతనంతో శంఖ్ మిత్ర రెండో స్థానాన్ని ఆక్రమించారు. దశాబ్ద కాలంలో ఒక పబ్లిక్ కంపెనీ సీఈఓకు దక్కిన అతిపెద్ద వేతనాల్లో ఇది ఒకటిగా నిలిచింది. అమెరికా రియల్ ఎస్టేట్ ఇన్వెస్ట్మెంట్ ట్రస్ట్ వెల్ టవర్ సంస్థ ఆయనకు ఈ భారీ మొత్తాన్ని ప్రకటించింది. 2025లో ఎగ్జిక్యూటివ్ల వేతనాలు అనూహ్యంగా పెరగడం వెనుక ఉన్న కార్పొరేట్ వ్యూహాలు ఇప్పుడు చర్చనీయాంశమయ్యాయి.
స్టాక్ ఆప్షన్ల మాయాజాలం
ఈ 7,061 కోట్ల రూపాయలు కేవలం నగదు రూపంలో అందినవి కావు. ఇందులో 99 శాతం వాటా స్టాక్ గ్రాంట్ల రూపంలోనే ఉంది. అక్టోబరులో ఆయనకు 6,791 కోట్ల రూపాయల విలువైన ఈక్విటీ అవార్డులు అందజేశారు. అయితే వెల్ టవర్ సంస్థ వృద్ధి కారణంగా ఏడాది తిరిగే సరికి ఆ షేర్ల విలువ 8,600 కోట్ల రూపాయలకు పెరిగింది. ఇది కేవలం వేతనం మాత్రమే కాదు… సంస్థ పనితీరుపై ఆధారపడిన ఒక భారీ పెట్టుబడి అని స్పష్టమవుతోంది.
కఠినమైన షరతుల వలయం
ఈ భారీ ప్యాకేజీ వెనుక కంపెనీ విధించిన నిబంధనలు అత్యంత కఠినంగా ఉన్నాయి. మిత్రకు దక్కిన షేర్లలో సగం వాటా 2031లో మాత్రమే చేతికి అందుతుంది. మిగిలిన షేర్లు దక్కాలంటే వెల్ టవర్ మార్కెట్ విలువను 45 శాతం పెంచాల్సి ఉంటుంది. అదేవిధంగా ఐదేళ్ల కాలంలో ఇతర స్టాక్ ఇండెక్స్లను మించి రాణించాలనే కఠినమైన నిబంధనను కూడా ఆయన అధిగమించాల్సి ఉంటుంది. ఈ లక్ష్యాలను చేరుకుంటేనే ఆయనకు ఆ మొత్తాలు పూర్తిగా దక్కుతాయి.
సామాన్యుడి నుంచి అగ్రస్థానానికి
కోల్కతాలోని జాదవ్పూర్ యూనివర్సిటీలో ఇంజనీరింగ్ పూర్తి చేసిన శంఖ్ మిత్ర ప్రయాణం ఒక ఇన్స్పిరేషన్. అమెరికాలో ఎంబీఏ పూర్తి చేసి ప్రైస్వాటర్హౌస్ కూపర్స్, ఫిడిలిటీ, సిటాడెల్, మిలీనియం మేనేజ్మెంట్ వంటి దిగ్గజ సంస్థల్లో కీలక బాధ్యతలు నిర్వర్తించారు. 2016లో వెల్ టవర్ సంస్థలో చేరిన ఆయన 2020లో సీఈఓగా బాధ్యతలు చేపట్టి సంస్థను ఉన్నత శిఖరాలకు చేర్చడంలో కీలక పాత్ర పోషించారు.
పోటీలో నికేష్ అరోరా కూడా…
ఈ జాబితాలో మరో భారతీయుడైన నికేష్ అరోరా ఎనిమిదో స్థానంలో నిలిచి సత్తా చాటారు. పాలో ఆల్టో నెట్వర్క్స్ అధిపతిగా ఉన్న ఆయన 860 కోట్ల రూపాయల వేతనాన్ని అందుకుంటున్నారు. ఐఐటీ బెనారస్ హిందూ యూనివర్సిటీలో చదువుకున్న అరోరా… గూగుల్, సాఫ్ట్బ్యాంక్ వంటి సంస్థల్లో పనిచేసిన అనుభవంతో ఈ స్థాయికి చేరుకున్నారు. భారతీయ మేధావులు ప్రపంచ కార్పొరేట్ దిగ్గజాలను శాసిస్తున్న తీరుకు ఇది నిదర్శనం.
ఇతర దిగ్గజాల ప్రస్థానం
ఈ జాబితాలో ఎలాన్ మస్క్, శంఖ్ మిత్రలతో పాటు జార్జ్ కర్ట్జ్, హాక్ టాన్, డేవిడ్ జస్లావ్, స్టీఫెన్ స్క్వార్జ్మాన్, డేవిడ్ సోలోమన్ వంటి వారు ఉన్నారు. ఫిగ్మా సీఈవో డైలాన్ ఫీల్డ్ 7,430 కోట్ల రూపాయల ప్యాకేజీని అందుకున్నా… సంస్థ ఎస్ అండ్ పి 500లో లేకపోవడంతో ఆయన పేరు జాబితాలో చేర్చలేదు. మిత్ర అందుకున్న ఈ భారీ వేతనం కేవలం అదృష్టం కాదు… అది ఆయన పట్టుదలకు దక్కిన ప్రతిఫలం అని నిపుణులు విశ్లేషిస్తున్నారు.
